The Definitive Guide to Living in the Capital , Cairo , Egypt

مع كل طلعة نهار، بتشرق جوه قلوبنا معاني جديدة سواء بالأمل أو الشغف أو مجرد الاستمرار في الحياة، الروتين ساعات بيقتل الحماس جوانا، فبنحتاج نفصل في الويك إند علشان نرجع أصفى بعد الأجازة. وده اللي بنحاول نوفره لكم من خلال الدليل ده.

 

نبدأ بالنهارده يوم الخميس، و"حفل للفنانة أنغام" في مسرح دار الأوبرا بجامعة مصر، وأسعار التذاكر تبدأ من 250 جنيه لـ 700 جنيه. كمان في ساقية الصاوي فيه أمسية شعرية غنائية بعنوان "الوقت سرقنا" للشاعر أمين حداد مع فرقة اسكندريلا.

وعلى مسرح ساقية الصاوي برضه بس في مسرح قاعة النهر فيه عرض استاند آب كوميدي بعنوان "تلات ولاد وبنت وعلي قنديل"، وسعر التذكرة 40 جنيه. ولو عاوزين تجربوا حاجة مختلفة "صوفي بوك ستور" عاملين حفل لفرقة "صليب صوفي" واللي بتقدم مزيج من الموسيقى الروحية الصوفية والقبطية.

 

وننتقل ليوم الجمعة، ومفاجأة روم آرت سبيس اللي عاملة حفل موسيقي لمجموعة "ميوزيفوريا"، وسعر التذكرة 50 جنيه. ولعشاق الفن الصوفي  ما تفوتوش حفل فرقة "المولوية المصرية" بقيادة المنشد الصوفي "عامر التوني" في ساقية الصاوي بالزمالك، وسعر التذكرة 35 جنيه. وعلى مسرح مركز الإبداع الفني بدار الأوبرا المصرية فيه عرض مسرحي اسمه "زي الناس" عن نص للكاتب الألماني برتولد بريخت مع ارتجالات لبعض المشاركين، والدخول مجاني.

 

ونختم بيوم السبت، وهتلاقوا على المسرح المكشوف بدار الأوبرا المصرية أول حفل الغنائي لفرقة "جرامافون"، والفرقة بتضم مجموعة من الفنانين الشباب اللي بيحاولوا يرجعوا تراث الغنا المصري ويقدموه في صورة عصرية جذابة، وسعر تذكرة الحفل 25 جنيه. وبرضه على مسرح الهناجر بدار الأوبرا المصرية العرض المسرحي "الرمادي" عن رواية 1984 للكاتب الأنجليزي جورج أورويل،  لسه مستمر وأسعار التذاكر 20 جنيه لغير الطلبة، و10 جنيه للطلبة. كمان في وكالة الغوري فيه حفل لفرقة التنورة التراثية، واللي بتقدم الرقصة الشهيرة المستوحاة من تراثنا الصوفي، واللي جاية من فلسفة وجود نقطة مركزية لحركة الكون، وبتترجم في رقصتهم لحركة دائرية مستمرة شبه حركة الكواكب في الفضاء.

لو عاوزين تعرفوا تفاصيل أكثر عن أحداثنا اللي بننشرها كل يوم على مدار الأسبوع، تابعوا أجندتنا.

ويك إند سعيد!