The Definitive Guide to Living in the Capital , Cairo , Egypt

الحياة في كايرو -
مقترح

جوهرة الشرق.. ليه القاهرة اسمها القاهرة؟

العاصمة المصرية تاريخ القاهرة سبب تسمية القاهرة معلومات عن القاهرة معنى اسم القاهرة
جوهرة الشرق.. ليه القاهرة اسمها القاهرة؟
    بواسطة
    Mohamed Talaat

    الصورة: محمود مصطفى عاشور

    القاهرة هي العاصمة، وهي مدينتنا المفضلة المجنونة، اللي بنحبها بكل تفاصيلها، واللي عارفين كويس إنها مش أجمل مدينة في مصر لكنها أكثر مدينة ليها شخصية مميزة، والمشي في شوارعها تجربة مستحيل تتنسي. لكن هل سألت نفسك قبل كدة ليه القاهرة، اسمها القاهرة؟

    كلنا عارفين إن القاهرة مرت عليها كتير من الحقب التاريخية المختلفة على مر العصور، وعلى أرضها كتير من المعالم القديمة والحديثة، ونقدر نعتبرها متحف مفتوح بيضم آثار مصرية قديمة ويونانية ورومانية وقبطية وإسلامية.

    بيعود تاريخ المدينة إلى نشأة مدينة أون المصرية القديمة أو هليوبوليس “عين شمس حاليًا” واللي بتعتبر واحدة من أقدم مدن العالم القديم. أما القاهرة بطرازها الحالي فبيعود تاريخ إنشائها إلى الفتح الإسلامي لمصر على يد عمرو بن العاص عام 641 م وإنشائه مدينة الفسطاط، ثم إنشاء العباسيين لمدينة العسكر، فبناء أحمد بن طولون لمدينة القطائع.

    ومع دخول الفاطميين مصر في رلتهم من إفريقية (تونس حاليًا) بدأ القائد جوهر الصقلي في بناء العاصمة الجديدة للدولة الفاطمية بأمر من الخليفة الفاطمي المعز لدين الله وده في سنة 969م، وأطلق عليها الخليفة اسم “القاهرة”.

    وأطلق على القاهرة- على مر العصور- أسماء مختلفة، فهي مدينة الألف مئذنة ومصر المحروسة وقاهرة المعز وجوهرة الشرق.

    سبب تسمية القاهرة بالقاهرة!

    اختلفت الأقاويل حول سبب تسمية القاهرة بالاسم ده، واحدة من الروايات التاريخية بتقول إن جوهر الصقلي سمى المدينة في أول الأمر المنصورية لحبه لمدينة المنصورية اللي أنشأها خارج القيروان المنصور بالله والد المعز لدين الله، أو تيمناً باسم والد المعز نفسه إحياءً لذكراه، واستمر الاسم ده لحد وصول المعز لمصر فأطلق عليها اسم “القاهرة”، وده بعد مرور 4 سنين على تأسيسها، تفاؤلاً بأنها هتقهر الدولة العباسية المنافسة للفاطميين.

    فيه رواية تانية بتقول إنه سماها القاهرة علشان تقهر الدنيا، وفيه رواية تانية بتقول إن اسم القاهرة نسبة إلى الكوكب القاهر، وهو كوكب المريخ.

    مهما كان سبب الاسم، إحنا هنفضل بنحب القاهرة بدون سبب!

    مقترح