النهارده في القاهرة: إنشاد ديني وعرض مسرحي وعرض سينما وحفل توقيع
Cairo 360
الأسبوع الأخير قبل إجازة العيد الطويلة، وكل فعاليات اليومين دول نقدر نعتبرها "تصبيرة" أو "تسخين" قبل بداية الإجازة الكبيرة لو جاز التعبير يعني.
وكعادة التصبيرة دايمًا بتبقى صغيرة الحجم، لكن في نفس الوقت لذيذة الطعم علشان تحقق المطلوب من استثارة الشهية وتحفيز النفس، وتصبيرة النهارده من فعاليات القاهرة مطابقة للمواصفات بامتياز!
هنرجع تاني تكون بدايتنا من ساقية الصاوي، اللي هنكون فيها على معاد مع فعاليتين من اللي قلبك يحبهم، الأولى هتكون من على مسرح قاعة النهر في تمام الثامنة مساءً، وهي حفل إنشاد ديني للشيخ محمود التهامي، سعر تذكرة الحضور 30 جنيه.
والثانية هتكون مع على مسرح قاعة الحكمة في تمام السابعة مساءً، وهتكون عبارة عن عرض مسرحي يحمل اسم "مسجون 1664"، سعر تذكرة حضوره 20 جنيه.
والمحطة الثانية هتكون سينما زاوية في وسط البلد اللي بتستأنف مجموعة عروضها للأسبوع الثاني بعد نجاحها الكبير في أسبوعها الأول، وعرض النهارده هيكون عرض للفيلم الوثائقي الفلسطيني "حبيبي بيستناني عند البحر"، العرض هيبدأ في تمام الساعة 7:30 مساءً، وسعر تذكرة الحضور 25 جنيه.
ثالث محطاتنا هتكون مكتبة "أ" فرع الميرغني اللي هتستضيف الكاتب "مؤمن المحمدي" علشان يناقش ويوقع كتابه "مصر من تالت"، الدعوة عامة، والبداية هتكون في تمام السابعة مساءً.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
