The Definitive Guide to Living in the Capital , Cairo , Egypt

لو بتحب القصص المصورة، أو مهتم بالرسم والتصميم، أو حتى نفسك تكتشف عالما مختلفا من الحكايات والفن، عندك فرصة حلوة في القاهرة خلال أيام قليلة. مهرجان كايروكوميكس راجع من جديد بدورته الـ11، في الفترة من 13 لـ15 نوفمبر 2026، في مركز محمود مختار الثقافي بالجزيرة، والدخول مجاني.

المهرجان اللي بينظمـه فريق الفن التاسع، بقى واحد من التجمعات المهمة لمحبي القصص المصورة وصناعها في مصر والمنطقة العربية، وبيجمع على مدار 3 أيام فنانين ورسامين وناشرين وقراء، في مساحة بتحتفي بفن الحكي من خلال الصورة والرسم.

إيه اللي مستنيك في مهرجان كايروكوميكس في دورته الـ11؟

الدورة الجديدة من كايروكوميكس فيها مجموعة متنوعة من الفعاليات، سواء كنت من متابعي القصص المصورة أو لسه بتكتشف العالم ده.

من أبرز الفعاليات سوق الكوميكس (Comic Souk)، اللي بيجمع دور النشر والمكتبات وصناع القصص المصورة المستقلين في مكان واحد، وده هيديك فرصة تتعرف على إصدارات جديدة، وتشوف أعمال مختلفة، وتكتشف أسماء وتجارب فنية تستحق المتابعة.

كمان فيه ساحة المستقلين (Indie Square)، وهي مساحة مخصصة للفنانين وصناع القصص المصورة المستقلين لعرض أعمالهم ومطبوعاتهم الفنية، والتواصل مباشرة مع الجمهور.

ولو بتحب تتعرف على تجارب الفنانين وتسمع منهم، فالمهرجان هيقدم 3 ورش عمل ولقاءات يوميا، بالإضافة إلى لقاءات فنية وتوقيعات للفنانين على أعمالهم.

معارض ولقاءات مع فنانين من مصر والعالم

المعرض الرئيسي في الدورة الـ11 هيضم أعمال الفنانين المشاركين في جائزة محمود كحيل، وده بالتزامن مع الاحتفاء بتنوع تجارب القصص المصورة في المنطقة العربية والعالم.

ومن الفعاليات اللافتة اللي أعلن عنها المهرجان، لقاءات وعروض لأعمال مصرية وعربية، من بينها تقديم كتاب «باتمان حلوان» للكاتب طارق إمام، وسلسلة «النداهة» للفنانة سلمى صالح.

كمان الدورة دي بتستضيف الكاتب الألماني ساشا هومر، ومجلة Strapazin السويسرية المتخصصة في القصص المصورة، في حضور بيضيف للمهرجان بعد دولي وفرصة للتعرف على تجارب مختلفة في فن الحكي البصري.

جائزة محمود كحيل ضمن فعاليات المهرجان

من المحطات المهمة في الدورة الجديدة كمان حفل توزيع جائزة محمود كحيل، اللي بينظمها مركز رادا ومعتز صواف لدراسات الشرائط المصورة العربية بالجامعة الأميركية في بيروت.

الجائزة بتحتفي بالمبدعين في مجال الكاريكاتير والقصص المصورة والرسوم التوضيحية، وبتسلط الضوء على المواهب والتجارب العربية في المجال ده.

وجود الجائزة ضمن فعاليات كايروكوميكس بيدي المهرجان فرصة أكبر للاحتفاء بالفنانين وصناع المحتوى البصري، وبيخلي الزيارة مش مجرد فرصة لمشاهدة القصص المصورة، لكن كمان للتعرف على تطور الفن ده في المنطقة.

مواعيد ومكان مهرجان كايروكوميكس 2026

لو قررت تزور المهرجان، دي أهم التفاصيل اللي محتاج تعرفها قبل ما تتحرك:

– التاريخ: من الجمعة 13 نوفمبر لحد الأحد 15 نوفمبر 2026.
– المكان: مركز محمود مختار الثقافي، منطقة الجزيرة، أمام دار الأوبرا المصرية.
– أقرب محطة مترو: الأوبرا.
– مواعيد الفعاليات: تبدأ من الساعة 12 ظهرا، والتوقيت المعلن في التقويم الرسمي للمهرجان يمتد حتى 10 مساء.
– سعر التذكرة: الدخول مجاني.

سواء كنت من عشاق الكوميكس أو بتحب الرسم والفنون البصرية، كايروكوميكس فرصة تقضي فيها وقت مختلف، وتكتشف فنانين جدد وأعمال مش بتشوفها كل يوم، والأحلى إنك تقدر تستمتع بالتجربة من غير ما تدفع تذكرة دخول.