The Definitive Guide to Living in the Capital , Cairo , Egypt

عيد الأضحى خلاص على الأبواب.. كمان كام يوم هـ نحتفل به
على الرغم أن الشعب المصري كله دلوقت في الشوارع –كعادة المصريين- وفيه زحمة فظيعة
بـ تسبق يوم الوقفة علشان الناس كلها بـ تنتشر فى الشوارع على آخر الوقت تشتري لبس
جديد وطبعًا بشكل أخص .. خروف العيد.

فيه ناس كثيرة مننا ما عندهاش خبرة في شراء الخروف، أو لما
بـ تجيبه بـ توزع الأضاحي على اللي حواليها وعارفاهم في حين أن فيه ناس ثانية
محتاجة، علشان كده كايرو 360 عملت لك الدليل ده لشراء أضحية العيد وهـ نقول لك
كمان على طرق تسهل لك توزيع اللحم على المحتاجين لو أنت وقتك مشغول أو مش عارف
تتصرف إزاي. أسهل حاجة بعضنا بـ يعملها أننا نروح لجزار قريب مننا نعرفه كويس، ودي
مش محتاجة تفاصيل لأن اللى متعود على واحد هـ يروح له على طول، طب غير كده ممكن
نعمل إيه؟

فيه طريقة ثانية أنك بـ تروح لسوق المواشي، وكل محافظة لها
السوق بتاعها، وعلشان تشتري صح وما حدش يضحك عليك بغش الخرفان (إما علشان يرفع
سعرها أو يخلص من التعبان منها) فيه قاعدة أساسية أنك عمرك ما تشتري من باعة
متجولين، يا إما حد تعرفه وإما السوق ده، ولما تروح بـ تضغط على جنب بطن الخروف
علشان تتأكد أن البائع ما شربوش مياة كثيرة علشان يزيد حجمه، وانتقي الخروف نشيط
الحركة وتأكد أن قوائمه سليمة ومش بـ يعرج، كمان افحص رقبته علشان تتأكد أن
مافيهاش دمامل ولا فيه إفرازات من فمه أو أنفه –ده بجد- ومش بـ ينهج أثناء التنفس.
وببساطة ممكن تعرف حجم اللحوم فى خروف لو لمست سلسلة ظهره لأنه لو ممتلئ هـ تشعر
بالعضلات ولو العكس هـ تحس بالعظام. وآخر حاجة بـ يكون فيه فحص للأسنان اللبنية
للتأكد من عمره لأن يقال أن الزيادة في العمر بـ تؤدي إلى فقدان نعومة وطراوة
اللحم (العمر الملائم للذكور من 1: 2 سنة، وللإناث من 8: 12 شهر).

لو مالكش في موضوع الفحص والشراء والتوزيع وعاوز حد متخصص
يتولى مسئولية الموضوع ده فيه نظام “صكوك الأضحية” اللي بـ تعمله كذا
جهة وفيه ناس كثير بـ تلجأ له، وهو أنك بـ تدفع قيمة الصك سواء عند الجهة المتولية
الموضوع أو من خلال بنك، واللي أجازته دار الإفتاء شرعًا، وفيه جهات بـ توزع كمية
اللحم كلها على المحتاجين وفيه اللي بـ تعطيك نسبة منها والباقي بـ يروح للغلابة. ودي
بعض الأماكن اللي بـ تقوم بالموضوع ده:

جمعية الأورمان الخيرية:

جمعية الأورمان السنة دي عاملة خطة طموحة ترتكز على 25 ألف
صك أضحية بهدف توصيل لحوم الأضاحى لـ 2 مليون غير قادر في قرى ومحافظات مصر
المختلفة لأنها كمان بـ تتعاون مع أكثر من7500  جمعية أهلية فى 16 محافظة بوجه
قبلى وبحرى، قيمتها السنة دي بـ 1390 جنيه للأضحية البلدي و990 جنيه للمستورد، لما
بـ تكلمهم على الخط الساخن 19455 بـ يجي لك مندوب لحد باب بيتك وبـ يعطيك إيصال وبـ
تمضى على توكيل أى أنك وكلت جمعية الأورمان بالذبح، وكل اللحم بـ يروح للمحتاجين
يعني مش بـ تأخذ منه جزء. ولو عاوز تعرف معلومات أكثر زور موقعهم
على الإنترنت.

بنك الطعام المصري:

بنك الطعام بقى لهم خبرة 6 سنوات في الموضوع ده، بـ يوصلوا
اللحم برضه للمحتاجين مهما بعدت المسافة، صك اللحم البلدي بـ 1100 جنيه والمستورد
بـ 700 جنيه، بـ يتم دفعهم في حساب صك الأضحية التابع للبنك في كل فروع بنوك مصر،
والمصرف المتحد، وبنك BNP Paribas، وفي حالة أنك أختارت الصك الأول (اللحم البلدي) بـ تأخذ 5 كيلو
لحم النسبة بتاعتك ثاني أو ثالث أيام العيد، لكن اللحم المستورد كله بـ يتوزع.

قبل ما تروح تدفع كلمهم على 16060 لأن فيه عدد محدود
للصكوك وممكن يكونوا خلصوا وآخر ميعاد يوم 5 نوفمبر، وممكن تعرف معلومات أكثر عن الصكوك
أو أماكن الدفع من موقعهم
الإلكتروني.

جمعية رسالة:

مع رسالة بـ تدفع 700 جنيه صك لحم عجول برازيلي، وكل اللحم
بـ يتوزع، ممكن تدفع في أي فرع من فروع
رسالة القريبة منك أو ممكن يأتي لك المندوب لحد باب البيت وآخر ميعاد يوم
الوقفة، كلمهم على الخط الساخن 19450.

نقابة الأطباء:

النقابة عملت الموضوع ده لكن على نطاق أكبر، اللحم مش هـ
يروح لغير المحتاجين داخل القاهرة والمحافظات فقط، لأ ده كمان هـ يروح للمحتاجين
في الصومال ودول إفريقيا الفقيرة وفلسطين وباكستان.

بالنسبة للصومال صك الخروف بـ 400 جنيه، ولدول إفريقيا
الفقيرة صك الخروف بـ 500 جنيه، لباقي الدول اللي ذكرناها أنت بـ تشترك في 1/7 عجل
(يعني أنت واحد من سبعة أشخاص)، ثمن صك 1/7 عجل لفلسطين بـ 1950 جنيه، وبـ 1750
جنيه 1/7 عجل داخل مصر، وصك باكستان لـ 1/7 عجل بـ 500 جنيه.

الدفع بـ يكون في مقر النقابة فى 42 شارع القصر العيني،
لجنة الإغاثة والطوارئ، اتحاد الأطباء العرب، دار الحكمة من الساعة 8 الصبح لحد 11
مساءً.

جمعية مصر المحروسة:

صك الأضحية عندهم بـ 600 جنيه والذبح بـ يكون بعد الصلاة،
والدفع أقصى يوم الثلاثاء وبـ يكون في أى فرع من فروع الجمعية الـ 15 داخل القاهرة
وفي المحافظات، أو تكلمهم وتروح الفرع
الرئيسي من الساعة 8:30 صباحًا لحد 3 عصرًا.

 

أهم حاجة طبعًا ما نوصيكوش الاعتدال في أكل اللحم في العيد
وربنا يعوده عليكم بالخير والثواب.

وكل عيد وأنتم طيبين 🙂