The Definitive Guide to Living in the Capital , Cairo , Egypt

الحياة في كايرو

تاكس! 5 تطبيقات توصلك الحتة اللي أنت عايزها

تاكس! 5 تطبيقات توصلك الحتة اللي أنت عايزها
بواسطة
Dina Mokhtar

المكان: شارع مزدحم يعج بكافة أنواع المركبات والبشر

الزمان: منتصف يوم قاهري حار      

((في محاولة يائسة منه للحاق بموعده دون أن يفقد آدميته –أو أن تذهب أجرة الكواء هباء- يصرخ بأعلى صوته:

  • تاكس!

يرمقه سائق السيارة بركن عينه ولكن يكمل طريقه على أي حال.

يرفض آخر الذهاب لوجهة البطل بابتسامة لزجة بها بعض من التشفي، وكأنه يقود آخر سيارة متجهة للفردوس.

يركب البطل أخيرًا سيارة أجرة… ولا نعلم إذا ما وصل البطل إلي وجهته بالتحديد، أم أنزله السائق "عالناحية التانية وهو يعدي علشان ما يلفش في الزحمة"، أم أنه وصل ولكن بمشاجرة بسبب الأجرة… تذهب فيها أجرة الكواء في المهب الريح.))

*تمت*

طبعًا الحدوتة دي أسوأ سيناريو ممكن يحصل لأي حد فينا في أي يوم، وبما أننا تقريبًا ركبنا مع نص تكاسي القاهرة نقدر نقول لك أن "صوابعك مش زي بعضها"؛ لأن فيه منهم ناس محترمين جدًا وبيراعوا ضميرهم في أكل عيشهم.

بالرغم من أننا كثير بنحس أن التكنولوجيا غيرت حاجات حلوة كثير في حياتنا، إلا أننا برضه ما نقدرش ننكر أنها سهلت علينا حاجات ثانية ووفرت لنا وقت ومجهود. من ضمن الحاجات اللي اتبسطت هي عملية تأجير عربية توصلك أي حتة أنت عايزها في القاهرة؛ فبجانب الوقت والمجهود اللي اتلخص في كام ضغطة على شاشة الموبايل، فيه مميزات ثانية زي أن أنت بتبقى عارف هتدفع كام و"اللي ليك واللي عليك"، ده غير أن لو حصل حاجة كده ولا كده من السائق –علشان هم مش ملايكة برضه- هتعرف توصل شكوى تتسمع وفي المطلق أنك تبقى عارف هوية السائق حاجة في حد ذاتها تطمنك.

مش هنرغي كثير، معظم التطبيقات هتطلب منك أنك تنشأ حساب باسم المستخدم وكلمة السر، ومش هيطلبهم منك تاني غير لو تسجيل خروج من الحساب لأي سبب من الأسباب. التطبيقات دي بتعتمد على الإنترنت والـ GPS علشان تحدد موقعك من على الخريطة وتحديد وجهتك، هتحددهم وتطلب عربية هيجي لك في خلال دقيقة اسم السواق ورقم تليفونه وبيانات العربية. وعلشان ما تدخلش في حوار تحديد المكان بدقة؛ كلمه وحدد له مكانك.   

أحلى حاجة في الخدمة دي أنها متوفرة على مدار الـ 24 ساعة. ولكن حط في اعتبارك أن الأسعار مش ثابتة لأنها بتكون حسب ظروف الزحمة؛ وخصوصًا أن فيه سعر انتظار بتحدده الشركة اللي بتقدم الخدمة، ده غير أن معظمهم بيزود التعريفة لو فيه زحمة وأوقات الذروة.

