The Definitive Guide to Living in the Capital , Cairo , Egypt

صباح الخير وأجازة جديدة سعيدة عليكم قرائنا المخلصين؛ ياريت الأسبوع ده يكون عدى عليكم حلو وهادئ زي ما عدى علينا، ومسك الختام يبقى أجازة ظريفة وكام حفلة ومعرض حلوين، هـ نقول لكم حالًا على ترشيحاتنا لخروجات الويك إند ده، بشرط تكونوا موجودين في القاهرة لأن كالعادة كل كلامنا هنا عن “كايرو” وبس..

بـ نفكر حضراتكم أنه تم تجميد كل عروض دار الأوبرا لحد يوم 1 يونيو اللي جاي احتجاجًا على تغيير قيادات الأوبرا الحالية ومحاولات حجم بعد الأنشطة الفنية فيها، وهـ نوافيكم بالأخبار وجدول الأحداث الثقافية في حال عودة النشاط.

البداية من كايرو جاز وحفلات ليلة الخميس المميزة، النهاردة هـ يلعب عازف الجيتار الأكوستك والمغني دانيال ملاك اللي بـ يقدم أغاني بوب وروك هـ وبعده وبعد فترة غياب هـ تلعب فرقة Screwdriver اللي هـ تلعب أحلى كلاسيكيات الروك والبوب. الحجز ضروري. في كايرو جاز لو كنتم ناسيين. 

مسرح الجنينة دائمًا بـ يعطي الفرصة لمواهب جديدة أنها تظهر لجمهور القاهرة، موهبة النهاردة هم طلاب مدرسة الدرب الأحمر للفنون اللي هـ يقدموا موهبتهم على المسرح وتكون بداية كويسة لهم مع فريق بيركشن شو Percussion Show اللي أذهلونا بموهبتهم في برنامج “البرنامج” مع باسم يوسف وكل حفلة بـ يعملوا حاجات أقوى من قبل كده، سعر التذكرة 20 جنيه وهـ يبدا الساعة 8 مساءً ولمزيد من المعلومات اتصلوا بـ 0223637081 .

على مسرح الضمة في وسط البلد ينظم مركز المصطبة للموسيقى الشعبية حفل لفرقة نوبانور اللي بـ تقدم خليط من الموسيقى والرقص والأغاني التراثية النوبية اللي بـ توضح معاناة أهل النوبة بعد عمليات التهجير وحقهم في العودة، سعر التذكرة عند الحجز مقدمًا 20 جنيه وبدون حجز 30 جنيه، يسقط الحجز عند الساعة 9 مساءً.

والليلة دي يستضيف بيت السناري في حي السيدة زينب حفل بعنوان “إسكاليه” وهو عنوان أول ألبوم للفنان النوبي الجميل حمزة علاء الدين اللي فينا كثير، لكن كثير ما يعرفوش مين هو للأسف، يشارك في الحفل عدد من الفنانين وهم: كرم مراد وأحمد العمدة وأحمد إسماعيل، كمان هـ يكون فيه معرض صور فوتوغرافية الفائزة في مسابقة البيت الثقافي النوبي وعرض فيلم قصير عن أهم محطات الفنان الراحل، والدعوة عامة.

نروح لساقية الصاوي اللي بـ تنظم الليلة دي عرض ستاند أب كوميدي لعدد من الفنانين الكوميديين في قاعة النهر، سعر التذكرة 25 جنيه لأعضاء ولغير أعضاء ساقية الصاوي.

بقى لنا كثير ما كتبناش عن سهرات الـ DJ والرقص ومزيكا التكنو والهاوس، بكرة الجمعة ميعادنا مع سهرة جديدة وأكيد جامدة في كايرو جاز كلوب مع DJ Mars و DJ ouzo اللي هـ يلعبوا تراكات مختلفة وعالية قوي، وزي ما قولنا الحجز قبلها ضروري.

ومن العروض السينمائية الأسبوع ده بـ نرشح لكم الفيلم الوثائقي “Waste Land” اللي هـ يعرض بكرة في مكتبة صوفي في الزمالك وهو بـ يتناول القوة الفنية وجمال الروح البشرية مع الفنان المعاصر فيك مونيز، الفيلم من إنتاج سنة 2010.

يوم السبت يستضيف جاليري كالا للفنون حفل توقيع كتاب “قليل البخت يلاقي الدقي في الثورة” من تأليف الفنانة والكاتبة ياسمين الخطيب، يضم الكتاب مجموعة من مقالات الكاتبة في الصحف المصرية واللي بـ تتناول فيها رؤيتها الخاصة للمشهد السياس في مصر من أحداث الثورة وحتى وصول الإخوان المسلمين للحكم، الدعوة عامة.

وكايرو جاز كلوب هـ يستضيف اثنين من الأصوات الجميلة في القاهرة وهم: نهى طه اللي هـ تغني أحلى أغانيها على موسيقى الإندي بوب، وبعدها بشير اللي دائمًا بـ يقدم احلى أغاني فولكلورية بصوته الجميل اللي مش سهل يتكرر، الحجز ضروري.

وفي وكالة الغوري تواصل فرقة التنورة التراثية تقديم عروضها الفنية الاستعراضية، وتقدم الفرقة العرض بمصاحبة آلات الموسيقى الشعبية التراثية زي الربابة والسلامية والمزمار والصاجات والطبلة مع أداء راقص من اللفيف “الراقص الأساسي” ومن حوله الحناتية “الراقصين الفرعيين” وبـ يعزفوا على آلة الإيقاع (المزهر)، في الاستعراض يمثل اللفيف الشمس ومن حولها الكواكب المتمثلين في الحناتية على حسب التصور الصوفي لرقصة التنورة الصوفية، تُقام العروض كل سبت واثنين وأربعاء، سعر التذكرة 2 جنيه للمصريين و30 جنيه لغير المصريين.

أجندة كايرو360 مليانة معارض فنية وحفلات غنائية وعروض رقص ومهرجانات تسوق وندوات وعروض مسرحية وأفلام وثائقية، نادرًا لما يبقى فيه حدث ثقافي بـ يحصل في القاهرة وإحنا مش مغطيينه وكاتبين عن تفاصيله، تابعونا دائمًا وارسلوا لنا مقترحاتكم وآرائكم علشان هو ده اللي بـ يحركنا لقدام..أجازة جميلة إن شاء الله…