أنا متحف محمود خليل.. اسمعوا حكايتي مع الفن والحب في قلب القاهرة
الفن التشكيلي في مصر المدرسة التأثيرية ديجا فان غوخ لوحات مونيه متاحف القاهرة متاحف مصر متحف الدقي متحف محمود خليل وحرمه معالم الجيزة
Cairo 360
أنا متحف محمود خليل.. أو زي ما الناس بيسمّوني “متحف محمود خليل وحرمه”، بس الحقيقة، ولا اسم في دول مناسب ليا. الاسم اللي يليق بيا فعلًا هو “قصر الفن والحب”.
اتولدت على ضفاف النيل في الدقي سنة 1918، على الطراز الفرنسي اللي كان بيحبه صاحبي الأول “محمد محمود خليل باشا”. وده كان راجل مثقف وعاشق للجمال، درس القانون في السوربون في فرنسا، وهناك قابل “إيميلي”؛ بنت بسيطة بتعزف موسيقى، وقع في حبها واتجوزها، ورجع بيها مصر. وساعتها قرر يبنيني علشان أكون بيتها.. وبيت الفن.
في جدراني هتشوفوا العالم كله، بس من ناحية فنية.. كل لوحة، كل تمثال، ليه قصة.. وليه نفس.
هتلاقوا عندي مونيه، فان غوخ، ديجا، وبيسارو، وغيرهم كتير من كبار الفنانين اللي شكلوا ملامح المدرسة التأثيرية، والمدرسة دي كانت عشق محمود خليل وحرمه، وكانوا بيجمعوا أعمالها كأنهم بيجمعوا لحظات حب.
أنا مش مجرد قصر.. أنا تحفة فنية من جوا ومن برا! من أول ما تدخلوا، هتقابلكم الأسقف المدهونة أبيض، والزخارف المدهبة اللي بتحكي فخامة زمن راح، والسلم الرخامي الأبيض اللي بيتدلّى فوقه ثريا عملاقة. وعند أول خطوة، هتشوفوا بيانو كبير كانت بتعزف عليه “إيميلي” بنفسها، تحته النور الدافئ، وفوقه السقف العالي المفتوح على الدورين.
جوايا أكثر من 870 عمل فني بين لوحات وتماثيل ومزهريات ومنحوتات. وعندي كمان قاعة اسمها “أفق واحد”، من أكبر القاعات في الشرق الأوسط، مخصصة للعروض الفنية المصرية والعربية، ومساحتها 340 متر.
عارف إن كتير منكم سمعوا عني بسبب “زهرة الخشخاش” اللي اتسرقت من على جدراني ويومها كنت حزين بجد! اللوحة دي كانت من أعمال فان غوخ، ولسه الإنتربول بيحقق من سنين.
بس أنا لسه مليان جمال.. عندي زنابق مونيه الشهيرة، ولوحات عن الطبيعة والزهور والفلاحين، فيها نفس الحياة اللي كانت بتنبض في قلب محمود خليل وإيميلي.

والجميل إن زيارتي مش مكلفة أبداً.. الكبار في السن والأطفال وذوي الهمم يدخلوني مجاناً، والطلبة بـ10 جنيه بس، والباقي بـ30 جنيه. يعني الفن هنا شبه مجاني، بس الإحساس اللي هتخرجوا بيه.. لا يتقدر بتمن.
أنا متحف محمود خليل وحرمه.. بيتي مفتوح لكل اللي بيحبوا الفن، ولكل اللي لسه فاكرين إن الجمال هو أكتر حاجة بتخلي الحياة تستحق.