The Definitive Guide to Living in the Capital , Cairo , Egypt

الحياة في كايرو

تماثيل وأشجار نادرة وأكتر.. دليلك لقضاء يوم ممتع في حديقة الحرية

أجمل الحدائق في مصر حدائق القاهرة حديقة الحرية عنوان حديقة الحرية معلومات عن حديقة الحرية مواعيد حديقة الحرية
تماثيل وأشجار نادرة وأكتر.. دليلك لقضاء يوم ممتع في حديقة الحرية
    بواسطة
    Mohamed Talaat

    القاهرة فيها عدد كبير من الحدائق، ومنها حديقة الحرية الموجودة بالقرب من نيل القاهرة بمنطقة الجزيرة، في وسط القاهرة، واللي عمرها أكتر من 145 سنة! في السطور الجاية هناخدكم معانا في رحلة كلها حرية لواحدة من أجمل حدائق القاهرة، وهي حديقة.. الحرية.

    من أكتر من 145 سنة، وبالتحديد سنة 1876م، تم إنشاء حديقة الحرية، ضمن خطة الخديوي إسماعيل لتحويل القاهرة لقطعة من أوروبا.

    هتشوف إيه في حديقة الحرية؟

    حديقة الحرية مساحتها حوالي 7 أفدنة، وبتتميز بوجود عدد من الأشجار المعمرة والنادرة، ده غير تصميمها الهندسي اللي بيقسمها لنصفين متناظرين مع ممشى رائع من الصخور الحمراء، وبيتمتع مدخل الحديقة بوجود صفين من أشجار النخيل الملكي، اللي بيعتبر من أجمل أنواع النخيل وأفخمها.

    كمان بيتزين سور الحديقة بعدد من النباتات المتسلقة، اللي بتتميز بألوان زاهية، ومنها أشجار الأكاسيا بأزهارها الصفراء الزاهية والكثيفة، مع أشجار الفيكس هاواي باللون الأبيض والأخضر.

    بتنتشر في الحديقة أحواض الزهور اللي بتنشر البهجة في المكان وبتعكس سحر الطبيعة، وهتلاقوا وسط الزهور الملونة الجميلة تماثيل أعلام الثقافة والفكر، وبيحمل كل تمثال اسم صاحبه، ومنها تمثال أمير الشعراء أحمد شوقي، اللي بيجسد شوقي وكأنه بيكتب واحدة من قصائده الخالدة، وكمان تمثال شاعر النيل حافظ إبراهيم.

    ومن التماثيل الموجودة داخل الحديقة كمان، تمثال طلعت حرب صاحب الطفرة الاقتصادية واللي أنشا بنك مصر للتحرر من القيود الاستعمارية الاقتصادية، وكمان من الرموز الموجودة في الحديقة تمثال  لشهيد الحرية  اللواء عبدالمنعم رياض، اللي استشهد في حرب الاستنزاف المصرية سنة 1969.

    تماثيل لرموز الحرية في عالمنا

    هل سألت نفسك قبل كدة ليه الحديقة اسمها الحرية؟ السبب في كدة هو وجود تماثيل لرموز عالمية اقترن اسمها بالحرية، على سبيل المثال موجود في الحديقة تمثال لمحرر تشيلي ورئيس أول حكومة وطنية برناردو أوهيغينز، وكمان زعيم بيرو اللي ألغى العبودية ريمون كاستيلا، وكمان تمثال صاحب صرخة دولوريس البطل المكسيكي ميغيل إيدالغو إي كوستيا.

     

    عنوان حديقة الحرية: نهاية كوبري قصر النيل، الزمالك، القاهرة، أمام دار الأوبرا.

    سعر تذكرة حديقة الحرية: 10 جنيه للفرد.

    مواعيد الحديقة: طوال أيام الأسبوع من الساعة 9 صباحًا ولحد الساعة 11 مساءً.

    مقترح