The Definitive Guide to Living in the Capital , Cairo , Egypt

أفلام

رعب وحُب وإثارة.. 4 أفلام يستحقوا المشاهدة في سينمات القاهرة

أفلام تستحق المشاهدة أفلام جديدة في السينما سينمات القاهرة فيلم الجريمة فيلم قمر 14
رعب وحُب وإثارة.. 4 أفلام يستحقوا المشاهدة في سينمات القاهرة
    بواسطة
    Cairo 360

    أفلام جديدة قوية استقبلتها السينمات في القاهرة الفترة اللي فاتت.. تعالوا نستعرض معاكم إيه هي أهم الأفلام دي وبتحكي عن إيه.

     

    Scream

    أبناء التسعينيات، اللي حوشوا مصروفهم علشان يشتروا أفلام فيديو، عارفين كويس يعني إيه سلسلة أفلام Scream. يعني السلسلة اللي استنزفت مصروفنا ووقتنا – وطبعًا إحساسنا بالأمان- علشان نتفرج على المقنع الغامض اللي بيقتل ضحاياه بالسكين بدم بارد. والنهارده وبعد سنين طويلة رجعت لنا السلسلة تاني مع الجزء الخامس ومغامرة جديدة في محاولة للوصول لهوية القاتل الملثم.

     

    فيلم Scream من إخراج مات بيتينيلي أولبين وتايلر جيليت وبطولة كورتني كوكس و نيف كامبل.

     

    قمر 14

    ومن الأجنبي للعربي، ومن الرعب للرومانسية من خلال مجموعة من القصص المتشابكة اللي بيجمعها حاجتين: ظهور (قمر ١٤) في سماء مصر، والحب اللي بيغير أحوال أبطال الفيلم وبيقودهم لاختيارات مصيرية في حياتهم.

    قمر ١٤ فيه مجموعة ممتازة من النجوم زي أحمد الفيشاوي وخالد النبوي وغاده عادل وياسمين رئيس وأسماء أبو اليزيد وغيرهم. ومع إخراج هادي الباجوري بنتوقع نكون قدام عمل تقيل ومختلف.

    و.. آه.. بالنسبة للبنات اللي بعتت تسألنا هل الفيلم اتسمى (قمر ١٤) علشان خالد النبوي فيه؟ لا للأسف مش ده السبب : )

     

    The 355

    بما أننا بنتكلم عن البنات. فيلم The 355 يعتبر فيلم نسائي باقتدار. بيحكي عن مجموعة جاسوسية نسائية بتقرر توحد جهودها علشان تواجه خطر مجهول بيهدد العالم كله.

    فيلم The 355 من بطولة جيسيكا شاستاين ولوبيتا نيونجو وديان كروجر ومن إخراج سايمون كينبيرج. ولما تشوفوا إعلان الفيلم هتحسوا أنه عن مجموعة ستات بتتحد علشان تضرب مجموعة رجالة أشرار.. لكن نتوقع أن الفيلم يكون فيه جرعة إثارة وتشويق لا يستهان بيها.

    الجريمة

    وعلشان بنحب دايمًا نسيب الأحلى للآخر.. فيلم الجريمة من تأليف وإخراج شريف عرفة. وبطولة أحمد عز ومنه شلبي وماجد الكدواني. وواضح من اسم الفيلم وقصته اللي بتحكي عن مجرم بيهرب من مصحة نفسية، أن فيه أكشن وتشويق وغموض كبير مستنينا، مع (سيكا) رعب حسينا بيها وإحنا بنتفرج على التريلر.

     

    اختاروا هتتفرجوا على إيه.. وشاركونا اختياراتكم على السوشيال ميديا… مشاهدة ممتعة.

    مقترح