The Definitive Guide to Living in the Capital , Cairo , Egypt

عربية كيوت ظهرت أخيرًا في شوارع الجيزة كخطوة رسمية في خطة استبدال التوكتوك بمركبات آمنة وحضارية. وده خلى ناس كتير تسأل: سعرها كام؟ الدعم قد إيه؟ والدفع بالتقسيط متاح ولا لأ؟ هنا هتلاقي كل التفاصيل بشكل واضح ومختصر، من أول منظومة الإحلال لحد المواصفات الكاملة للعربية الجديدة.

عربية كيوت ضمن منظومة إحلال التوكتوك

بعد ظهور عربية كيوت كبديل حضاري للتوكتوك، أعلنت محافظة الجيزة إن المنظومة الجديدة هدفها تبسيط إجراءات الاستبدال وتقديم دعم مالي يشجع السائقين على التحويل للموديل الجديد الأكثر أمانًا وتنظيمًا.

تيسيرات الدفع ضمن منظومة الإحلال

محمد مرعي، السكرتير العام المساعد لمحافظة الجيزة، أكد توفير برامج تمويل ميسر بالتعاون مع البنوك الوطنية، جهاز تنمية المشروعات، برنامج مشروعك، وشركات تمويل مختلفة. والهدف إن السائق يدخل التوكتوك القديم في المنظومة، ياخد أعلى قيمة سوقية له، ويسدد فرق السعر على أقساط شهرية مريحة.

سعر عربية كيوت 2025

سعر عربية كيوت داخل منظومة الإحلال هو 200 ألف جنيه. وبعد ما المالك يكمل الترخيص ويحصل على رخصة التسيير من المرور، بيستفيد من:
• استرداد 10 آلاف جنيه كاش باك.
• 1000 جنيه إضافية كمساهمة تحفيزية في إجراءات الترخيص.

يعني إجمالي الحوافز يوصل لـ 11 ألف جنيه دعم مباشر.

مايفوتكش كمان:

تجديد رخصة السيارة إلكترونيًا 2025.. الشروط والخطوات والمستندات المطلوبة

 

أماكن بدء تنفيذ المنظومة

بدأت المرحلة الأولى في أحياء الهرم والعجوزة، ومدن 6 أكتوبر وحدائق أكتوبر. والمحافظة بتقول إنها هتقيم التجربة على الأرض الأول، وبعدين توسع التطبيق تدريجيًا على باقي المناطق لضبط المرور وتحسين مستوى الأمان للمواطنين.

المواصفات الكاملة لعربية كيوت (بديل التوكتوك)
• سعة داخلية لأربع أفراد.
• تتحرك بسهولة في الشوارع الضيقة.
• مدى سير يصل لـ 550 كم (250 كم بنزين + 300 كم غاز طبيعي).
• محرك رباعي الأشواط، سعة 217 سي سي، بقوة 13 حصان.
• السرعة القصوى: 70 كم/ساعة.
• الأبعاد: طول 2752 مم، عرض 1312 مم، ارتفاع 1652 مم.
• قاعدة عجلات: 1925 مم.
• خلوص أرضي: 180 مم.
• تكلفة تشغيل قليلة، وأربع عجلات توفر ثبات أعلى.
• أحزمة أمان، أقفال لحماية الأطفال.
• معتمدة من الهيئة المصرية للمواصفات والجودة.
• مكونات السيارة مطابقة لشهادات E-Mark الأوروبية.
• خطة للوصول إلى 100% تصنيع محلي بالتعاون بين وزارة الإنتاج الحربي وشركة إيتامكو، مع تحديد الأسعار من مجموعة جي بي أوتو، وبحد أقصى 200 ألف جنيه.