The Definitive Guide to Living in the Capital , Cairo , Egypt

جربتوا قبل كده أنكم تجروا على نيل القاهرة من غير ما تغرقوا نفسكم بالمياه؟! دلوقتي هتقدروا تعملوا ده وتلعبوا فوق مياه النيل بشكل مختلف، من خلال تجربة مثيرة بيقدمها مكان ترفيهي اسمه (IL CAMPO)، واللي بيقدم حاليًا خدمة الكرة السحرية للجري والمشي فوق النيل. خلال السطور الجاية هنقول لكم على كل اللي محتاجين تعرفوه عن لعبة الكرة السحرية.

 

المكان هو عبارة عن منتجع للسياحة البيئية، تقدروا تقضوا فيه داي يوز مختلف وتعملوا حفلات باربكيو بباقات مختلفة، بتبدأ من 275 جنيه للكبار و245 جنيه للأطفال حتى 12 عام، وبتوصل أعلى باقة لسعر 525 جنيه للكبار و495 جنيه للأطفال، وتقدروا تجيبوا أكل وشرب معاكم وتلعبوا وتزوروا مزرعة الحيوانات والألعاب المائية وغيرها.

أما الكرة السحرية فهي من ضمن الألعاب الجديدة اللي بيقدمها المكان واللي بتخليكم تجروا فوق النيل وهي عبارة عن كرة عملاقة شفافة بتدخلوا جواها، وبعدين بتقدروا تتحركوا بيها في اي اتجاه في النيل، وهتقدروا توجهوها وتتحكموا فيها بسهولة بعد شوية تدريب.

الكرة السحرية بتكون آمنة وتتحمل الوزن وكمان غير ضارة، وبيكون سعرها 75 جنيه لكل 15 دقيقة، وماتنسوش كمان أن عندهم ألعاب كتير سواء ضمن باقات الاشتراك أو ألعاب فردية، ويفضل بالتأكيد أنكم تكونوا ضمن جروب علشان الألعاب الجماعية وتستمتعوا أكتر.

وتقدروا تعرفوا أكتر عنهم من خلال صفحة الفيسبوك من هنا.

أو الاتصال على رقم التليفون: 0238098787 – 01093455959.

العنوان: طريق أسوان الزراعي الغربي، امتداد البحر الأعظم – بجوار قسم شرطة أبو النمرس – منيل شيحة – الجيزة.