The Definitive Guide to Living in the Capital , Cairo , Egypt

الحياة في كايرو

دليلك للاستمتاع في وسط البلد الحبيبة

دليلك للاستمتاع في وسط البلد الحبيبة
بواسطة
Mohammed Sabry

لو عاوز تنزل تتفسح مع أصحابك أو لوحدك، في مكان فيه كل حاجة ومواصلاته سهلة، يبقى وسط البلد هي المكان اللي بتدور عليه. علشان تقريبًا فيها كل حاجة انت محتاجها في أي خروجة. إحنا بقى جمعنا لك كل حاجة ممكن تعملها في وسط القاهرة في المقال ده:

السينما والمسرح

مفيش خروجة مابتكونش السينما جزء منها. أو على الأقل تكون حاجة مقترحة. أنت في وسط البلد عندك سينمات كتير زي: مترو – ميامي – كوزموس – هيلون رمسيس. وكمان سينما زاوية اللي بيكون فيها عروض لأفلام أروربية وأفلام مهرجانات.

أما بقى لو حبيت تجرب المسرح، مفيش مشكلة. عندك: البيت الفني للمسرح – مسرح الفن جلال الشرقاوي. يعني ماتقلقش، كله موجود في وسط البلد.

 

المطاعم والأكل

إحنا اللي يخرج مننا وماياكلش يبقى ماخرجش، معروفة. الأكل ده ركن أساسي في أي خروجة. وسط البلد مليانة مطاعم زي هارديز – كنتاكي – ماكدونالدز. وكلهم جنب بعض في ميدان التحرير وشارع محمد محمود. لو أنت غاوي حاجة كده شعبي في اللذيذ، تقدر تاكل من كشري التحرير، أو أبو طارق. أما لو نفسك في حاجة حرشة، يبقى عليك وعلى القزاز.

 

الكافيهات والقهاوي

لو طلبت معاك قعدة كده هادية في كافيه، برضه وسط البلد عاملة حسابك. هتلاقي الأمريكيين في شارع عماد الدين وشارع طلعت حرب. وجروبي في ميدان طلعت حرب. وكمان عندك سيلينترو وبينوس في محمد محمود. ولو أنت صاحب مزاج وغاوي قعدة قهاوي، يبقى لازم تعدي على البستان وغزال والتكعيبة وأفتر إيت. دول علامات القهاوي في وسط البلد.

 

شراء الهدوم

لو بتفكر تشتري هدوم وانت في وسط البلد، اتطمن مش هتغلب. عندك مول طلعت حرب في شارع طلعت حرب، غير المحلات الموجودة شمال ويمين. ممكن تكون وسط البلد مش أحسن حاجة في الهدوم، لكن وانت بتدور وسط المحلات أكيد هتلاقي اللي يعجبك.

 

شارع طلعت حرب والأيس كريم

ممكن بقى تفك دماغك من أي حاجة، وتتمشى بس في طلعت حرب. صحيح ممكن يكون زحمة حبتين، بس طلعت حرب وشوارع وسط البلد لها مود خاص كده، مش هاتحسه غير فيها. ويا سلام بقى لو بولتين أيس كريم من العبد أو قويدر. كده انت ملكت الدنيا يا معلم

 

بالنسبة للمواصلات، طبعًا أنسب حاجة لوسط البلد هي المترو، تنزل السادات أو العتبة أو محمد نجيب. ومنهم تنطلق. إنما لو معاك العربية، تقدر تركنها في جراج التحرير أو البستان. وبتكلفة معقولة.

خروجة سعيدة في وسط البلد 

الصورة الرئيسية في الموضوع لـ Daniel Mayer

مقترح