دليل أحداث نهاية الأسبوع: حفل محمد عدوية ومهرجانات الربيع وفرقة أندروميدا ووجيه عزيز.
Cairo 360
مساء الخير..مستعدين للأجازة؟ رتبتم أولوايتكم ولا لسة؟ هـ ندخل في الموضوع
على طول ونقول لكم إيه ممكن يتعمل أيام الخميس والجمعة والسبت. قبل ما نقول لكم
على الأحداث الثقافية والفنية بـ نفكركم بمكانين حلوين رحناهم الأسبوع ده وبـ نحب
نرشحهم لكم لو عايزين خروجة حلوة بهدف الأكل والشرب. المكان الأول هو «كايرو كيتشن» وده مطعم جديد للأكلات والمشروبات المصرية
فتح في الزمالك مؤخرًا وعجبنا فكرته جدًا، والمكان الثاني هو محل ساندويتشات صغير
فتح في مدينة نصر اسمه «ع الخفيف» وبـ يعمل اختراعات ظريفة في الساندويتشات
وأسعاره كويسة والأهم من كده أنه بـ يفضل فاتح للفجر، يعني مناسب لخروجات الويك إند
المتأخرة.
بالنسبة للحفلات عندنا النهاردة الخميس عدد كبير من الحفلات يمكن أهمها حفل
الفنان محمد عدوية في ساقية الصاوي اللي هـ يبقى
في قاعة النهر. وحفل ثاني بقاعة الحكمة بالساقية للفنان النوبي بشير اللي بـ يقدم موسيقى وأغاني الجاز بشكل مختلف،
ودي من المرات القليلة اللي ممكن نشوف فيها بشير في ساقية الصاوي.
في كايرو جاز كلوب فيه حفلة حلوة للمغنية نهى طه اللي هـ
تقدم مجموعة أغاني عالمية وبعدها فريق مسار إجباري
هـ يكمل اليوم لحد الفجر، احجز مكانك بالتليفون.
أغاني على السمسمية وتراث مصري أصيل في حفل فرقة الطنبورة في قاعة الطنبورة في وسط البلد الليلة
دي، روح بدري علشان تلاقي مكان.
عودة لمسرح الجنينة بحديقة الأزهر وبداية الموسم الصيفي
وحفل موسيقى الكترونية بعنوان “نقطة تفتيش”،
الحفل هـ يبدأ الساعة 8 مساءً وسعر التذكرة 10 جنيه.
على المسرح الصغير في دار الأوبرا فيه حفل لفرقة (بغدادي باند) اللي بـ تقدم موسيقى الجاز الشرقي
والعالمي، التذاكر من الشباك مباشرة.
وبعيد عن حفلات الموسيقى النهاردة فيه مهرجان مقام في
كنيسة سانت جورج في المعادي بعنوان “مهرجان
كرافان” بـ يتقدم من خلالع معارض فنية وأفلام سينمائية والمهرجان
مستمر لأكثر من يوم.
يوم الجمعة فيه كرنفال كبير في مجمع ديزاينوبليس الموجود
في أول طريق الأسكندرية الصحراويـ والمهرجان بمناسبة أعياد الربيع، فيه فقرات كثير
وعروض فنية خاصة للأطفال. ممكن تتصل ونعرف تفاصيل أكثر من هنا.
واحدة من أجمل الحفلات الأسبوع ده هي حفل فريق أندروميدا لموسيقى الروك واللي هـ يقدم فيها
المرة دي أغاني Gary Moore بالإضافة
لمجموعة أغاني فريق Pink Floyd اللي هم متعودين يقدموها من أكثر من 20 سنة.
الحفل هـ يبدأ الساعة 7 مساءً بقاعة الحكمة وحاول تروح بدري لأن التذاكر بـ تخلص
والمكان بـ يتزحم؛ عن تجربة.
موود مختلف في المسرح الصغير في دار الأوبرا المصرية وحفل موسيقى الحجرة اللي ناس كثير مش عارفين معلومات كثير
عنها، أقرأ شوية عن موسيقى الحجرة وبعد كده روح استمتع بالحفل اللي هـ يبدأ الساعة
8 مساًء.
حفل أناشيد صوفية للفنان
“إسلام” في مركز صوفي الثقافي بالزمالك يوم الجمعة الساعة 8 مساءً،
والظريف في صوفي أنك ممكن تطلب مأكولات ومشروبات أثناء الحفل من المكان نفسه.
نختتم حفلات يوم الجمعة بحفل ثاني مميز في ساقية الصاوي
وهو حفل فرقة بساطة أحد أفضل فرق الغناء المستقلة
في مصر مؤخرًا، بـ يقدموا أغاني مصرية من تأليفهم. والحفل هـ يبدأ الساعة 8 مساءً
في قاعة النهر وسعر التذكرة 20 جنية.
يوم السبت فيه حفل للفنان وعازف العود وجيه عزيز في قاعة الحكمة بساقية الصاوي، اللي ما
شافش وجيه عزيز قبل كده بـ نرشح له الحفل ده بقوة. عزيز فنان متمكن وقام بالتلحين
لكبار المطربين في مصر وبـ يقدم أشعار العامية بطريقته الخاصة على المسرح. إلحق
تذكرتك.
في مركز صوفي يوم السبت بالليل فيه حفل توقيع كتاب مهم
بعنوان “رسائل من التحرير”
للكاتبة كريمة خليل، وفيه ندوة مهمة كمان للداعية
الأستاذ مصطفى حسني ودي هـ تبقى في ساقية
الصاوي في قاعة النهر.
عدد كبير من المعارض الفنية للوحات الزيتية لسة مستمر من
الأسبوع اللي فات، وفيه عروض مختلفة على مسارح الدولة والمسارح المستقلة، وعدد مش
قليل من الندوات والمحاضرات، ممكن تعرفوا تفاصيلها من خلال أجندة موقعنا. وبـ نتمنى لكم أجازة مفيدة.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
