The Definitive Guide to Living in the Capital , Cairo , Egypt

الحياة في كايرو

“القعدة في البيت أجمل”.. 7 أسباب وجيهة لعدم الخروج من بيتك يوم شم النسيم

أجازة شم النسيم أفكار ليوم شم النسيم احمي نفسك يوم شم النسيم الابتعاد عن التجمعات خليك في البيت كورونا والتجمعات
“القعدة في البيت أجمل”.. 7 أسباب وجيهة لعدم الخروج من بيتك يوم شم النسيم
    بواسطة
    Mohamed Talaat

    يوم الاثنين 3 مايو هيوافق شم النسيم، المناسبة اللي ملايين المصريين بيعشقوها وبيعتبروها فرصة حلوة للخروج والاستمتاع بالحياة مع الأهل والأصدقاء.. لكن السنة دي المناسبة جاية في ظروف صعبة، العالم بيواجه فيروس لعين، وهو فيروس “كورونا” المستجد (كوفيد 19)، علشان كده التجمعات الكبيرة –حتى لو كانت داخل البيت- مش في مصلحتنا كلنا.

    ممكن نحتفل بشكل بسيط بشم النسيم داخل البيت، عن طريق الاكتفاء بتلوين البيض مثلًا، أو حتى اعتبار المناسبة فرصة للتأمل والاسترخاء.. وفيه 7 أسباب وجيهة ممكن تخلي القعدة في البيت اليوم ده حاجة مبهجة.

    1 – هتحمي نفسك من “كورونا”

    البعد عن التجمعات بشكل عام، وتجمعات الاحتفالات بشكل خاص، هو أفضل طريقة لحماية نفسنا وبلدنا وكل الناس اللي بنحبهم من فيروس “كورونا”، وببساطة تقدر تسأل أي شخص حصل على لقاح فيروس “كورونا” المستجد مؤخرًا عن الأعراض الجانبية اللي ممكن يكون حس بيها لمدة ساعات، أعراض ممكن تكون صعبة جدًا، تخيل بقى أعراض الفيروس الحقيقي نفسه عاملة إزاي.. تخيلت؟ خليك في البيت.

    2 – هتحس بالراحة والاسترخاء

    الشعور بالراحة والاسترخاء بيعتبر من أهم من فوائد القعدة في البيت. متعة الابتعاد عن ضوضاء العربيات، وضجيج الشوارع، وإمكانية ممارسة تمارين التأمل اللي ليها فوائد صحية كتيرة.

    3 – هتقوى علاقتك بأسرتك

    ظروف العمل لساعات طويلة بتكون سبب في عدم القدرة على التواصل مع الأطفال والزوجة، علشان كده بيعتبر الجلوس في البيت يوم كامل فرصة هايلة لتقوية العلاقة بين الأبناء وآبائهم، والكلام معاهم في مختلف المشاكل .

    4 – هتلعب مع حيوانك الأليف

    من فوائد الجلوس في البيت يوم كامل، إنك هتقدر تقضي بعض الوقت مع الحيوانات الأليفة في بيتك، سواء القطط أو الكلاب، وهتقدر كمان تهتم بصحتهم ونظافتهم، وده أكيد هينشر حالة من الشعور بالسعادة في البيت.

    5 – هتوفر فلوس الخروجات

    من أهم فوائد القعدة في البيت، توفير تكاليف المواصلات وشراء الوجبات السريعة، والاستفادة منها فى أشياء تانية ممكن تكون أهم، زي شراء ملابس جديدة، أو لوحات فنية، أو قطعة آثاث كان نفسك فيها.. أو حتى تحوش أكتر علشان رحلة سفر في يوم بعد ما كابوس “كورونا” ينتهي بإذن الله.

    6 – هتغير شكل بيتك

    تقدر يوم الأجازة تعدل ديكور بيتك، من خلال تبديل قطع أثاث الغرف، والتخلص من قطع الأثاث اللي بتحس إنها سبب كبير في الفوضى داخل البيت.

    7 – هتقرأ روايات جديدة

    القعدة في البيت يوم كامل فرصة عظيمة لقراءة رواية حلوة، أكيد عندك كتب في البيت من فترة كان نفسك تقرأها والشغل معطلك.. دي فرصتك.

    كل سنة وكل المصريين بخير، وشم نسيم سعيد علينا كلنا!

    مقترح