The Definitive Guide to Living in the Capital , Cairo , Egypt

كلنا بيجي علينا وقت في نهار رمضان بيبقى الواحد فيه خلصت بطاريته ومستني الدقائق تعدي والفطار معاده يجي؛ ومهما الواحد حاول يملأ الفراغات الموجودة في عدد الساعات اللي بنصومها بحاجات مفيدة، زي العبادات، الشغل أو حتى الطبيخ، بتيجي أوقات الواحد فيها بيفرك بس مش قادر يعمل حاجة مهمة، وغالبًا ده بيبقى وقت التقليب في الموبايل والفيسبوك، خلينا نعترف أنه بينقذنا في مواقف كثيرة الملل بيلعب فيها دور البطولة.

علشان كده جبنا لكم مجموعة من الألعاب والتطبيقات اللي ممكن تسلي صيامك معاهم:

 

Two Dots:

فكرتها سهلة وبسيطة بس هتسرح معاها؛ كل ما عليك أنك توصل النقط بشكل أفقي ورأسي بس يكونوا من نفس اللون. كل مرحلة بتبدأ بيبقى عليك أنك تجمع عدد نقط معينة من كذا لون في خلال عدد معينة من الـ Moves ، وكل ما هتتقدم في المراحل كل ما الصعوبة هتزيد… بس ما تقلقش كل كام مرحلة هيعلمك حاجة جديدة تعملها تسهل عليك اللعبة.

تنفعك لو بتحب حاجة ما فيهاش هري كثير، وخصوصًا أنها مش هتوتر لك أعصابك زي ألعاب ثانية.

 

 Stack:

من اللعب اللي هتتسحل معاها وتدمنها في وقت قليل. Stack تبان أنها لعبة سهلة، إلا أنها محتاجة تركيز؛ بتبدأ اللعبة لما بتضغط على المكعب الثابت واللي هيكون أساس البرج اللي هتبنيه عن طريق مجموعة المكعبات اللي بتتحرك يمين وشمال. المطلوب منك أنك تظبط المكعبات المتحركة على المكعب الثابت وإلا البرج اللي هتبنيه هتفضل مساحته تقل والموضوع هيبقى أصعب وأصعب.

لو أنت خلقك ضيق وبتتوتر بسرعة بلاش من اللعبة دي خالص علشان ممكن تطير البرج اللي أنت ملصمه في نفوخك لحد الفطار.  

 

Color Switch:

في المكتب عندنا لما تلاقي حد واخد بريك ومركز في التليفون قوي تعرف أنه بيلعب Color Switch. اللعبة بسيطة جدًا بس أنت وشطارتك؛ معاك كرة بلون معين، حاول بقى تعدي الكرة دي بين مجموعة دوائر بس من نفس الجزء اللي بلون الكرة. صعوبة اللعبة في أنك تحاول تحافظ على توازن الكرة.

الموضوع ممكن يبان بسيط، بس برضه دي مش لعبة لأصحاب النفس القصير.

 

السودوكو:

نسيبنا بقى من وجع القلب والدماغ، والمكسب والخسارة، ونركز في السودوكو. من الألعاب المشهورة جدًا واللي ناس كثير بتحبها. إحنا شخصيًا من الناس اللي بتعجبهم علشان بتحسسنا أننا نقدر نتعامل مع الأرقام – مع أن اللعبة لا فيها لا جمع ولا طرح ولا فتاكة يعني؛ عندك تسعة مربعات جواهم تسعة مربعات لازم يبقى فيهم أرقام من 1 لحد 9، على أن ولا رقم يتكرر في الصف الأفقي أو الرأسي.

دي بقى هتلاقي لها تطبيقات ياما، واللي فيها هوامش، واللي ممكن تمسح فيها عادي واللي ممكن تساعدك.

 

Zen: Coloring Book for Adults:

بدل ما تنزل تشتري لك ألوان وكتاب تلوين بقد كده، عندك التطبيق ده واللي متوفر فيه كل اللي أنت عايزه. بعكس الكتب والورق اللي ممكن ما يعجبكش اللون وما تعرفش تمسحه، في Zen: Coloring Book for Adults هيبقي عندك الفرصة أنك تعيد تلوين الرسمة اللي أنت بوظتها. ده غير أن فيه عدد كبير جدًا من الرسومات اللي تقدر تختار منها.

التطبيق ده خفيف ولطيف لو ما لكش في تنشنة اللعب الثانية، ده غير أن فيه موسيقى مع التطبيق تساعدك على أنك تهدي أعصابك.