The Definitive Guide to Living in the Capital , Cairo , Egypt

لو خطتك فيها زيارة سريعة أو رحلة كاملة لمدينة الإسكندرية الساحرة، يبقى لازم تحط متحف المجوهرات الملكية في أول جدولك. المكان مش مجرد متحف.. ده بيت حكايات وأساطير وقطع فنية عاشت مع ملوك وملكات مصر. ووأنت بتتمشى بين القاعات اللي بتبرق من كل ناحية، هتلاقي نفسك مبهور قدام 3 قطع نادرة ومبهرة من مقتنيات الملكة فريدة.. قطع لها تاريخ، ولهفة، ولمسة إنسان عاش فعلًا داخل القصور الملكية.

في السطور الجاية هتعيش معانا التجربة كاملة: إيه هي القطع، بتتكون من إيه، ليه مبهرة بالشكل ده، ومين كانت الملكة فريدة اللي سابت أثر مش بس في التاريخ، لكن كمان في قلوب المصريين.

متحف المجوهرات الملكية موجود في قصر رائع اتبنى سنة 1919، وكل قاعة فيه بتحس إنها بتهمس بحكايات ناس عاشوا زمان واتغير شكل البلد على إيديهم. أول ما تدخل، هتلاقي المعروضات مش مجرد قطع دهب وماس.. لأ، دي آثار شخصية بتفتح باب لزمن كامل.

هناك، ووسط المقتنيات فيه 3 قطع نادرة من مقتنيات الملكة فريدة، وكل قطعة فيهم تحس كأنها بتتنفس حياة.

أول قطعة: العقد الأسطوري

عقد مدهش! معمول من البلاتين والفضة، ومصمم على شكل مستطيل فخم. جوه التصميم، أحجار الأكوامارين الزرقا كانت عاملة زي لمعة البحر وقت الشروق، ومرصع حواليها ماس برلنتي بيخلي القطعة تلفت النظر من أول نظرة.

العقد مش بس جميل، ده قطعـة بتشرح لك قد إيه الملكات زمان كانوا بيعتنوا بكل تفصيلة، مهما كانت صغيرة.

القطعة التانية: العلبة الملكية

علبة مستديرة الشكل، معمولة من العقيق والذهب. على الغطا بتاعها صورة للملكة فريدة نفسها، وبيعلو الصورة تاج وهلال من البلاتين، مرصعين بماس صافي.

القطعة فيها طاقة من جمال هادي.. تحس إن الملكة كانت بتمسكها كتير، أو يمكن كانت واحدة من مقتنياتها اللي بتحبها لأنها ببساطة شيك ومختلفة.

القطعة التالتة: حلق النجفة

أما القطعة اللي خدت أكبر قدر من انبهارنا، فهي حلق مصنوع من البلاتين ومرصع بحبات ماس على شكل نجفة صغيرة! تصميمه دقيق لدرجة تخليك تقرب وشك من الزجاج علشان تشوف التفاصيل الدقيقة.

قطعة تجمع بين الأنوثة والرقة والأبهة الملكية في نفس اللحظة.

ما يفوتكش كمان: فيه أكتر من 11 ألف قطعة ذهبية.. 7 معلومات عن “قصر المجوهرات الملكية” بالإسكندرية

مين هي الملكة فريدة؟

قبل ما تخرج من المتحف، يمكن ييجي في بالك سؤال: مين كانت السيدة اللي امتلكت كل الجمال ده؟ الملكة فريدة، واسمها الحقيقي صافيناز ذو الفقار، اتولدت في 5 ديسمبر 1921 في حي جناكليس في اسكندرية. كانت بنت من عيلة راقية ومعروفة، واتجوزت الملك فاروق سنة 1938 في واحدة من أكتر حفلات الزفاف اللي مصر كلها اتكلم عنها وقتها.

أنجبت الأميرات فريال وفوزية وفادية، وكانت محبوبة بشكل كبير من الناس بسبب بساطتها ورقتها واحترامها للجميع. وبعد حياة مليانة أحداث، رحلت عن عالمنا يوم 15 أكتوبر 1988… لكن لسه في ناس كتير بتعتبرها رمز للأنوثة والجمال الهادئ.

العنوان والمواعيد وطرق التواصل

عنوان متحف المجوهرات الملكية: 27 أحمد يحيى، سان ستفانو، أول الرمل، الإسكندرية.

تليفون: 035828348.

المواعيد: من 9 صباحا لحد 5 مساء.