The Definitive Guide to Living in the Capital , Cairo , Egypt

مفيش أجمل من التمشية في شارع المعز وقت الغروب، بس الجمال الحقيقي دايمًا بيستخبى في التفاصيل والحواري الجانبية، النهاردة كايرو 360 أخدت جولة استكشافية وراحت لـ”حارة السنانيري”، وتحديدًا جنب مسجد الأقمر، علشان نكتشف مكان بيخطف القلب من أول نظرة، مكان اسمه “هوانم بيت العز” وهنقولكم على تفاصيله في السطور اللي جاية.

المكان ده مش مجرد جاليري أنتيكات، ولا مجرد صفحة على فيسبوك؛ ده آلة زمن بترجعك لبيوت أهالينا زمان، لريحة القهوة اللي بتتعمل على السبرتاية، ولمعة النحاس اللي كانت بتنور الصالونات، “هوانم بيت العز” بيحيوا التراث بلمسة شياكة.

من الهندسة للأنتيكات

رغم أن خلود العطار مؤسسة هوانم بيت العز مهندسة معمارية إلا أنها حولت الشغف الهندسي لحكاية تراثية بلمسة شخصية جدًا، وقررت إنها مش عايزة حياتها تكون مجرد روتينية بين الشغل والبيت والأولاد والمذاكرة، فقررت تدور على روح المكان وبدأت تجمع قطعة ورا قطعة، “إبريق نحاس قديم، هون بختم الملكية”، لحد ما المجموعة كبرت، والشغف تحول لمسؤولية، السؤال اللي طرحته خلود كان بسيط وعميق، “ليه الجمال ده يفضل مستخبي؟”، ومن هنا جت فكرة “هوانم بيت العز”، جاليري مفتوح لكل عشاق الأصالة، هدفه “الفرجة والاستمتاع” قبل البيع والشراء.

كنوز نحاسية مش مجرد ديكور

هوانم بيت العز بيقدموا قطع بتحكي حكايات وكل قطعة ليها “شخصية”. إحنا مش بنتكلم عن ديكور تجاري، والقطع فريدة وكل قطعة بتبرز حاجة فريدة ومختلفة:

أباريق نادرة: موديلات “أفشوني” و”محلاوي” اللي صعب تلاقيها بحالتها الأصلية دلوقتي.

الهون التراثي: تشكيلة بتجمع بين الهون السوري، التركي، العثماني، وحتى العراقي.. كل واحد له رنة ونقشة مختلفة.

إضاءات زمان: شمعدانات، بواجير، ونجف إسلامي بيعمل جو (Mood) ملوش مثيل في البيت.

قطع لهواة التميز: زي الشغل “الشفتشي” (سلوك نحاس ملحومة بفضة)، والشغل الإيراني والأرشومي الدقيق جدًا.

والقاعدة عندهم ثابتة: “الحاجة اللي بتشوفها كتير في السوق.. ماتبقاش أنتيكة”.

كل قطعة لوحة

كل قطعة بتترمم بحب الفن في مواجهة الزمن، والمميزة هو التعامل مع القطع القديمة لأن الموضوع مش مجرد تلميع، فيه فريق فني بقيادة “عم سعيد” خريج الفنون الجميلة، بيتعامل مع كل قطعة كأنها لوحة، ولو القطعة محتاجة ترميم بسيط، بتتعالج بحرفية عشان متفقدش قيمتها، ولو القطعة سادة ومحتاجة روح، بيتم إضافة نقوش يدوية مدروسة بتحولها لتحفة فنية، عشان تناسب الذوق العصري وفي نفس الوقت تحافظ على هويتها التاريخية.

تجربة “هوانم بيت العز” أكتر من مجرد شراء، وزيارة الجاليري في حد ذاتها “خروجة”، المكان مصمم إنه يكون مساحة للراحة النفسية في قلب دوشة القاهرة، تقدر تروح هناك، تتمشى وسط التحف، تسمع حكاية كل قطعة، وممكن جدًا تشرب قهوة مظبوطة معمولة على السبرتاية وتعيش جو مثالي مش هتلقاه في مكان تاني.

وعلى الرغم من فخامة القطع وكونها “أنتيك”، إلا أن الأسعار هناك بتراعي جداً الظروف الاقتصادية وبتحاول تكون في المتناول، وفيه قطع (زي هدايا بسيطة) بتبدأ من 100 جنيه، والأسعار بتتحدد بناءً على وزن النحاس وندرة القطعة، والأهم إنهم بيوفروا شحن لكل محافظات مصر.

المشروع ده مش بس بيزنس، ده كمان دعم حقيقي لـ “صنايعية” منطقة الجمالية، بيشجعهم يطلعوا أحلى ما عندهم ويحافظوا على مهنة بتنقرض.

العنوان: شارع المعز لدين الله الفاطمي – حارة السنانيري (الشارع الجانبي لمسجد الأقمر مباشرة) – بجوار مركز الربع الثقافي.

تقدروا تعرفوا أكتر عنهم من خلال صفحة الفيسبوك من هنا.