دليل أحداث نهاية الأسبوع: أحمد عدوية ومريم صالح وفرقة يوركا ومعرض فوتوغرافيا
Cairo 360
مساء الخير يا قاهرة.. أخبار الانتخابات والاعتصامات والشوارع والزحمة إيه؟
ناويين تنزلوا ولا نخليها الأسبوع اللي جاي؟ لأ أكيد هـ ننزل ما إحنا اتفقنا أن
اللي تقدر تعمله النهاردة ما تخليهوش لبكرة اللي بقى صعب نخمن هـ يبقى عامل إزاي.
بـ نفكركم أن بطولة كأس الأمم الأوربية هـ تبدأ بكرة وتقريبًا كل الكافيهات
والمطاعم والقهاوي كمان هـ تعرض المباريات. فرصة الناس تتجمع في حاجة ثانية غير
السياسة ولو على سبيل التغيير أو أخذ هدنة، شجع فريقك وتابع كايرو 360 وهـ نقول لك
من خلالها على أماكن تتفرج فيها على الماتشات وهـ ننقل لك تجربتنا في الأماكن دي.
نتكلم بقى عن الأحداث اللي معانا الأسبوع ده. عندنا حفل ظريف لفرقة سيتي باند في مسرح الجنينة في حديقة الأزهر. الفرقة
تعتبر من أحسن الفرق اللي بـ تقدم موسيقى مصرية معاصرة وحصلت على الجائزة الأولى
في مهرجان مخصص للنوع ده من الموسيقى السنة اللي فاتت. هـ يكون في ضيافة الفريق
عازف آلة الكلارينت السوري كينان عزمة. الحفل هـ يبدأ الساعة 8 مساءً وسعر التذكرة
10 جنيه بخلاف رسوم دخول حديقة الأزهر نفسها.
على مسرح الفلكي في وسط البلد هـ يكون عرض راقص الليلة
دي بعنوان Donkey Farm من إخراج محمد شفيق. العرض هـ
يبدأ الساعة 8 مساءً والدخول مجانًا.
في درب 17 18 في مدينة الفسطاط في مصر القديمة هـ يكون
فيه حفل المغنية مريم صالح اللي كانت بـ تغني
قبل كده في فرقة “بركة”، ومعاها لأول مرة مغني موسيقى الإندي بوب العربي
الفنان زيد حمدان. والإندي بوب Indie Pop هو نوع من الموسيقى الهادئة اللي
بـ تتقدم من خلال إنتاج مستقل وكلماتها بـ تعبر عن أفكار منتجيها أو مقدميها.
الحفل هـ يبدأ الساعة 8 مساءً وسعر التذكرة 20 جنيه.
يوم الاثنين اللي فات كان افتتاح معرض للفنانة
الفرنسية مونيك أبو غزالة في دار الأوبرا في القاعة الرئيسية للفنون التشكيلية.
المعرض بعنوان (رؤيا وحراك) وبـ يضم أعمال
زيتية وأكريليك والمعرض مستمر لحد يوم 13 يونيو. بـ نرشحه لهواة الفن التشكيلي.
معرض ثاني لهواة الفوتوغرافيا للفنان محمد مجدي هـ يقام
بقاعة الأرض في ساقية الصاوي ومستمر لحد يوم 9 يونيو، المعرض بعنوان Captivity والدخول متاح للجميع.
النهاردة الساعة 7 مساءً في قاعة النهر في ساقية الصاوي
فيه حفل ستاند آب كوميدي هـ يقدمه عدد من
المؤديين منهم وليد أبو المجد، وصلاح
الدالى، وعلاء حسن، ومصطفى السعيد واسماعيل
مصطفى.
دعوة للضحك وسعر التذكرة 10 جنيه فقط.
نروح
بقى لكايرو جاز كلوب والليلة دي روك أند رول وPsychedelic
Rock مع فرقة The Jokers اللي حصلت على المركز الأول قبل كده في مهرجان الساقية لموسيقى
الروك. وبعدهم في نفس البرنامج فرقة ديجا فو لحد آخر السهرة. الحجز ضروري في كايرو
جاز.
فرقة الحياة المسرحية هـ تقدم عرض مسرحي على مسرح روابط
بوسط البلد بعنوان (كابوس كومبارس)
النهاردة الساعة 8 مساءً، العرض إخراج أحمد عبد الفتاح.
يوم الجمعة في أوبيم الموجود في سراي الجزيرة في
الزمالك هـ يكون فيه حفل من نوع خاص. أحمد عدوية
شخصيًا هـ يغني لايف طول الليل، ارجع 30 سنة وأكثر واستمتع بأحلى أغاني ملك
الأغنية الشعبية. الدخول بـ 250 جنيه والحجز مهم.
على مسرح الجنينة يوم الجمعة فيه حفل للفنانة الفلسطينية
هدى عصفور. هدى بـ تعزف على العود وبـ تقدم
موسيقتها الخاصة، ومتوقعين أن الحفلة تعجبكم لأننا عارفين أن هدى فنانة
متميزة. تذكرة الدخول بـ 10 جنيه.
موسيقى أندلسية وكلاسيكية في قاعة الحكمة في ساقية
الصاوي هـ يقدمها الفنان عبد المنعم سعيد وفرقة يوركا.
الفرقة لها ألبومات في السوق وموسيقتهم فريدة من نوعها وبسهولة بـ تؤثر في وجدان
اللي يسمعها. بـ نرشح الحفلة دي للسميعة.
يوم السبت فيه عرض تنورة
شبه ثابت في وكالة الغوري، يعني ممكن تدخل تتفرج على العرض المبهر بعد شوية تمشية
في الأزهر وخان الخليلي.
وفي كايرو جاز يوم السبت هـ يقدم الفنان النوبي بشير
مجموعة من الأغاني والمقطوعات الشرقية والجاز بمصاحبة فرقته الموسيقية، هـ تعجبكم
أكيد بس بشرط تحجزوا قبل ما تروحوا.
فيه عدد من المعارض اللي لسه مستمرة من بداية الأسبوع في
أماكن مختلفة وبعض عروض الموسيقى العربية والكلاسيكية بدار الأوبرا وندوات بمراكز
ثقافية، ممكن تعرفوا تفاصيلها من خلال أجندة موقعنا،
ونشوفكم على خير الأسبوع اللي جاي.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
