The Definitive Guide to Living in the Capital , Cairo , Egypt

الحياة في كايرو

خمس حاجات ممتعة ممكن تعملها وأنت في وسط البلد

خمس حاجات ممتعة ممكن تعملها وأنت في وسط البلد
    بواسطة
    Mostafa Fathi Abdelfadil

    ومين ما بيحبش وسط البلد؟ المنطقة اللي رغم كل شيء لسه محافظة على أصالتها وأماكنها المميزة، تخيل كده القاهرة من غير وسط البلد! صعبة؟ طبعًا صعبة ده كفاية الخمس حاجات الممتعة اللي ممكن تعملهم هناك ومش هيكلفوك فلوس كتير.. إيه الخمس حاجات دول؟ انزل السطر الجاي وأنت هتعرف.

     

    سينما زاوية وأفلامها الحلوة

    فكرة أن يكون فيه سينما بتعرض أفلام مهرجانات وتجارب سينمائية مستقلة دي حاجة تستحق التحية والله، كتير بنكون عايزين نهرب بدماغنا من الأفلام الأمريكية والعربية التجارية السخيفة اللي مصممة على خلطة الأكشن أو الرقاصة أو قصة الحب المكررة المملة! سينما زاوية بتعرض لنا أفلام حلوة تم اختيارها بعناية، وبنشوف فيها كمان مجموعة تجارب سينمائية شبابية جديدة وغير كل الأفلام المعروضة في باقي السينمات. وتذكرة السينما مش غالية 25 جنيه بس. وعنوانها ما يتوهش: خلف سينما ريفولي بالقرب من مول طلعت حرب وأمام جراج البستان.

     

    مولات وسط البلد البسيطة

    بعكس المولات الضخمة في القاهرة اللي فيها سلاسل محلات عالمية أسعار ملابسها تصيب بالصدمة هتلاقي في مول طلعت حرب ملابس شيك وحلوة وسعرها مناسب جدًا، المول مليان محلات وده بيديك فرصة تختار اللي يناسب ميزانيتك وذوقك، وبالقرب من مول طلعت حرب هتلاقي مول البستان اللي فيه عدد ضخم من محلات الكمبيوتر، واللي منها تقدر تشتري كمبوتر أو لاب توب بسعر رخيص، كمان هتلاقي محلات صيانة فورية كتير جدًا.

     

    مكتبات كتير لعشاق الكتب

    ولو بتدور على كتب نادرة ومش لاقيها أكيد أكيد هتلاقيها في مكتبات وسط البلد، الشروق ومدبولي وتنمية وليلى وعمر بوك ستور، وغيرهم كتير! آلاف العناوين لكتب حلوة هتبسطك أكيد. ده غير بياعين الكتب على الرصيف اللي عندهم الأسعار أقل كتير -رغم أننا ما بننصحش حد يتشري كتب مضروبة- علشان حقوق الملكية الفكرية.

     

    عشاق التصوير هيستمتعوا

    وسط البلد فيها مباني قديمة ومهمة كتير، ودي فرصة حلوة لعشاق التصوير الفوتوغرافي يمارسوا هوايتهم، مش بس المباني هي اللي تستحق التصوير دي التماثيل في الميادين، والنيل والمراكب ماشية فيه.

     

    القهاوي

    وطبعًا مستحيل ننسى القعدة على القهوة، ووسط البلد مليانة قهاوي حلوة وبتفكرك بالماضي، إحنا مثلًا بنعشق القعدة على قهوة أفتر إيت وناكل سندوتشات من عند دهب اهشر بنت مصرية بتعمل أكل بيتي رخيص من اللي قلبك يحبه، والعنوان سهل، شارع محمود بسيوني والشارع ده أمام المتحف المصري، وممكن تدخل له من ميدان طلعت حرب! أيوة هو الشارع اللي على ناصيته جروبي. وعندك كمان قهوة زهرة البستان اللي رورا ريش كافيه في شارع طلعت حرب، ده غير قهوة التكعيبة وغيرهم كتير.. من الآخر قعدة على القهوة يعني وسط البلد.

     

    مقترح