The Definitive Guide to Living in the Capital , Cairo , Egypt

الحياة في كايرو

بالتفاصيل.. موقع وأبلكيشن جديد لخدمة ركاب مترو أنفاق القاهرة

أبلكيشن مترو الأنفاق تذاكر المترو تطبيق مترو الأنفاق خدمات خدمات لركاب المترو مترو الأنفاق مترو القاهرة موقع مترو الأنفاق
بالتفاصيل.. موقع وأبلكيشن جديد لخدمة ركاب مترو أنفاق القاهرة
بواسطة
Mohamed Talaat

شركة مترو الأنفاق أعلنت رسميًا عن إطلاق موقع وموبايل أبليكيشن فيه مجموعة من الخدمات المهمة جدًا، واللي هتساعد الركاب، زي أقرب محطة مترو، وتحديد ثمن التذكرة، ومعرفة خط السير، وخريطة المترو، وغيرها من الخدمات المختلفة اللي بتعتمد على التكنولوجيا، وفي السطور اللي جاية هنشرحلكم إيه هي الخدمات دي وإزاي تستخدموها.

مبدئيًا كده الأبليكيشن متاح لنسخة أندرويد بس لحد الآن، وقريب جدًا هيتاح لأنظمة iOS، والموقع متاح لكل المتصفحات العادية وللموبايل، وفيه نسختين عربي وإنجليزي، وده بخلاف وسائل التواصل مع ركاب مترو الأنفاق عن طريق فيسبوك وواتس آب ويوتيوب.

هتلاقوا في التطبيق والموقع خدمة من/إلى، ودي مربوطة بتطبيق خرائط جوجل، وبتحدد لكم محطة الركوب، والنزول، وكمان المحطات اللي هتمروا عليها والوقت اللي هتاخده الرحلة، وكمان تقدروا تحددوا أقرب محطة مترو لكم سواء لو على رجليكم أو بالعربية، ده غير تعريف بمحطات الخطوط الثلاثة للمترو.

كمان هتقدرو من خلال الخدمات الجديدة إنكم تتعرفوا على سعر تذكرة المترو، وتحددوا محطة الركوب والنزول، وهتعرفوا كام محطة لحد ما توصلوا وسعر التذكرة كام، بس الخدمة دي شغالة للخطين الأول والثاني بس، ده غير خريطة المترو اللي بتوضح كل المحطات وتقابلاتها في كل الخطوط، ودي خدمات موجودة في الموقع والأبليكيشن.

أما الموقع الالكتروني ففيه خدمات زيادة زي إنكم تقدروا تعرفوا من خلاله أماكن مكاتب الاشتراكات، وطريقة الاشتراك، والمحافظ النقدية، وأسعار الاشتراك، وحساب عدد المناطق.

هتلاقوا كمان خدمات استقبال الشكاوى والاقتراحات والاستفسارات المقدمة لشركة المترو، وخدمة “سلامتك تهمنا”، ودي بتدي إرشادات مهمة لسلامة الركاب، وكمان بيوفروا معلومات عن مشروعات تطوير المترو لتعريف مستخدميه بإجراءات تحسين الخدمات زي “القطارات الجديدة – السلالم الكهربائية الجديدة – تطوير المحطات” وغيرها.

لينك الموقع من هنا.

لتحميل الأبلكيشن من هنا.

مقترح