The Definitive Guide to Living in the Capital , Cairo , Egypt

الحياة في كايرو

دليل أحداث نهاية الأسبوع: دليلك الأسبوعي لكل جديد في كايرو

دليل أحداث نهاية الأسبوع: دليلك الأسبوعي لكل جديد في كايرو
بواسطة
Cairo 360

مساء الخير كايرو.

علشان نسهل مأمورية قراءنا ونساعدهم في معرفة أهم الأحداث الثقافية والفنية
اللي هـ تحصل في الويك إند والأسبوع اللي جاي بطريقة أسرع قررنا نعمل موضوع على شكل
دليل يُنشر في نهاية كل أسبوع للتنويه عن الأحداث المختلفة من خلال أجندة كايرو 360
وكمان هـ نقول لكم لو فيه أماكن جديدة فتحت أو لسه هـ يتم افتتاحها في الأيام
القليلة القادمة، تابعونا كل يوم خميس على الموقع وحددوا من خلالنا هـ تعملوا
إيه في الأجازة وفي الأيام اللي بعدها لحد يوم الخميس اللي بعده.

فعاليات «مشروع المريخ» الشهر ده هـ
تكون في مركز «صوفي» الثقافي الجديد اللي
فتح في الزمالك وكتبنا عنه مقالة نقدية قبل أي حد، ومشروع المريخ عرض ميكروفون
مفتوح للتعبير عن نفسك أمام الجمهور، والاشتراك للراغبين في تقديم العروض
الفنية سواء الغناء أو الشعر أو الكوميديا على الواقف بـ يكون في نفس اليوم قبل
بدء العرض بساعة، والدخول للجميع مجانًا. من هنا ممكن تعرف تفاصيل أكثر عن المكان والميعاد.

وفي نفس اليوم في مكتبة «ديوان» في الزمالك برضه هـ يكون فيه حفل توقيع
كتاب «حب تحت عجلات المترو» للكاتب محمد عبد الرحمن.

وبـ نفكركم بحفل الفنان حمزة نمرة  بدار أوبرا جامعة MUST بمدينة 6 أكتوبر النهاردة، لكن طبعًا التذاكر خلصت
من كذا يوم، لكن ممكن لزيادة تأكيد تتصل وتشوف إذا كان حد رجع تذكرته ولو لسه فيه
إمكانية أنك تروح.

حفل الموسيقار نصير شمة هـ يكون يوم الجمعة في ساقية الصاوي، وهـ يقدم مجموعة من
أشهر مؤلفاته على العود، والحفل ده في إطار احتفالات الساقية بمرور 9 أعوام على
إنشاءها، التذاكر بـ 40 و45 جنيه، والتفاصيل موجودة
هنا
.

في وكالة الغوري بـ يتجدد عرض التنورة  يوم السبت الموافق 25 فبراير، فرصة كويسة
لتغيير الموود والاستمتاع بالأجواء الصوفية الساحرة. وبـ نفكركم أن العرض بـ يتكرر أيام
الاثنين والأربعاء.

وفي ساقية الصاوي ممكن تحضر حفل فرقة كايروكي اللي تحولوا لأيقونة فنية للثورة المصرية، الحفل هـ يبدأ الساعة 8 مساءً
وسعر التذكرة 25 جنيه للأعضاء وغير الأعضاء، الحق تذكرتك.

وفي كايرو جاز كلوب لازم تتصل وتحجز مكانك قبل ما تروح حفل فريق مسار
إجباري اللي هـ يبدأ الساعة 10 بالليل.

يوم الأحد ممكن تروح أي من المعارض الفنية الموجودة زي معرض رؤى معمارية في جاليري نوكيو أو معرض أفريقيا الحالمة في حديقة الأزهر واللي بـ يقدم
صور فوتوغرافيا معاصرة لبلاد أفريقيا.

وفيه معارض ثانية في ساقية الصاوي ومركز الجزيرة للفنون
ومركز المساحة الثقافي، ممكن تعرفوا تفاصيلها من أجندة
الموقع
.

في جاليري المشربية يوم الاثنين هـ يكون فيه معرض للفنان علي عبد المحسن وهـ يستمر ليوم 8 مارس. ومعرض ثاني بعنوان «شخصيات
طيفية
» للفنانة شيماء عزيز هـ يتم افتتاحه في مرسم القاهرة الجديدة.

كل يوم خميس بإذن الله هـ يكون فيه دليل زي ده ممكن تعتمدوا عليه في خروجاتكم وترتيباتكم، ونشوفكم على خير الأسبوع اللي جاي.

مقترح