The Definitive Guide to Living in the Capital , Cairo , Egypt

بدأتم الويك إند بدري يومين زينا؟ إحنا بـ نكتب لكم الدليل الأسبوعي المرة دي وإحنا في الأجازة اللي بدأناها من يوم عيد العمال ولضمنا فيها النهارده علشان تكمل لحد يوم الاثنين اللي هو شم النسيم، لكن إحنا متعاطفين مع الناس اللي نزلوا الشغل النهارده وفصلوا أجازتهم الطويلة بيوم عمل الثانية فيه بـ تعدي سنين.. يوم الخميس العظيم! بس بـ نطمأنكم.. ما فاتكوش كثير.. فيه عدد لا بأس به من الأحداث والحفلات مستنية الكل النهارده وبكرة وبعده وفيه كام حفلة كمان أيام الأحد والاثنين هـ تلاقوهم على أجندة موقعنا، كل الكلام ده طبعًا في كايرو، لكن لو شديت الرحال على السخنة ولا الساحل ولا شرم ده موضوع ثاني.

الليلة دي فيه حفلات كثير جدًا على كل المسارح في كل المراكز الثقافية، نبدأ بحفل مميز لفريق أول مرة بـ يزور مصر وهو فريق آخر زفير من الأردن اللي بـ يقدم موسيقى الروك البديل Alternative Rock باللغة العربية. شوفنا أغانيه على اليوتيوب وعجبنا جدًا وبـ ندعوكم للاستمتاع بحفلهم الليلة دي على مسرح الجنينة في حديقة الأزهر. تذاكر الحفل بـ 20 جنيه بخلاف تذكرة دخول الحديقة “7 جنيه” وهـ يبدأ الساعة 8 مساءً وتفتتح الحفل الفنانة مي وليد بجموعة من أغانيها وأعمالها الخاصة. 

ثاني حفل في بيت الرصيف اللي هـ يستضيف نغم صالح في حفل يضم أغاني تراثية بـ تقدمها بشكل مختلف المتأثر بالموسيقى الفولكلورية، وضيفة شرف الحفل شقيقتها مريم صالح، سعر التذكرة 20 جنيه.

على المسرح المكشوف بدار الأوبرا هـ تقدم الفنانة والمتسابقة ببرنامج The Voice إنجي أمين أول حفلاتها الغنائية بقيادة المايسترو د. ماجد سرور، التذاكر متاحة لدى شباك الحجز.

وعلى المسرح الصغير وفي نفس التوقيت هـ يكون فيه حفل للفنان يحيى خليل وفرقته، وأكيد هـ يلعبوا مجموعة الأغاني من مؤلفات يحيى الخاصة اللي له قاعدة جماهيرية كبيرة، التذاكر متوفرة والحفلات تبدأ الساعة 8 مساءً.

نروح لساقية الصاوي وبـ نفكركم أن النهارده أول خميس في شهر مايو يعني ميعاد حفلة الست، عرض مسرح عرائس لحفل أم كلثوم في ميعاده في قاعة الحكمة في الساقية. الدخول الساعة 8 مساءً والتذاكر بـ 5 و10 جنيه.

وبعيداً عن المزيكا النهارده فيه حفل توقيع لديوان شعر في دار ميريت للنشر للكاتبة أميرة الأدهم. الديوان بعنوان “تفقد عذريتها على مهل” ويدير اللقاء عبد الحكم سليمان والدعوة عامة.

وبدءًا من يوم الثلاثاء اللي فات مركز درب 17 18 بـ يستضيف معرض فني بعنوان “إحياء الموضة: إعادة تدوير الهويات والذكريات” لتقديم منتجات الورشة اللي أُقيمت في نوفمبر 2012، يشارك في المعرض الفنانين: همس ربيع وسلمى خليل ونورا أبو العيون ونهى فهمي ودعاء بيجاتو وتشارك أعمال فنية إضافية لعدد من الفنانين المعاصرين وهم: صوفيا أحمد ومي الحسامي وموناز عبد الرؤوف وكارينا شلبي وكيغام ديجيغاليم. المعرض مستمر لحد يوم 31 مايو اللي جاي.

يوم الجمعة بقى، اللي هو بكره، بقى لنا كثير ما كتبناش عن سهرات الدي جي في كايرو جاز كلوب وغيرها من الأماكن، فيه حفل مش عادي وسهرة خاصة مع DJ Madlou وزعيم الدي جي في مصر DJ  عمرو حسني اللي هـ يلعبوا تراكات هاوس وتكنو هاوس تجنن، الحجز ضروري في كايرو جاز طبعًا، احجز من النهارده.

مش هـ ننسى الثقافة الأسبوع ده وبـ نقول لكم على ندوة مهمة تستضيفها ساقية الصاوي بكرة في قاعة الكلمة بعنوان “الحريات قبل الثورة وبعدها” في إطار الاحتفال باليوم العالمي لحرية الصحافة، تناقش الندوة وضع حرية الصحافة قبل ثورة يناير 2011 وبعدها، الدعوة عامة.

وبكرة السبت تقيم ساقية الصاوي فعالية ثقافية مهمة في قاعة الكلمة وهو لقاء يجمع بين أدباء مصر والهند وعقد حوار بينهم يتناول الاختلافات والتشابه بين الأدب المصري والهندي ووضع الأدباء المصريين والهنود، الدعوة عامة.

تابعوا أجندة موقعنا كل يوم هـ تلاقوا عليها جديد بالذات الحفلات والفعاليات اللي هـ تكون في أيام الأعياد اللي جاية، وكل سنة ومسيحيين مصر بخير وسلامة بمناسبة عيد القيامة المجيد وكل سنة وكل مصر بخير بمناسبة شم النسيم. ونشوفكم الأسبوع اللي جاي على خير.