The Definitive Guide to Living in the Capital , Cairo , Egypt

زي ما بنختلف في عاداتنا ولبسنا وحياتنا، بنختلف كمان في شخصياتنا. وصحيح الشخصيات بتكون كتيرة ومتنوعة، بس فيه مشروع بحثي ضخم عمل دراسة على مليون ونص شخص، اتوصل لـ 4 أنواع من الشخصيات بينتمي لهم أغلب الأفراد على كوكب الأرض. والأنواع دي بحسب تقرير نشره موقع صحيفة “إندبندنت” البريطانية هي:

1- العادية

دي من أكتر الشخصيات انتشارًا بين الناس. وبيتميز أصحابها بأنهم متقلبين عصبيًا. وبيسيطر عليهم الخوف أو القلق أو الغضب بسرعة. وعندهم قدرة على الانفتاح، بس بشكل بسيط.

2- المتحفظة

بشكل عام النوع ده بيكون مستقر من الناحية العاطفية، لكنه مش منفتح أو عصبي. بيتميز بإنه عقلاني ومتزن. ومتعاون بشكل كبير. وبيشتغل بضمير وإتقان.

3- الأنانية

الشخصية دي بتتميز بالانفتاح الشديد، لكن ماعندهاش روح التعاون مع الآخرين. وكمان مابتحكمش عقلها في كتير من التصرفات.

4- القدوة

أما النوع ده فأصحابه بيتميزوا بشخصيات نموذجية، وبيتمتعوا بمهارات قيادية قوية. بيتصرفوا بتأني وتفكير في كل المواقف، بغض النظر عن حالتهم العصبية. وعندهم استقرار عاطفي وبيميلوا للانفتاح.

ودلوقتي بقى.. أنت مين من شخصيات البشر؟ جاوب بصراحة