دليل أحداث نهاية الأسبوع: تنورة ومعرض فوانيس وفرقة سلالم ومعارض فنية
Cairo 360
كل سنة وحضراتكم طيبين وربنا يعيد علينا الأيام بخير، ولغاية دلوقتي إحنا
لسه مش عارفين رمضان بكرة ولا بعده وهـ نستنى علشان نشوف الرؤية بالليل، لكن بداية
رمضان في ويك إند تعتبر حاجة كويسة عمومًا علشان اللي عنده طقوس معينة سواء عائلية
أو روحانية يبقى عنده متسع من الوقت أنه يعملها في يوم أجازة أفضل من يوم في وسط
الأسبوع. وبطبيعة الحال الأيام الأولى في رمضان الأحداث والنشاطات الثقافية بـ تقل
جدًا، وحتى المطاعم والكافيهات ساعات بـ تقفل أبوابها في أول يومين لأن العرف أن
العزومات والتزاور بـ يبقى على أشده في الأيام دي، وعلشان كده دليلنا النهاردة هـ
يبقى قاصر على عدد محدود من الحفلات والأحداث الثقافية والمعارض اللي لسه مستمرة
بعد بداية الشهر المعظم.
الليلة دي في قاعة الحكمة في ساقية الصاوي فيه عرض ستاند أب كوميدي ثاني زي بتاع الأسبوع اللي فات إنما
المرة دي باللغة الإنجليزية، والتذكرة بـ 25 جنيه وبـ 20 جنيه بس لأعضاء الساقية.
في قاعة النهر في الساقية برضه هـ يبقى فيه حفل غنائي
للفرقة السكندرية المغنى خانة اللي بـ تقدم
أغانيها اللي لها طابع شعبي، والتذكرة بـ 10 جنيه لكل الناس.
وفي مركز الإبداع الفني الموجود داخل دار الأوبرا بالزمالك هـ يختتم
النهاردة فعاليات أسبوع السينما الجزائرية
وهـ تعقد ندوة بعنوان “السينما الجزائرية الجديدة للناقدان نبيل حجي وأحمد
فايق وبعد الندوة وبالتحديد الساعة 7:30 مساءً هـ يعرض فيلم بعنوان “الأفيون
والعصا”. تعرف أكثر على الثقافة الجزائرية واحضر العرض ده.
لو بـ تحب مزيكا التكنو والهاوس ممكن تحضر حفل دي
جي ميستي ودي جي حافظ في كايرو جاز كلوب الليلة دي الساعة 8 مساءً،
والحجز دائمًا ضروري في كايرو جاز.
وفي أفتر 8 في وسط البلد وزي كل يوم خميس هـ يبقى
ميعاد حفلة فرقة سلالم، والحد الأدنى
للطلبات 100 جنيه والدخول الساعة 10 مساءً.
يوم 8 يوليو اللي فات تم افتتاح معرض فني بعنوان (بشاير) شارك فيه 6 فنانين شباب هم نازلى أباظة، وإسلام شبانة، وجهاد أنور، وأحمد شوقى، ومحمود طارق، وسما
والى اللى قاموا بعرض أعمالهم في التاون هاوس جاليري في وسط البلد والمعرض لاقى
استحسان الزوار ومستمر لحد يوم 1 أغسطس القادم، المعرض فيه أعمال فنية تشمل الصوت والفيديو والرسوم المتحركة والفوتوغرافيا والمنسوجات وأعمال
مركبة.
لو كانت خروجتك قريبة
من سفاري أو داندي مول ممكن تشوف معرض “لقاء”
أو Encounter اللي بـ يجمع أعمال الفنانين
دينا فاضل، روسانا كورادو ووائل الصبور في جاليري تاش الموجود في الكيلو 38 في طريق مصر إسكندرية الصحراوي. المعرض مستمر لحد يوم 4 أغسطس.
يوم الجمعة اللي احتمال قوي أنه يبقى أول يوم رمضان مش هـ يبقى فيه أي عروض
في أي مكان تقريبًا، لكن المعارض الفنية اللي ذكرناها هـ تفضل مستمرة.
يوم السبت هـ يتم استئناف العروض وهـ يبقى فيه عرض
تنورة في وكالة الغوري والدخول مفتوح للجميع.
في قاعة النهر بساقية الصاوي هـ يبقى فيه حفل للفن
الشعبي والغناء بطريقة الواو أو ما يسمى فن الواو الخاص
بأهل الصعيد واللي بـ يعتمد على الارتجال والإيقاع الموسيقى الثابت. الدخول بـ 10
جنيه بس.
معرض من نوع خاص في قاعة الأرض في الساقية وهو رمضاني جدًا: معرض فوانيس للفنان محمد إسماعيل. المعرض مفتوح
للجميع ومستمر لحد يوم 29 يوليو.
حاجات قليلة ممكن تعملها خارج البيت الويك إند ده لأن
حلاوة أيام رمضان الأولى بـ تبقى في البيت مع الأهل والأصدقاء لازم نعترف بده، لكن
بداية من الأسبوع اللي جاي إن شاء الله هـ يبقى فيه أحداث كثير وهـ نقول لكم على كل
جديد بخصوص شوارع كايرو في رمضان، وما تنسوش من وقت للثاني تلقوا نظرة على أجندة كايرو360. ورمضان كريم.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
