The Definitive Guide to Living in the Capital , Cairo , Egypt

مش كل احتفالات رأس السنة لازم تكون في القاهرة. لو مخطط تقضي بداية 2026 بره الزحمة، محافظات مصر بتقدم اختيارات مختلفة تجمع بين الفن، التراث، والموسيقى، فيه أماكن مفتوحة ومسارح ثقافية ومواقع أثرية. من عروض الفنون الشعبية في أسوان، لسهرات موسيقية راقية في الإسكندرية، وتجارب ترفيهية على البحر في الغردقة، جمعنالك خريطة أهم احتفالات رأس السنة 2026 خارج القاهرة عشان تختار اللي يناسبك وتستقبل السنة الجديدة بطريقتك.

احتفالات مسرح ليالي الفن على كورنيش النيل في أسوان

محافظة أسوان بتستقبل العام الجديد باحتفالات فنية مميزة على مسرح ليالي الفن، المقام على كورنيش النيل، من خلال فعاليات مستمرة لمدة 6 أيام بداية من 25 ديسمبر وحتى نهاية الشهر. العروض بتقام على مسرح فوزي فوزي، وبتشارك فيها فرق الهيئة العامة لقصور الثقافة من محافظات مختلفة.

الاحتفالات بتركز على الموسيقى والاستعراضات اللي بتعكس التراث والفنون الشعبية المصرية، في أجواء مفتوحة على النيل بتجمع أهالي أسوان والزوار في تجربة ثقافية مختلفة لبداية السنة.

فنار الإسكندرية يعود للحكاية داخل قلعة قايتباي

في الإسكندرية، الاستعدادات لرأس السنة 2026 مش مجرد احتفال، لكنها تجربة ثقافية وتاريخية متكاملة داخل قلعة قايتباي. القلعة شهدت افتتاح مركز الزوار الجديد، اللي بيضم لوحات إرشادية وشاشة عرض كبيرة بتقدم فيلم وثائقي لأول مرة عن الآثار الغارقة بجوار القلعة.
الفيلم بيكشف مشاهد حقيقية لأحجار جرانيتية ضخمة كانت جزء من فنار الإسكندرية القديم، وبعضها استخدم لاحقًا في بناء القلعة، والباقي ما زال غارق تحت مياه البحر. بجانب ده، عروض الصوت والضوء مستمرة يوميًا في تمام 6:30 و7:30 مساءً، وبتحكي تاريخ المدينة من تأسيسها لحد العصر الحديث، مع تطوير شامل للخدمات وتذاكر إلكترونية تسهل الزيارة.

مايفوتكش كمان: حفلات رأس السنة 2026 في مصر: خريطة السهرات الغنائية وأسعار التذاكر وأماكن الحفلات

كالتشر كافيه يحتفل برأس السنة في أكتر من محافظة

مشروع كالتشر كافيه الثقافي التابع لوزارة الثقافة المصرية بيقدم تجربة مختلفة لليلة رأس السنة من خلال 3 احتفالات فنية في محافظات مختلفة. الفعاليات بتهدف لتقديم محتوى فني هادف يناسب الأسرة المصرية، ويجمع بين الموسيقى، الحوار، والعروض الثقافية، في أجواء بتوازن بين الترفيه والمعنى.

أوركسترا الواحة على مسرح الأنفوشي في الإسكندرية

ضمن فعاليات كالتشر كافيه، مسرح قصر ثقافة الأنفوشي في الإسكندرية بيستضيف سهرة موسيقية راقية يوم 31 ديسمبر، تحييها أوركسترا الواحة بقيادة المايسترو محمد وهيدي، بمشاركة الموسيقار ماجد سرور، مع فقرة غنائية للفنانة مريم نوح.
البرنامج كمان بيشمل لقاء تفاعلي بعنوان مش للرجال فقط، يقدمه الإعلامي سعيد جميل، في تجربة فنية مختلفة تجمع بين الموسيقى والنقاش.

ليالي ضحك وتراث على مسرح الغردقة

في محافظة البحر الأحمر، مسرح قصر ثقافة الغردقة بيقدم احتفالات رأس السنة يومي 30 و31 ديسمبر، بعروض فنية متنوعة. البرنامج بيجمع بين استعراضات فرقة التنورة والآلات الشعبية، والعرض المسرحي الكوميدي هاني نيو يير، بمشاركة علاء زينهم، حسن عبد الفتاح، ورضا إدريس، في أجواء خفيفة تناسب العائلات ومحبي الضحك.

سحر الجنوب في عروض الفنون الشعبية بأسوان

الجنوب له طقوسه الخاصة في الاحتفال، وده بيبان في عروض الفنون الشعبية اللي بتقام على مسرح فوزي فوزي بأسوان من 25 حتى 31 ديسمبر. العروض بتقدم استعراضات متنوعة تعكس ثقافات محافظات مصر المختلفة، وسط أجواء مستوحاة من النيل وأصالة الجنوب، وبتخلي استقبال السنة الجديدة تجربة مليانة روح وبهجة.

وأخيرًا..

رأس السنة 2026 في محافظات مصر فرصة حقيقية لتجربة مختلفة بعيدًا عن زحمة القاهرة. سواء كنت بتحب الموسيقى الراقية، العروض التراثية، أو التجارب الثقافية في أماكن تاريخية، الخريطة دي بتقدملك اختيارات متنوعة تخلي بداية السنة الجديدة ليها طعم خاص.