The Definitive Guide to Living in the Capital , Cairo , Egypt

الحياة في كايرو

النهارده في القاهرة: انطلاق مهرجان كيميت 20 وعروض مسرح وحفلات موسيقية

النهارده في القاهرة: انطلاق مهرجان كيميت 20 وعروض مسرح وحفلات موسيقية
    بواسطة
    Cairo 360

    سنظل أوفياء لعادتنا اليومية في أننا نقول لكم على أبرز أحداث القاهرة، ونقدم لكم دليل بسيط ومختصر لخروجات ليلية لطيفة.

    البداية من مسرح أوبرا ملك بوسط البلد اللي هيستضيف النهارده ولمدة أسبوع فعاليات مهرجان "كيميت 20" للمسرحيات القصيرة في دورته الثالثة، الفعاليات بتبدأ من الساعة 5:00 مساءً.

    وبجملة العروض المسرحية نعدي في سكتنا على مسرح الغد بالعجوزة اللي هيستمر في استضافة العرض المسرحي "الحضيض" اللي بيقدمه فريق مسرح كلية الهندسة بجامعة القاهرة، العرض هيبدأ في تمام الثامنة مساءً.
    عرض مسرحي آخر هنكون على معاد معاه من ساقية الصاوي بالزمالك، العرض الكوميدي "فلسفة الحمير" هتقدمه لنا فرقة "برجولا" المسرحية على مسرح قاعة الحكمة في تمام السابعة مساءً، وسعر تذكرة حضوره 20 جنيه.

    ومن ساقية الصاوي برضه هنكون على معاد مع الفنان عماد عبدالعزيز وفرقته اللي هيقدموا لنا سهرة موسيقى عربية مميزة ابتداءً من السابعة مساءً على مسرح قاعة النهر، وسعر تذكرة الحضور 25 جنيه.

    ونختتم دليلنا المختصر النهارده من وسط البلد، وتحديدًا من المركز المصري للثقافة والفنون "مكان" بجوار ضريح سعد زغلول، اللي هيستضيف النهارده سهرة موسيقية مميزة مع عازف الساكسفون شادي القصير مع البيانيست الدانمركي كارل وينثر، سعر تذكرة الحضور 30 جنيه، والبداية في تمام الثامنة مساءً.

    ونقول هارد لك للي هتفوته خروجة النهارده، وينتظرنا بكرة مع أجندة جديدة، متعوضة بعون الله.

    مقترح