The Definitive Guide to Living in the Capital , Cairo , Egypt

الحياة في كايرو

بالبط والأوز.. إزاي قدماء المصريين احتفلوا برأس السنة الجديدة؟

أكل احتفالات الأقصر القدماء المصريين بط ووز حتحور رأس السنة الميلادية سنة جديدة مقبرة
بالبط والأوز.. إزاي قدماء المصريين احتفلوا برأس السنة الجديدة؟
    بواسطة
    Omar Abd-elmaqsoud

    قبل أي كلام، كل سنة وأنتم طيبين، خلاص خلال ساعات بسيطة هنبدأ سنة جديدة، ويارب تكون سنة سعيدة عليكم، وبالمناسبة الجميلة دي قعدنا ندور على حاجة تكون جديدة ومختلفة ومناسبة للحدث ده، وكانت المفاجأة إننا عرفنا إن الاحتفال بالمناسبة دي مش جديد زي ما كنا متخيلين، ولا من 100 و200 ولا حتى ألف سنة، تخيلوا إن الاحتفالات برأس السنة الجديدة كان على أيام القدماء المصريين كمان؟ تعالوا نحكي لكم الحكاية من الأول.

    بص يا سيدي، بصي يا ستي، من فترة مش بعيدة اكتشفت البعثات الأثرية المختلفة إن في حوالي 19 مقبرة من مقابر النبلاء في جبانة “طيبة” في البر الغربي لمدينة الأقصر، جدرانهم تعتبر سجلات تاريخية بتسجل مظاهر احتفالات القدماء المصريين بعيد رأس السنة واستقبالهم للسنة الجديدة، وكان واضح فيها كمان إزاي كانوا بيحتفلوا بليلة رأس السنة تحديدًا.

    عالم المصريات الدكتور “منصور النوبي” قال إن احتفالات المصري القديم بعيد رأس السنة ارتبطت بالأكل من زمان، وكانت الوجبات الرئيسية فيها “بط وأوز” مشويين في المزارع، وأسماك مجففة بتتعمل مخصوص للمناسبة دي.

    الاحتفالات برأس السنة الجديدة كانت بتستمر لليالي وأيام، زي ما بيقول الدكتور “النوبي” وكانت بتعتبر موسم للأجازات وحفلات الخطوبة والجواز وأي مناسبة اجتماعية سعيدة، ده غير إن كل المصريين بيتجمعوا فيها علشان يشوفوا تمثال المعبودة “حتحور” اللي بيخرج للنور في اليوم ده، علشان يشوفه كل الناس، وده لإنها كانت ربة السعادة والمرح والسرور عند القدماء المصريين وكأنها بتمنح الحياة لسنة تانية جديدة، وده كان دليل على عظمة مكانة الأعياد والاحتفالات دي عند القدماء المصريين.

    مقترح