The Definitive Guide to Living in the Capital , Cairo , Egypt

بعد ما كانت عمليات الشراء عن طريق الموبايل مقتصرة على طلب الوجبات
السريعة، دلوقتي تقدر كمان تطلب الدواء بتاعك أو الروشتة الخاصة بك كاملة من
موبايلك (الذكي طبعًا) عن طريق “أجزخانة موبايل”.

أجزخانة موبايل هي أساسًا جزء من “أجزخانة. كوم” وهو موقع
لصيدلية افتراضية أطلقها بعض شباب الصيادلة عقب تخرجهم عام 2008، وكعادة أي مشروع
بدأ صغير بـ3 أشخاص ودلوقتي فيه 10 ويعتبر هو الأول من نوعه في الشرق الأوسط لأنه
بـ يؤسس لخدمة البيع عبر الهواتف النقالة.

الخدمة الجديدة ابتكرها مهندس الإلكترونيات شريف شبانة في آخر مايو لشركة
أجزخانة اللي بـ يديرها أخوه أحمد (صيدلي) وهي متوفرة باللغتين العربية
والإنجليزية على هواتف “آي فون” و”آي بود” وقريب هتكون متوفرة
على “بلاك بيري” و”أندرويد” كمان.

الفكرة ببساطة أنك بـ تحمل التطبيق أو البرنامج الخاص
بـ”أجزخانة” على موبايلك في خلال دقيقة، وبعدها بـ تشوف كل المنتجات
المعروضة للبيع من أدوية ومستحضرات تجميل وعطور وكل اللي ممكن تلاقيه في أي صيدلية
وكأنه معرض لصور المنتجات وأسعارها.

عايز تشتري؟ هتفتح حساب (Account) وتسجل بياناتك زي اسمك وعنوانك وتليفونك
وإيميلك وتاريخ ميلادك، وبعدين تبدأ تحط الحاجة اللي عايزها في عربية التسوق Add to Cart
وتبعتها علشان تجي لك على العنوان اللي أنت فيه، طلبيتك هيكون لها
رقم علشان تقدر تسأل عليه لو اتأخر.

الخدمة دي كلها ببلاش سواء تحميل البرنامج على موبايلك أو إرسال الطلب. مش
هـ تدفع حاجة غير سعر المنتج اللي أنت طلبته، حتى مفيش فلوس لخدمة التوصيل. لكن
ممكن مثلاً (من تجربتنا) تلاقيه باعت لك منتج كان مكتوب سعره 15 جنيه وبـ يقولك
ادفع 22 جنيه علشان معاه منتج إضافي وعليه أوفر.

أجزخانة متعاقدة مع صيدليات كثير في كل أحياء القاهرة وحتى المحافظات الثانية
علشان توصل لك طلباتك فين ما تكون إن شالله بخدمات البريد أو التوصيل السريع.

خلال أول أسبوعين من إطلاق البرنامج في “آبل ستور” على
الموبايلات، أجزخانة موبايل اتحملت على 2500 تليفون منهم 1700 في مصر والباقي في
السعودية وأمريكا زي ما قال أحمد شبانة مدير أجزخانة اللي بيطمح في الانتشار في
الخليج وتركيا.

أجزخانة موبايل بتوفر لك كمان إمكانية الاحتفاظ بروشتاتك الطبية على
موبايلك علشان تكون معاك في أي مكان وما تضيعهاش، تستقبلها من الدكتور بتاعك
وتبعتها Forward للأجزخانة في رسائل قصيرة sms
الاشتراك فيها بـ يكون بـ10 دولار لكل 150 رسالة، أما بالنسبة للدكاترة فالخدمة
بتكون ببلاش بعد التأكد من هوية الدكتور طبعًا.

البرنامج بـ يوفر لمستخدميه كمان عمل مقارنات لأسعار الأدوية البديلة
واختيار الأرخص أو الأنسب بما يناسب الشرائح الاجتماعية المختلفة وبـ يعرفهم أنواع
الأدوية المتاحة في السوق دلوقتي.

وممكن كمان تشوف تفاعل الأدوية اللي بتاخدها مع بعض وإذا كان فيه تعارض ما
بينها بما يضر بصحتك من خلال خاصية قياس التفاعل أو Interaction Checker. 

بعض الخدمات دي ممكن تلاقيها على أجزخانة موبايل لما تدخل على www.agzakhana.com لو عندك آي فون دور على الـ
Application ونزلها وجرب.