The Definitive Guide to Living in the Capital , Cairo , Egypt

الحياة في كايرو

النهارده في القاهرة: الماتش مش الحدث المهم الوحيد

النهارده في القاهرة: الماتش مش الحدث المهم الوحيد
    بواسطة
    Cairo 360

    النهارده الحدث الرئيسي اللي واخد الاهتمام كله لحسابه هو ماتش مصر وغانا في تصفيات كأس العالم، لكن جنب ده جمهور الفن والثقافة ممكن يعتبروها فرصة ذهبية لحضور فعالياتهم المفضلة في هدوء ورواقة مع ضمان طرق ماشية وشوارع فاضية نسبيًا.

    مش هنكتّر عليكم الكلام لكن هنقول لكم أنه في حدثين مهمين جدًا هيحصلوا النهارده ومانقدرش نهملهم حتى لو كانوا في يوم حدث جماهيري آخر مهم زي المباراة.

    الحدث الأول هو اختتام مهرجان الموسيقى العربية اللي استمر لمدة نصف شهر تقريبًا بتنظيم دار الأوبرا على كل المسارح التابعة ليها في أكثر من محافظة، المهرجان هيودع جمهوره النهارده في يوبيله الفضي بسهرة من العيار الثقيل جدًا، المسرح الكبير بدار الأوبرا في الجزيرة هيستضيف مراسم الختام وتوزيع جوائز المهرجان، بالإضافة لفواصل غنائية للفنانة مي فاروق أولًا، ثم الفنانة السورية الكبيرة أصالة، تبدأ السهرة الساعة 8:00 مساءً، وأسعار تذاكر حضور الحفل 150 – 300 – 500 جنيه.

    الحدث التاني المهم هو حدث ختامي أيضًا، اليوم الختامي لبانوراما الفيلم الأوروبي، البانوراما كان مقرر ليها تنتهي يوم 12 نوفمبر اللي هو امبارح، لكن نظرًا للخوف من الظروف الأمنية يوم 11 نوفمبر تم إلغاء العروض يومها وتأجيلها، وتم ترحيلها للنهارده وبالتالي بقى النهارده هو يوم الختام، الفعاليات بتبدأ في سينما زاوية وسينما كريم في وسط البلد من الساعة 10:30 صباحًا وبتستمر لحد 11:00 مساءً تقريبًا، تقدروا تعرفوا جدول أفلام النهارده ومواعيدها من هنا.

    مساء سعيد، ويارب أبطالنا يعيدوا الأمجاد.

    مقترح