دليل أحداث نهاية الأسبوع: احتفالات سنوية وموسيقى حية في مراكز ثقافية مختلفة
Cairo 360
كل ويك إند وأنتم طيبين، بـ نعد الساعات لحد يوم الخميس ما بـ ييجي، الناس
بقى اللي أجازتهم مش جمعة وسبت بـ نعتذر لهم على الاستفزاز ده، لكن أكيد هـ تلاقوا
على أجندة موقعنا حاجات تعملوها في أيام
أجازتكم، وكل يوم عندنا مقالات عن أماكن تروحوها وأفلام تشوفوها وكتب تقرأوها. وكل
ده في أيام غير الجمعة والسبت.
قبل ما نتكلم عن الأحداث الفنية والثقافية هـ نقترح على الشباب مكان رحناه
وعجبنا جدًا، وبـ نقول الشباب مش البنات علشان اللي عجبنا فيه هو البلاي ستيشن
والـ Xbox مع وجبة خفيفة
من البيتزا أو الباستا، والشباب هم اللي بـ يلعبوا كرة على البلاي ستيشن وهم اللي
بـ يضربوا بيتزا ومكرونة ومش مهتمين أن الدايت يبوظ. المكان هو «ويمبلي» في ساحة طعام أواسيس في مساكن شيراتون. بولة
البلاي ستيشن علينا الخميس ده.
عندنا بقى احتفال مهم في مكتبة «بيكيا»
في مدينة نصر بمناسبة مرور سنة على افتتاحها، والاحتفال هـ يستمر لمدة 3 أيام،
يعني خميس وجمعة وسبت. وهـ يحيي الحفل عدد من الفرق الموسيقية والمغنيين، منهم
Rash
Radio و Like Jelly وهاني مصطفى، وسعر
تذكرة الدخول 10 جنيه فقط.
كمان ساقية عبد المنعم الصاوي هـ تحتفل بالسنوية الخامسة لعرضها المميز “أم كلثوم عادي من جديد” في قاعة الحكمة، وعرفنا أن فرقة مسرح الساقية للعرائس عاملين مفاجآت للجمهور النهاردة، الست النهاردة هـ تغني “أمل
حياتى” و”سيرة الحب”.
في مركز صوفي الثقافي في الزمالك برضه هـ يكون فيه حفل
غناء صوفي للفنان إسلام، وفي قاعة الطنبورة الموجودة في منطقة
عابدين فيه عرض بـ تقدمه فرقة الرانجو اللي بـ تعتبر واحدة من أنجح
الفرق الشعبية اللي بـ تقدم عروضها بالمركز. مش في مصر فقط لكن في جميع أنحاء
العالم. بـ تقدم الفرقة مزيج من موسيقى
الزار المصري والسوداني وتتميز أغانيهم بالتلقائية والحيوية.
لو غاوي موسيقى هيب هوب وR’n’B ممكن تروح «ستيليتو
لاونج» الموجود في الدقي في ميدان الجلاء وتحضر حفل دي
جي فيدو النهارده. بس اتصل علشان تحجز مكانك.
في ساحة روابط في وسط البلد هـ يكون فيه عرض أدائي ورقصات على المسرح
بعنوان عندما نحدق عن كثب في الحساء،
العرض لمدة يومين؛ الخميس والجمعة.
كمان فيه روك أند رول مع فرقة Jailbirds في كايرو جاز كلوب النهاردة بالليل، أغاني روك الستينيات
والسبعينيات، وبعدهم فرقة Bad Mojo وأغاني البلوز لحد
صباح يوم الجمعة، الحجز ضروري.
يوم الجمعة فيه حفل فكرته جديدة في «أوبيم» اللي في مركب بلو نايل في الزمالك،
أغاني الثمانينيات والتسعينيات العربية مع فرقة مافيا
الهاوس العربي.
ونرجع ثاني لساقية الصاوي في قاعة النهر فيه حفل اكتشاف مواهب جديدة و”الدخول على
مسؤليتكم” زي ما مكتوب في برنامج الساقية المطبوع، الحفل الساعة 5 مساءً والتذكرة
بـ 5 جنيه.
يوم السبت ممكن تحضر في كايرو جاز كلوب حفل
فريق “فوق السطوح” وتستمتع بموسيقى الفيوﭼن ﭼاز اللي مش بـ
تقدمها فرق كثير في مصر والحجز دائمًا مطلوب في كايرو جاز.
بينما في قاعة الحكمة في ساقية الصاوي هـ تنطلق فعاليات مسابقة الساقية الثانية
للستاند آب كوميدي، وده هـ يبقى الساعة 6:30 مساءً وسعر التذكرة 15 جنيه.
عدد من المعارض الفنية لسه فعاليتها مستمرة طول فترة الويك إند زي معرض أبيض وأسود في معرض
أرثروبولوجي في الزمالك. ومعرض مسارات جيزية في تاون
هاوس جاليري ومعرض La
Bella Eboque للفنانة كاثرين باخوم في سفر
خان الزمالك.
ياريت ماحدش يستسلم للعواصف الرملية والجو المتقلب وتأكد أن قعدتك في البيت
من غير ما تعمل حاجة مش هـ تأخذ منها غير استنشاق أكبر كم ممكن من التراب، دائمًا
الشارع أفضل وقت العواصف، يلا شوارع كايرو بـ تنادي لك.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
