The Definitive Guide to Living in the Capital , Cairo , Egypt

كل أسبوع عودناكم أننا نختار لكم كل الأحداث اللي تساعدكم تقضوا ويك إند سعيد، بس النهارده هـ نبدأ سنة جديدة بالليل، وأكيد مع بداية سنة جديدة كل واحد فينا هـ يحدد هو نفسه في إيه وربنا هـ يساعده يوصل لهدفه ده طول ما هو مصمم يوصل له، كل سنة وأنتم طيبين وفرحانين بكل لحظة ربنا بـ يجدد فيها نعمه عليكم.

نبدأ بيوم الخميس، هـ تلاقوا على المسرح الكبير بدار الأوبرا المصرية حفل رأس السنة الميلادية واللي هـ تقدمه أوركسترا القاهرة السيمفوني، والتذاكر متاحة بشباك الحجز. كمان فيه احتفال بالسنة الجديدة في موزايك ليلة هـ تضم العديد من الفعاليات الموسيقية والفنية، وسعر التذكرة 30 جنيه. هـ تلاقوا أغلب المطاعم والكافيهات عاملين احتفال خاص منهم حفل في كوفي شوب كومباني الرحاب واللي هـ يضم العديد من العروض الموسيقية وعرض للألعاب النارية، وسعر الفرد 150 جنيه، وفي المطعم العالمي أكالا كمان فرع ذا كورت يارد بالمعادي فيه حفل موسيقى Live بمناسبة الاحتفال بالعام الجديد برضه.

أما لمحبي مسرح عرائس ساقية الصاوي فيه حفلة غنائية لمحمد منير والمسرح بـ يقدم وصلات غنائية لعرائس شبيهة بنجوم الفن أمثال أم كلثوم وعبد الحليم حافظ على مسرح قاعة النهر، وسعر التذكرة 15 جنيه لغير أعضاء الساقية و10 جنيه للأعضاء، كمان فيه في ماجنوليا حفل موسيقي بعنوان Hearing Images للفنان محمد نجلة، وسعر التذكرة 30 جنيه.

وننتقل ليوم الجمعة وحفل للفنان إسلام طه في قاعة الحكمة بساقية الصاوي بمصاحبة فرقته "جذور"، وسعر التذكرة 20 جنيه. أما في قاعة النهر في الساقية برضه هـ تلاقوا حفل موسيقى نوبية هـ تقدمها فرقة "أراجيد"، وسعر التذكرة 25 جنيه. وكعادة كل يوم جمعة، وعرض الأراجوز وخيال الظل في مركز إبداع بيت السحيمي، والدعوة عامة.

ونختم بيوم السبت، لو أنتم من هواة فن المسرح ما تفوتوش مسرحية "النجاة" في مسرح أوزيريس من تأليف الكاتب الكبير نجيب محفوظ، ومن إخراج محمود سيد، وسعر التذكرة 25 جنيه. أما ساقية الصاوي فهي بـ تمتعنا بعرضين، الأول في قاعة النهر حفل موسيقى هيب هوب، وسعر التذكرة 30 جنيه لغير أعضاء الساقية و25 جنيه للأعضاء. والثانى في قاعة الحكمة حفل موسيقي هـ تقدمه فرقة "كاريزما"، وسعر التذكرة للأعضاء 15 جنيه، و20 جنيه لغير أعضاء الساقية. ونختم كالعادة بحفل التنورة في مركز إبداع وكالة الغوري، وسعر التذكرة 5 جنيه.

لو عاوزين تعرفوا أكثر عن أحداثنا اللي بـ ننشرها كل يوم على مدار الشهر، تابعوا أجندتنا.

ويك إند سعيد! وكل سنة وأنتم طيبين!