The Definitive Guide to Living in the Capital , Cairo , Egypt

14 فبراير يوم مميز بيحتفل فيه العالم بعيد الحب، وفي اليوم ده بتتحول الدنيا للون الأحمر، رمز الحب والعاطفة. القاهرة كمان مش بتفوت الفرصة وبتحتفل بطريقتها، من خلال الزينة والورود الحمراء والهدايا اللي بتعبّر عن مشاعرنا لشريك حياتنا. والسنة دي قررنا نقترح عليكم 5 أفكار لخروجات بسيطة، لأن المهم مش الفلوس اللي هتصرفوها، لكن التقدير والاهتمام اللي بتقدموه لحبيبكم علشان تقولوا من قلبكم: “كل سنة وأنت جوه القلب”.

1. الحدائق العامة

لو بتحبوا الطبيعة والهدوء، تقدروا تروحوا أماكن زي الأزهر بارك، الحرية، حديقة الأسماك، أم كلثوم، عابدين، الطاهرة، الأندلس وغيرها، وتستمتعوا بالأجواء الجميلة، تتصوروا، تهزروا، وتعيشوا لحظات ممتعة. تذاكر الدخول بتبدأ من 5 جنيه لحد 50 جنيه للفرد، وممكن كمان تطلبوا أكل أو مشروبات من أي مكان جوه الحدائق دي عشان تكملوا اليوم بشكل حلو.

2. كورنيش النيل

مفيش أحلى من روقان النيل في مصر، تقدروا تتفسحوا هناك ببلاش، تستمتعوا بالهواء النقي وأجواء عيد الحب، ولو حبيتوا حاجة مميزة أكتر، ممكن تركبوا مركب في النيل بأسعار بتبدأ من 25 جنيه للفرد لمدة نص ساعة أو ساعة كاملة. ولو عاملين ميزانية لليوم ده، ممكن تحجزوا فلوكة خاصة سواء عادية أو مجهزة للمناسبات الرومانسية بأسعار بتبدأ من 400 جنيه لحد 2500 جنيه.

3. برج القاهرة

تجربة مختلفة ممكن تعيشوها بزيارة برج القاهرة، خاصة وقت الغروب، بتذكرة سعرها 100 جنيه للفرد. هتشوفوا جمال القاهرة من فوق، سواء النيل أو الطرق والمباني العريقة، وكمان الأهرامات من خلال التليسكوب. ولو حابين تضيفوا لمسة رومانسية أكتر، تقدروا تدخلوا المطعم الدوّار وتستمتعوا بعشاء مميز مع إطلالة بانورامية تخطف الأنفاس.

4. التمشية في أماكن تاريخية

لو بتحبوا المشي والتمشية بتفرق معاكم، جرّبوا تتمشوا في أماكن زي شارع المعز، وسط البلد، الكوربة، الزمالك، أو جاردن سيتي. كل منطقة فيها سحر خاص وتفاصيل مميزة هتخلي كل خطوة مع بعضكم لها معنى مختلف ومميز.

5. البيوت الفاطمية

لو بتحبوا الأجواء التاريخية والفن المعماري القديم، تقدروا تزوروا البيوت الفاطمية زي بيت الغوري، بيت السحيمي، بيت زينب خاتون، بيت السناري، وبيت السلحدار. الأماكن دي مش بس بتديكم فرصة تشوفوا تاريخ عريق، لكن كمان ممكن يكون فيها حفلات أو فعاليات فنية في التوقيت ده، والتذكرة سعرها بيبدأ من 10 جنيه بس!

وأخيرًا..

عيد الحب مش بس ورد وهدايا، لكن لحظات جميلة وقضاء وقت حلو مع اللي بتحبوه.. اختاروا الخروجة اللي تناسبكم واستمتعوا بيوم كله حب وسعادة!