The Definitive Guide to Living in the Capital , Cairo , Egypt

الحياة في كايرو

تفاصيل هتعرفوها لأول مرة عن خطة مصر 2030 لتطوير شبكة الطرق في القاهرة

القاهرة خطة القاهرة 2030 رؤية 2030 شبكة الطرق
تفاصيل هتعرفوها لأول مرة عن خطة مصر 2030 لتطوير شبكة الطرق في القاهرة
    بواسطة
    Cairo 360

    في إطار الرؤية الشاملة لتطوير مصر، والمعروفة باسم “مصر 2030” أعلنت محافظة القاهرة عن إنها انتهت من مخطط رؤية التطوير الخاصة بالعاصمة 2030 واللي هدفها إن القاهرة تكون أكثر تطورًا في جميع المجالات، وخالية تمامًا من المشكلات، وعندها القدرة إنها تتجنب أي عقبات ممكن تحصل خلال السنوات اللي جاية، ده غير إن رؤية العاصمة 2030 تعتبر جزء لا يتجزأ من رؤية مصر 2030.

    وطبعًا من أهم الجزئيات اللي نفسنا نشوف فيه تطور، هي جزئية “شبكة الطرق” وده لإنها بتلمس حياتنا اليومية، وبتربطنا ببعض، علشان كده كان مهم ننقل لكم تفاصيل الخطة الاستراتيجية للمحافظة 2030 المتعلقة بخطط الارتقاء بشبكة الطرق في العاصمة، زي ما نشرها “مصراوي” .

    الخطة الاستراتيجية للعاصمة والخاصة بتطوير شبكة الطرق هتشتغل على 3 محاور رئيسية:

    المحور الأول: المساهمة في تطوير الطرق اللي بتربط بينها وبين المحافظات التانية.

    والمحور ده هيكون فيه تعاون بين القاهرة والمحافظات التانية، هدفه تطوير شبكة الطرق اللي بتربط بين العاصمة وبين المحافظات دي (الجيزة – القليوبية – السويس – الإسماعيلية – مرسى مطروح).

    وعلشان يدخل المحور ده حيز التنفيذ، هتبدأ محافظة القاهرة بتنفيذ مجموعة من المشروعات اللي من المفترض تنفيذها خلال الخطة الخمسية الجاية ومنها:

    – تطوير طريق القاهرة – السويس بهدف المساهمة في تنمية حركة الصادرات والواردات من وإلى ميناء السويس وخدمة المدن العمرانية شرق القاهرة، وفصل حركة المقطورات عن الطريق الرئيسي.

    – تطوير طريق القاهرة – العين السخنة بهدف تيسير الحركة المرورية

    – تنفيذ محور روض الفرج الضبعة (القاهرة – الجيزة – مطروح) لتسهيل الحركة المرورية وخلق محاور تنمية جديدة.

    – تطوير طريق القاهرة الإسماعيلية الصحراوي لتسهيل الحركة المرورية وخلق محاور تنمية جديدة.

    الخطة تضمنت إنشاء طريق شبرا – بنها الحر واللي تم الانتهاء منه وافتتاحه فعلياً، وده بهدف تقليل الكثافات المرورية والضغط على طريق القاهرة الإسكندرية الزراعي.

    المحور الثاني: تطوير الشوارع الرئيسية في المحافظة.

    وده من المحاور المهمة جدًا، واللي بتشتغل عليه محافظة القاهرة سنويًا من خلال رصد اعتمادات مالية سنوية لرصف الشوارع الرئيسية، ورفع كفاءتها، لتيسير الحركة المرورية ومنع الاختناقات المرورية وخلق شبكة طرق جاذبة للاستثمار.

    ومن أهم الإنجازات اللي هنشوفها خلال الخطة الخمسية الجاية هي تطوير عدد من المناطق الحيوية، منها ميدان السيدة زينب، وتطوير منطقة الفسطاط، ومحور عين الحياة، وتطوير ميدان السيدة نفيسة، وغيرها من الميادين الرئيسية والمحاور الرئيسية زي مؤسسة الزكاة، ومصطفى النحاس.

     

    المحور الثالث: رصف وتطوير الشوارع الداخلية والحواري على مستوى أحياء المحافظة (38 حي متقسمين على 4 مناطق، وهي الشمالية – الجنوبية – الشرقية – الغربية).

    خطة المحافظة هتشمل في محورها التالت والأخير، إجراءات لرفع كفاءة شبكة الكباري والأنفاق في نطاق العاصمة وتطويرها، بهدف رفع درجة الأمان، وتقليل زمن الرحلات، وتجنب الاختناقات المرورية، وتحسين مستوى الخدمة.

    وهيشمل المحور التالت من الخطة الاستراتيجية 2030 اللي حطتها محافظة القاهرة، إحلال وتجديد 30 كوبري، وإنشاء 12 كوبري جديد للعربيات والمشاة، وده هدفه رفع كفاءة البنية الأساسية لشبكة الكباري والأنفاق في العاصمة.

    مقترح