The Definitive Guide to Living in the Capital , Cairo , Egypt

أسبوع عصيب مليان أحداث ومفاجآت وشد وجذب، ما كناش نعرف قبل سنتين من دلوقتي
أن السياسة ممكن تأثر في حياتنا وتشد انتباهنا للدرجة دي. وفي النهاية تمنياتنا
للبلد دائمًا بالخير وإحنا تعودنا نكون على الحياد من الأحداث اللي وراء بعضها بس
ثقتنا في ربنا كبيرة وبعدها تيجي ثقتنا في الشعب المصري كله. والأهم من ده كله
أننا أخيرًا هـ يبقى عندنا رئيس منتخب بإرادة حرة ولازم يحصل توافق بين الجميع
علشان نوصل لبر الأمان. هـ نحاول نخرجكم من الموود شوية ونقول لكم على الأحداث
الثقافية الموجودة في أيام الويك إند بسرعة كده.

حفلات فرقة الطنبورة رجعت ثاني
الأسبوع ده في القاعة اللي بنفس الاسم في وسط البلد، فولكلور وأغاني شعبية
وتراثية، التذكرة بـ 20 جنيه.

النهاردة الساعة 8 مساءً ممكن تروح وتحضر حفل مجاني لفرقة (باز) اللي بـ تلعب روك وهـ تقدم أغاني لفرق زي Maroon
5  وDave Matthews Band وبعديهم هـ تلعب فرقة روك اسمها “دابل برل”. الحفل في
مكتبة بيكيا فرع المعادي.

هاني مصطفى بـ يلعب
أغاني من تأليفه على الجيتار، وفريق “كراش بوم بانج” بـ يلعب أشهر أغاني الفانك.
الاثنين في برنامج واحد الليلة دي في كايرو جاز كلوب، الحفل هـ يبدأ الساعة 10
مساءً والحجز مطلوب.

كل يوم خميس في أفتر 8 اللي في وسط البلد ممكن تحضر
حفلة لفرقة سلالم المميزة. فيه حد أدنى
للطلبات 100 جنيه.

على مسرح روابط في وسط البلد برضه فيه عرض رقص معاصر
بعنوان (قال يعني حفلة) من إخراج حازم
حيدر وهـ يبدأ الساعة 8 مساءً.

الساعة 8 النهاردة كمان على مسرح الجنينة في حديقة
الأزهر هـ يبقى فيه حفل أغاني راب وموسيقى هيب هوب بـ يقدمه الفنان علي طلباب. تذكرة الحفل بـ 10 جنيه ده غير رسوم دخول
الحديقة نفسها.

في قاعة الحكمة في ساقية الصاوي فيه عرض لمسرح عرائس الساقية بمناسبة ذكرى عبد الحليم حافظ.
العرض هـ يبدأ الساعة 8 مساءً وتذكرة الدخول بـ 10 جنيه و5 جنيه لأعضاء الساقية.

تجربة رائعة ممكن تعيشها مع المزيكا يوم الجمعة بالليل
في حديقة الأزهر على مسرح الجنينة مع حفل تريو نظمي
أو ثلاثي أحمد نظمي، ونظمي هو عازف الباص جيتار ومعاه أحمد هشام على الدرامز ومحمد
عادل على الجيتار. موسيقى أفريقية وجاز وشرقي وأفكار كثيرة في الحفلة دي. بـ
نرشحها بقوة.

يوم الجمعة ولهواة معارض الفنون التشكيلية هـ يكون فيه
معرض لوحات زيتية للفنانة هناء أحمد بعنوان (العودة)
في قاعة الأرض. المعرض مستمر لحد يوم 29 يونيو.

حفل من نوع خاص على المسرح الكبير بدار الأوبرا المصرية
تحييه الفنانة أصالة بمصاحبة أوركسترا
كاملة، وتعود أرباح الحفل لصالح حملة الإغاثة السورية وضحايا المعارك هناك. الحفل هـ يبدأ الساعة 8 مساءً وعلى هامش الحفل
هـ يكون فيه معرض فنون تشكيلية.

يوم السبت فيه عرض التنورة
التراثية الثابت اللي بـ يبقى في أيام السبت والاثنين والأربعاء في وكالة الغوري
في منطقة الأزهر، جو ساحر وموسيقى روحانية فريدة. استمتع بالمكان وبالحفل مجانًا.

في ساقية الصاوي في قاعة النهر يوم السبت هـ يبقى فيه
حفل Rock Nation  لموسيقى الروك، اللي تقريبًا بـ تتكرر مرة أو
مرتين في السنة وكل مرة بـ يظهر من خلالها فرق روك جديدة، فيه 3 فرق حديثة بـ تلعب
هارد روك المرة دي وهي Stargazer وScorched Legacy  وTomcats
والفرقة الحاصلة قبل كده على المركز الأول في مهرجان الساقية لموسيقى الروك Headstock. الحفل هـ يبدأ الساعة 7 مساءً وسعر التذكرة 25 جنيه.

في نفس التوقيت في قاعة الحكمة في الساقية هـ يكون فيه
حفل لفرقة (جرامافون) اللي بـ تقدم
موسيقتها الخاصة المستوحاة من كلاسيكيات الموسيقى العربية، قائد الفرقة هو ضياء
الدين حافظ عازف العود اللي درس في بيت العود العربي.

عروض أفلام سينمائية ومسرحيات وندوات ومناقشات ومعارض
فنية كثيرة في كل حتة شغالة الأسبوع ده، ممكن تعرفوا التفاصيل من على أجندة موقعنا. وأخيرًا ربنا يحفظ مصر وأهلها.