The Definitive Guide to Living in the Capital , Cairo , Egypt

الحياة في كايرو

أهم 5 تطبيقات رمضانية لازم تكون على تليفونك

أندرويد برامج تطبيقات رمضان
أهم 5 تطبيقات رمضانية لازم تكون على تليفونك
بواسطة
Omar Abd-elmaqsoud

رمضان في كل حالاته وأوقاته مختلف عن أي شهر في السنة، مختلف في طقوسه ويومه وأحداثه وأكلاته وروحانياته وسهراته، حتى عدد ساعات يومه بتحسها بتعدي بسرعة غريبة، وعلى الرغم من إننا طول السنة تقريباً بنحسب الأيام والشهور عن طريق التقويم الميلادي، ومش بنبص للتقويم العربي أو الهجري إلا في حالات أو مناسبات ومواسم قليلة وبتيجي من السنة للسنة، وفي الأغلب بيكون رمضان وانتظار العيد هما السبب.

ولإن رمضان مميز ومختلف لازم مايضعش مننا كده، ونعرف ننظم أيامه اللي في معظمها بتجري مننها ومش بنعرف نلحقها، وعلشان كده، جبنالكم النهارده في (كايرو 360) أهم 5 تطبيقات على الموبايلات خاصة برمضان وأحداثه وطقوسه، وبتشتغل على نظامين “الأندرويد” و” IOS “.. تعالوا نتعرف عليهم، ونختار منهم اللي يناسبنا:

التطبيق الأول معانا هوه “زاد الصائم” .. ونسخته الموجوده بالإسم ده هتلاقوها على IOS بس، لكن ليه إسم تاني على أندرويد وهوه  “حقيبة الصائم في رمضان”.

التطبيق رمضاني جداً، وبيقدم مجموعة من الخدمات المميزة بتوجهك للحاجات اللي المفروض تاخد بالك منها أو تعملها وانت صايم أو بعد الفطار، ده غير الأوراد والأدعية المستمرة اللي بيعرضها التطبيق من خلال أيقونة “أذكار يومية” الموجودة في التطبيق.

كمان التطبيق مخصص جزء مهم للبنات والستات في أقسامه تحت اسم “المرأة في رمضان” وده بيقدم مجموعة كبيرة من الحاجات الخاصة بالستات واللي ممكن يعملوها في رمضان، ده غير مجموعة كبيرة من الخلفيات الإسلامية الرمضانية، و تذكير بأهم الأحداث اللي حصلت في رمضان.

التطبيق التاني هوه ختمة “Khatma” .. وهيساعدك جداً على ختم قراءة القرآن الكريم خلال شهر رمضان، وده عن طريق التذكير بالورد اليومي من القراءة اللي انت هتحدده، سواء في الكمية اللي انت هتقدر تقرأه من القرآن يومياً، أو من خلال تحديد المدة اللي انت عايز تخلص فيها الختمة وهوه هيحسب لك الكمية اللي المفروض تقرأها يومياً.

التطبيق فيه مصحف واضح وجودته عالية، وكمان ممكن تختار طريقة التنبيه المناسبة ليك، سواء عن طريق منبه صوتي، أو عن طريق مسج على شاشة الموبايل، ده غير كمان إنك ممكن تعمل “شير” للجزء اللي انت قرأته خلال اليوم.

التطبيق متوفر على نظامين الأندرويد و IOS.

التطبيق اللي بعد كده هو تطبيق “ذكرني – Thakerni ” وبيقدم تقريباً كل الأذكار والأدعية الموجودة في كتاب حصن المسلم وكمان بشكل مسموع أو صوتي، زي أذكار الصباح والمساء وأذكار السفر وأذكار الصلاة وأذكار الحج والعمرة وأذكار المرض… إلخ، وده بيساعد كتير في المحافظة على الأذكار بشكل يومي.

ذكرني – Thakerni موجود على منصات الأندرويد والـ IOS.

التطبيق الرابع مهم جداً لكل ستات البيوت في رمضان، وهو تطبيق “أطيب الطبخات لشهر رمضان“.. وطبعاً من إسمه هو تطبيق متخصص في عالم الطبخ للشهر ده بالذات.

ولإن شهر رمضان هوه شهر العزومات، فهتلاقي دايماً التطبيق ده مهم ومفيد جداً ومعاكي سواء في فطار أو سحور، لكن مشكلة التطبيق ده إنه مش متوفر غير على الأندرويد بس، لكن ممكن جداً تلاقوا بديل ليه على نظام IOS اسمه Cookpad.

Cookpad فيه شوية مميزات أكتر من “أطيب الطبخات لشهر رمضان” أولها مثلاً إنه موجود على الأندرويد والـ IOS، ده غير إنه بيقدم حوالي 95 ألف وصفة أكل وطبق مختلف، بيقدمها مجموعة من أشهر طباخين العالم العربي، سواء أطباق رئيسية، أو حلويات زي القطايف والتشيزكيك والبسبوسة، ده غير إن ممكن تعملي “شير” لوصفاتك سواء بالمكونات المكتوبة أو عن طريق الصور والفيديو.

آخر تطبيق معانا النهارده هو “المصلي” .. ومن إسمه أكيد تطبيق مخصص لمواقيت الصلاة، لكن الحقيقة إنه متميز عن معظم التطبيقات الخاصة بمواقيت الصلاة في كذا حاجة فمثلًا غير تصميم شاشاته اللي تحس إنها لوحة فنية بتتغير حسب مواقيت الصلاة، وبتخرج منها أذكار متنوعه ، تطبيق “المصلى” بيعرض مواقيت الصلاة لأكثر من 250 ألف مدينة عالمية، ده غير خاصية “القبلة المرئية” ودي خاصية بتقولك على اتجاه القبلة على الخريطة، والمسافة بينك وبين الحرم والكعبة.

التطبيق متوفر على أنظمة الأندرويد والـ IOS

مقترح