The Definitive Guide to Living in the Capital , Cairo , Egypt

أفلام

من الأسوأ للأفضل.. قائمة كايرو 360 لأفلام عيد الفطر 2022

أفلام العيد فيلم العنكبوت فيلم زومبي فيلم واحد تاني موسم عيد الفطر 2022 نقد أفلام عيد الفطر
من الأسوأ للأفضل.. قائمة كايرو 360 لأفلام عيد الفطر 2022
    بواسطة
    Cairo 360

    كُنا  متوقعين أن فترة الـ 30 يوم الخاصين بشهر رمضان، كافيين أنهم يحفزوا صناع الأفلام أنهم يعَيدوا علينا بعيدية مُحترمة من الأفلام القوية والمميزة، واللي بنستناها في موسم عيد الفطر من السنة للسنة. لكن من وجهة نظرنا كل الأفلام في موسم العيد كانت أقل من المتوقع. وده ما يمنعش أننا نقدم لكم قائمتنا الخاصة، لأعمال العيد، وهي مترتبة من الأسوأ للأفضل.

    زومبي

    زومبي في رأينا هو أضعف أفلام موسم عيد الفطر 2022 بلا منازع. والسبب الأساسي في السبب ده هو عدم رغبة أي حد من أبطال الفيلم في بذل أي مجهود إضافي عن اللي بيعملوه في مسرح مصر أو باقي أعمالهم. وعلى رأسهم علي ربيع وحمدي الميرغني، اللي فعلًا بيظهروا بشخصياتهم التقليدية في مسرح مصر بدون أي تطوير.

    وليه يطوروا لو قصة الفيلم نفسها مافيهاش أي جديد. عن مجموعة من الزومبي بتطارد مجموعة أشخاص، وبينتج عن المطاردة دي مواقف المفترض أنها كوميدية!

    نوعية الكوميديا نفسها في الفيلم كانت ضعيفة وكلها معتمدة على الإيفيهات، وكان أولى بفيلم (زومبي) أنه يكون مسرحية من مسرحيات مسرح مصر، أو حلقة واحدة في مسلسل كوميدي منفصل الحلقات.

     

    واحد تاني

    فيلم واحد تاني من بطولة أحمد حلمي، يستحق المكانة اللي بياخدها الإبن الأوسط في العيلة.. هو مش مبسوط ومتدلع زي الأخ الأصغر، ومش بيتبص له أنه (راجل البيت) زي الإبن الأول.

    واحد تاني هو أكيد أفضل من (زومبي)، بما أن الفيلمين بينتموا لمنطقة الكوميديا. لكن أكيد برضه مش متعوب عليه زي (العنكبوت). خاصة أن حلمي خذل جمهوره التقليدي بسلسلة من الإيفيات غير المناسبة للمشاهدين المحافظين. وممكن تقروا مراجعتنا الكاملة للفيلم من هنا

     

    العنكبوت

    أفضل أفلام موسم عيد الفطر 2022. لكن علشان نكون واضحين، هو مش أفضل فيلم عربي في 2022 ومش الأفضل لأحمد السقا. لكنه (أحسن الوحشين) في موسم سينمائي مش قوي بالأساس.

    أحمد السقا هو (العنكبوت).. شخصية غامضة عندها ثأر مع عائلة بتشتغل في الجريمة المنظمة. بتتقاطع الطرق بينه وبين منى زكي علشان تبدأ حالة من الصراع الدموي بين كل الأطراف.

    مستوى الكوميديا في (العنكبوت) كان أحسن من (زومبي) رغم أن الأخير فيلم كوميدي بالأساس، والعنكبوت فيلم أكشن بالأساس. لكن عجبنا الخيط الكوميدي اللي اتكتب لمنى زكي وأدائها للشخصية. كمان السقا عمل دور أكشن كويس بعيد عن (الأفورة) اللي اشتهر بيها في أدواره الأخيرة، كل ده بفضل المخرج أحمد نادر جلال وتوظيفه لأدواته كمخرج بشكل ممتاز.

    هي دي قائمتنا لأفلام عيد الفطر 2022.. ونتمنى موسم عيد الأضحى يكون أقوى، وبالتأكيد هنتابع معاكم بمجرد ما نعرف إيه هي الأعمال المتوقع صدورها في الموسم ده.

    مقترح