The Definitive Guide to Living in the Capital , Cairo , Egypt

النهارده في القاهرة: حفل موسيقي، وإنشاد ديني، وعرض فيلم لـ آل باتشينو

النهارده في القاهرة: حفل موسيقي، وإنشاد ديني، وعرض فيلم لـ آل باتشينو

البدايات دايمًا مهمة ولو ظبطت بتفرق معانا طول السكة، وكل يوم أحد بيمثل لنا بداية أسبوع عمل جديد، وبيبقى مهم أننا نقضيه بشكل كويس علشان نطمئن على بقية أيام أسبوعنا ونتفاءل خير.. فخلونا نقول لكم كده على كام حاجة ممكن تروحوها النهارده تبسطكم وتشحنكم طاقة إيجابية تكملوا بيها لبقية الأسبوع.

البداية من ساقية الصاوي ومن مسرح قاعة الحكمة تحديدًا مع حفل مجموعة "وصلة سماع" اللي هيقدموا فيه مجموعة من الأناشيد والابتهالات الدينية اللي بقى الاستماع ليها والإقبال عليها دلوقتي ذوق عام عند معظم الناس.. سعر التذكرة –كعادة فعاليات الساقية- في المتناول جدًا.. 15 جنيه للأعضاء و 20 لغير الأعضاء، الحفل هيبدأ الساعة 7:00 مساءً.

وبعدين نروح لمسرح الجنينة اللي عايش حالة نشاط غير عادية وشغال اليومين دول شغل عالي جدًا، النهارده هيستضيف المنتج اللبناني زيد حمدان للمرة التانية بعد ما استضافه برفقة مريم صالح مؤخرًا، لكن المرة دي برفقة "مي وليد".. منتظرين أمسية غنائية وموسيقية متميزة مع الثنائي المبدع، فعاليات اليوم هتبدأ من 8:30 مساءً، وسعر التذكرة 30 جنيه.

ونختم كلامنا عن أحداث اليوم في جاردن سيتي وتحديدًا من "روم آرت سبيس" اللي هتستضيف النهاردة عرض للفيلم الأمريكي "Looking for Richard"، سيناريو الفيلم مأخوذ من إحدى حكايا شكسبير، والفيلم من إخراج العبقري "آل باتشينو".. الحد الأدنى للطلب في روم 25 جنيه.. مشاهدة سعيدة.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح