The Definitive Guide to Living in the Capital , Cairo , Egypt

كل سنة وأنتم طيبين، وتكونوا في الجو السقعة ده مبسوطين، وبـالويك إند مستمتعين، وفي 2020 مزقطتين، وعلشان الويك إند مايحلاش إلا بالخروج والحفلات، ولإن “كايرو 360” دليلكم للانبساط والفرفشة، هنقولكم على أهم الحفلات اللي ممكن تحضروها في القاهرة أيام “الخميس – الجمعة – السبت” وبنفكركم بأهمية مراجعة حالة الطقس قبل الخروج علشان تختاروا الملابس المناسبة.

الخميس.. بداية الويك إند هتكون موسيقية بامتياز، مع الموسيقار الكبير “نصير شمة” اللي هيقدم حفلة جديدة الساعة 8 بالليل في ساقية الصاوي، وأسعار التذاكر (107 – 127 – 147 – 167 – 187) جنيه.

كمان لو أنتم من محبي التراث النوبي، تقدروا تستمتعوا مع كوكتيل من الموسيقى والرقص اللي بتقدمهم فرقة “نوبا نور” الساعة 8 مساءً، على مسرح الضمة بتذكرة سعرها 50 جنيه.

والساعة 8 برده دار الأوبرا المصرية، هتستضيف “منى بوركهارد” و”أوركسترا لاس إينكانتادوراس” وهيقدموا لنا عرض فلكلور أسباني. سعر التذكرة: 110 جنيه.

أما يوم الجمعة.. الساعة 10 بالليل في فندق “هيلتون مصر الجديدة” هتطل علينا الفنانة الكبيرة أصالة في حفلة مميزة. أسعار التذاكر (850 – 1500 – 2000) جنيه.

وعشاق المسرح هيبقى معادهم الساعة 9 مساءً في مسرح “كايرو شو” مع الفنان العبقري “يحيى الفخراني” ومسرحيته “الملك لير“. التذاكر بتبدأ من 150 جنيه لحد 750 جنيه.

كمان هيكون فيه حفلة جاز مميزة مع الفنانة “هنا عفيفي” الساعة 9 بالليل في “رووم آرت سبيس” فرع جاردن سيتي. سعر التذكرة 100 جنيه.

يوم السبت.. الفنان “محمد صبحي” هيكون موجود على مسرح “مدينة سنبل” الساعة 7 بالليل علشان يقدم لنا عرض جديد لمسرحية “خيبتنا“. سعر التذكرة بيبدأ من 200 لحد 700 جنيه.

أما مسرح الهناجر في دار الأوبرا المصرية هيستضيف عرض ومناقشة فيلم “فريدة” للمخرج “أحمد الشال”، وهيكون الحضور مجاني.

وبدءًا من الساعة 2 الضهر الشيخ زايد هتكون على معاد مع أكبر تجمع موسيقي للأصوات المستقلة في الشرق الأوسط، وعلى رأسهم “دينا الوديدي” و”كاريوكي” في حفلة “ميدل إيست ميوزيك” وسعر التذاكر 240 و400 جنيه.