The Definitive Guide to Living in the Capital , Cairo , Egypt

الخروجات والفسح في القاهرة ممتعة لكل الناس، والخروج لأماكن مفتوحة فيها خضرة أو مياه وهواء منعش ومساحات للعب مفيدة للصحة النفسية. والحديقة اليابانية بحلوان من الأماكن الممتعة، وكان اسمها زمان كشك الحياة الآسيوي. وفعلًا الحديقة فيها حياة متكاملة، كلها فرحة وانبساط، وسعر تذكرتها 10 جنيه بس.

تعالوا نتعرف أكثر على الحديقة.

المهندس المعاري ذو الفقار باشا هو اللي أنشا الحديقة اليابانية سنة 1919 على الطراز الآسيوي علشان تكون رمز لحضارات الشرق، ومساحتها 10 أفدنة تقريبًا، وتم الانتهاء من تصميمها نهائيًا سنة 1922.

بتحتوي الحديقة اليابانية على تماثيل بترمز لأكتر من حقبة تاريخية زي تمثال زهرة اللوتس اللي بتحمل تمثال لمؤسس الحديقة، وكمان فيها مجموعة تماثيل لأفيال الشرق وكأنهم حراس للمكان، ده غير تمثال لوجه الحياة واللي هو عبارة عن سيدة مغمضة عينيها ومبتسمة علشان تعكس تقديس الشرق للمرأة.

ومن ضمن التماثيل في الحديقة الدولية 48 تمثال لتلاميذ “شيبة” بيعلمهم الديانة البوذية قدام بحيرة كبيرة، وكمان تمثال الحكمة الثلاثية اللي بتوضح أن الإنسان لا يتدخل في شئون الغير وهي عبارة عن 3 قرود “لا أسمع، لا أرى، لا أتكلم”، وبتضم كمان بحيرة اللوتس وكشك الموسيقى والأشجار المميزة.

الحديقة مقسمة لطريقين والدخول من الباب الرئيسي فقط لأن باقي الأبواب مغلقة، الطريق اللي على اليمين ده اللي هيكون فيه زيارتكم وهتلاقوا تمثال وجه الحياة وبعده فيه سلم لو طلعتوه هيكون فيه أماكن للجلوس وفوقها مظلة جنب تمثال ذو الفقار باشا وحواليه الأفيال الـ3 ومحاطين بسور حديد صغير، وفي آخر الحديقة موجود تماثيل المعلم شيبة وتلاميذه الـ48 أمام البحيرة، ومحاطين بسور جديد وخلفهم اللي باقي من الأشجار، وتحتهم تمثال الحكمة الثلاثية “لا أسمع، لا أرى، لا أتكلم”.

كمان الحديقة بتضم ألعاب للأطفال علشان ينبسطوا هما كمان، وكمان موجود كشك الموسيقى واللي كان زمان بيتعمل فيه حفلات للفرق الموسيقية، ده غير تمثال بوذا المبتسم، وقدامه البحيرة اللي يقدر الأطفال يلعبوا فيها بقارب صغير، ده غير الأشجار النادرة اللي هتشوفوها، وماتنسوش تتصوروا صور تذكارية مميزة وأنتم هناك.