The Definitive Guide to Living in the Capital , Cairo , Egypt

الحياة في كايرو

دليلك لويك إند سعيد.. اعرفوا أجمل حفلات عيد الحب في القاهرة

بنت الجيران بهاء سلطان تامر حسني حفلة خروجة ساقية الصاوي شاكوش عيد الحب فلانتين ويك إند
دليلك لويك إند سعيد.. اعرفوا أجمل حفلات عيد الحب في القاهرة
    بواسطة
    Cairo 360

    الويك إند ده مختلف وسعيد فعلًا، لأسباب كتير، منها إنه أخيرًا هتبقى الدنيا دافية بعد أسابيع من السقعة، وبالتالي هتقدروا تخرجوا في القاهرة بكل حرية، كمان الحفلات في الويك إند ده مميزة، علشان كده لازم تستمتعوا بالجو الجميل المنعش، وتخرجوا وتنبسطوا، وإحنا في السطور الجاية هنقول لكم على أهم الحفلات والأحداث اللي ممكن تحضروها في العاصمة في الويك إند.

    نبدأ بالنهارده الخميس.. وعلشان الفلانتين والحب، فرقة رومانس هتبدع في ساقية الصاوي الساعة 7 مساءً، وسعر التذكرة 77 جنيه.

    الساعة 9 مساءً، هيكون معادكم مع مزيج موسيقي مختلف هتقدمه فرقة كهارب في رووم آرت سبيس جاردن سيتي، وسعر التذكرة 100 جنيه.

    ولهواة الفنون الشعبية والرقص المعاصر، فرقة رضا هتكون موجودة الساعة 9 مساءً، في مسرح البالون، وسعر التذكرة بيبدأ من 50 جنيه، وبيوصل لحد 150 جنيه.

    أما يوم الجمعة.. واللي هيوافق يوم عيد الحب، تقدروا تحضروا Valentines Festival من الساعة 3 العصر، واللي هيشارك فيه النجوم تامر حسني، نانسي عجرم، وائل جسار، أحمد شيبة، حسن شاكوش، وبهاء سلطان، والمهرجان هيكون في ستاد القاهرة الدولي، بتذاكر سعرها 75، 100، 200، 500 جنيه.

    وكمان الساعة 7 مساءً، شقة جاردن سيتي هتعرض الفيلم الرومانسي Marriage Story  وهو من إنتاج نتفليكس 2019، وسعر التذكرة 35 جنيه ومعاها شامل باكيت فيشار.

    وفي كايرو شو، هيكون فيه حفلة مختلفة الساعة 7 مساءً، “ليلة عيد الحب” اللي هيشارك فيها ماجد المهندس وآمال ماهر وتامر عاشور، بتذاكر سعرها 750 – 1000 – 1500 جنيه.

    أما يوم السبت.. الساعة 7 مساءً، هيكون فيه عرض لفيلم “الواجب” في سينما زاوية، وهو دراما كوميدية فلسطينية من إخراج آن ماري جاسر، ضمن برنامج السينما العربية.

    ولو أنتم من هواة الموسيقى العربية بذوقها وجمالها فتقدروا تحضروا حفلة “الفن الصادق” الساعة 7 مساءً، بتذكرة سعرها 57 جنيه.

    ولكل عشاق الجاز، فرقة رباعي نهى فكري هتبدع في رووم آرت سبيس الساعة 9 مساءً، في ليلة جميلة بتذكرة سعرها 100 جنيه.

    ويك إند سعيد يا أهل كايرو!

    مقترح