         

أوبر – Uber:

من الشركات العالمية اللي ليها صيت كبير في المجال، واللي كثير بيعتمدوا عليها. على حسب موقع أوبر مصر، تعريفة العربية 3 جنيه وكل كيلو متر زيادة بيتحسب بـ 1.30 أما الانتظار –سواء في الزحمة أو انتظار الراكب- فهو 20 قرش للدقيقة.  أوبر عنده مجموعة من الأسعار الثابتة لو راجع من السفر وعايز توصيلة للمطار، وهم بيوصلوا لأي حتة… حتى لطابا ومرسى علم –شوف القائمة من هنا.

لو قررت تلغي الرحلة لأي سبب من الأسباب، هتدفع 8 جنيه لو فات 5 دقايق على طلب العربية، إنما قبلها ببلاش.

لو عايز التطبيق للأندرويد، حمله من هنا.

 

كريم – Careem:

من الشركات اللي ممكن تعتمد عليها وأنت مطمئن. ده غير كمان أنك ممكن تطلب كريم لميعاد معين حتى لو ساعة قبلها. ما عرفناش نجيب لكم أسعار ثابتة للتعريفة بتاعتهم بس نقدر نقول لكم أن في أوقات الذروة –ما فيش مرة طلبناه وما كانتش وقت ذروة- ساعات بيزود التعريفة العادية لنسبة بتوصل في أوقات لـ 1.9 أزيد من السعر العادي؛ يعني لو مشوار بـ 10 جنيه، وقت الذروة هيبقى بـ 19 جنيه وهكذا.

لو عايز تلغي المشوار فده بيبقى حسب الآتي: لو طلبت العربية تيجي حالًا، ممكن تلغي ببلاش قبل ما يتبعت لك اسم وبيانات السواق، لو بعدها أو السواق وصل لك هتدفع سعر الحد الأدنى للخدمة ولو انتظرك هتدفع ثمن وقت الانتظار. لو محدد ميعاد الرحلة من قبلها، ممكن تلغي ببلاش قبلها بساعتين، أما لو في خلال الساعتين دول بتدفع سعر الحد الأدنى للخدمة.

لو عايز التطبيق، حمله من هنا.

 

أسطى – Ousta:

بيميزه أن ما فيهوش زيادة في السعر في أوقات الذروة. الحد الأدنى للخدمة سعره 10 جنيه، أما التعريفة فهي 4 جنيه زائد 1.45 على كل كيلومتر، أما سعر الانتظار بالدقيقة 25 قرش.

غير أن فيه نوعين من العربيات ممكن تختار منهم Economy  وSupersaver، تقدر كمان تتابع العداد من خلال التطبيق وأنت في العربية لو عايز تتأكد أثناء الرحلة.

تقدر تحمل أسطي من هنا.

 

إيزي تاكسي – Easy Taxi:

بعكس الشركات الثانية المعتمدة على عربيات ملاكي؛ إيزي تاكسي بيعتمد على التكاسي البيضا المشتركة في الخدمة دي. يمكن هو ما بقاش بشهرة الشركات الثانية، وأحيانًا كثيرة بيبقى على الخريطة عربيات كثيرة بس ما حدش فيهم بينجدك –وخصوصًا لو مشوارك قريب- إلا أن ده ما يمنعش أنك ممكن تعتمد عليه.

ده موقعه الإلكتروني، وده لينك التحميل للأندرويد.

 

بينك تاكسي – Pink Taxi:

من الأفكار اللي القاهرة تحمست لها، ولكن ما نقدرش نقول أنه بشهرة الشركات الثانية؛ طبعًا ده وضع طبيعي لأنه مخصص للجنس الناعم فقط. متوفر منه أنواع من العربيات واللي هتكفي أي عدد من الراكبات.

غير أنه بيوصل في أي مكان في القاهرة، بينك تاكسي كمان ممكن يوصلك للساحل الشمالي لو هتسافري لوحدك، أو لو عايزة تسافري مع أصحابك براحتكم.

ده الموقع الإلكتروني اللي من خلاله ممكن تحجزي رحلتك من خلاله، وتقدري برضه تشوفي منه سعر الرحلة بالتقريب من قبل ما تحجزي. 

مقترح