The Definitive Guide to Living in the Capital , Cairo , Egypt

دليلك لسينمات الـ VIP في القاهرة
    بواسطة
    Omar Abd-elmaqsoud

    دخول السينما والفرجه على فيلم فيها تجربة مختلفة ومش بنعملها كل يوم، ودايمًا لما بنعملها بتسيب أثر طويل لحد التجربة اللي بعدها، ويمكن في تجارب في سينمات عمرنا ما بننساها مهما طال الزمن.

    علشان كده دور السينما في أي حته في العالم، بتتنافس على إن تجربة دخولك ليها لازم تكون مميزة وماتتنسيش، مش بس من ناحية الأفلام اللي بتختار تعرضها، لأ كمان من ناحية الرفاهية والراحة و”الدلع” اللي ممكن تقدمه ليك.

    والسينمات في القاهرة كمان قدرت إنها تنافس على مستوى عالي من توفير أقصى درجات الراحة والفخامة والرفاهية، علشان تعيش تجربة مش سهل أبدًا إنك تنساها.

    في الموضوع ده هنضرب سبوت على أفخم سينمات القاهرة، واللي بتقدم خدمات (VIP) لروادها حسب تصنيف موقع الوطن:

    • سينما سيني كومفورت – أمريكانا بلازا:

    قاعاتها السينما دي مجهزة بكراسي كبيرة ومساحات أوسع ما بينها، علشان توفر تجربة مشاهدة ممتعة للمشاهدين، ويمكن دي المواصفات المشتركة في معظم سينمات الـ (VIP).

    • سينما VOX Gold مول مصر:

    المميز في السينما دي هو إن فيها مطعم جوه، يعنى ممكن تطلب أكل جوه القاعة عادي، لأ وممكن تاكل وأنت بتتفرج كمان، والتقيل بقى إنك ممكن تفرد الكراسي وتحولها لسرير نوم كمان.

    • سينما 4DX:

    وده نوع تاني خالص من السينما في مصر، وموجود برده في مول مصر، والنوع ده من السينمات بياخدك معاه لجو الفيلم حرفيًا من خلال المؤثرات الموجودة مع الفيلم حواليك، سواء هوا أو مطر أو روايح أو البرق والدخان أو الغيوم،وده النوع الأول من المؤثرات المتعلق بالجو المحيط، وبتطلع من مراوح جانبية متثبته في جنبين شاشة العرض، وبتديك إحساس بنسمات الهوا وبالأعاصير.

    والنوع التاني من المؤثرات اللي بتقدمه السينما دي تحديدًا متعلق بالكرسي نفسها، الكراسي بتتحرك في كل الاتجاهات حسب الفيلم واللي بيتفرج عليه، ده غير الاهتزازات والضربات الخفيفة واللي بتبان أوي في لقطات هبوط الطيرات مثلًا أو لقطات الحروب والمواجهات.

    • سينما صن سيتي VIP:

    السينما دي فيها نظام صوت  Dolby atmos، وهي تقنية بتديك صوت بمحيط 360 درجة في صالة العرض، وفيها عدد كراسي قليل وطبعاً فاخرة ومريحة، ده غير إنه لايسمح فيها بدخول الأطفال أقل من 12 سنة، علشان توفرلك أكبر قدر من التركيز.

    • سينما جالاكسي كايرو فيستيفال VIP:

    كراسي صالة العرض في سينما جالاكسي مريحة جداً وشبه السرير، وتقدر تغير وضعيته وتتحكم فيه من زراير على الجانبين، بالإضافة إلى ترابيزتين، واحده بين الكراسي، والتانيه علشان تحط عليها متعلقاتك الشخصية، ده غير إنه ممنوع دخول الأطفال أقل من 6 سنين.

    • سينما جولدن ستارز VIP:

    سينما جولدن VIP في سيتي ستارز مول تعتبر أفخم وأغلى سينمات القاهرة؛ وده لإنك ممكن جدًا تتفرج على الفيلم اللي بتحبه وانت قاعد على كرسي الـ Lazy Boy مع مساحة كبيرة بين الكراسي أكبر من المساحة بين الكراسي في أي سينما تانيه، ده غير إنك ممكن تاكل وتشرب جوه الصالة، لكن الميزة الأهم بقى هي أن الـ VIP بتعرض دايمًا أحدث وأقوى الأفلام المعروضة في السينمات.

    مقترح