The Definitive Guide to Living in the Capital , Cairo , Egypt

نتمنى يكون أول أسبوع دراسي عدى عليكم بخير وسلام سواء كنت طالب ولسه بـ تستكشف المناهج أو مواطن عادي حظه العسير خلى مواعيده مع مواعيد ذهاب أو رجوع الطلاب واتعك في الزحام، هي صدمة أول أسبوع دي بـ تعدي والدنيا بـ تمشي بعد كده. الأجواء الهادئة الأسبوع ده ساعدت كثير من المراكز الثقافية والمعارض الفنية أنها تفتح أبوابها وتكثف نشاطاتها، خصوصًا اللي بـ تعتمد على زيارات الطلاب والنشاطات الدراسية، رصدنا عدد كبير من المعارض الفنية المتميزة وكمان حفلات موسيقية زيادة مدعومة بتقليل عدد ساعات حظر التجول وبدأت الحياة تعود شوية شوية للمشهد الثقافي والفني في القاهرة.

نبدأ بالمعارض الفنية الكثير اللي ممكن تروحها في الويك إند، يستضيف جاليري أرثروبولوجي في الزمالك معرض فني بعنوان Fair Usage للفنانين: علاء عبد الحميد وباسم سمير وهادية محمود ومحمود طارق ومحمد إسماعيل ومحمد تيمور ونادية منير ونوران شريف وسارة سليمان بالاشتراك مع ميريام نيبلر وشريف الشاذلي بمشاركة محمد سالم وبيتر نيكولاس بمشاركة جولييت باودوت، المعرض من تنظيم يارا مكاوي، الجاليري مفتوح من الساعة 10 صباحًا: 3 مساءً ومن 5 مساءً: 10 صباحًا، وهو مفتوح لحد يوم 3 أكتوبر اللي جاي. 

وفي مركز “مدرار” للفن المعاصر تقام فعاليات مهرجان القاهرة الخامس للفيديو، يضم المهرجان عروض فنون الفيديو وعروض أفلام تجريبية، معرض الفيديو بـ يكون من 4 مساءً لحد 7 مساءً، برنامج الأفلام من 7 مساءً لحد 10 مساءً، يوميًا ماعدا يوم الجمعة.

يُقام بجاليري المشربية معرض للفنانة مروة الشاذلي بعنوان “صناعة لبنانية“. أعمال المعرض تتناول مشاهير موسيقى البوب اللبناني من السيدات، وتبرز المعروضات كلمات الحب والرومانسية في الأغاني.

نروح لمسرح الساقية للعرائس وسهرة ليلة الخميس والمرة دي فيه عروض لفرقتي ABBA وThe Beatles  في قاعة الحكمة بساقية الصاوي، سعر التذكرة 5 جنيه للأعضاء و10 جنيه لغير أعضاء الساقية.

الليلة دي هـ تقدم فرقة أوبرا القاهرة مع أوركسترا أوبرا القاهرة عرض باليه “زوربا” الشهير على المسرح الكبير بدار أوبرا القاهرة، اللي ما شافش العرض قبل كدة ننصحه بمشاهدته المرة دي، التذاكر متاحة لدى شباك الحجز.

وزي ما عودنا بيت الرصيف اللي محافظ على برنامج فني ثابت ومستوى متميز طوال الأسابيع اللي فاتت ورغم كل الأحداث بـ يقدم النهارده فرقة “شوارعنا” في حفل غنائي. أعضاء الفرقة هم خالد نبيل ومصطفى المليجي ومحمد أمين وعمرو الجندي وأحمد الليثي ومحمود المليجي وأمير الصعيدي مجموعة من أغانيهم المعبرة عن الواقع المصري، ظهروا في بعض برامج المسابقات وحلقة من برنامج باسم يوسف، سعر التذكرة 25 جنيه والحفل هـ يبدأ الساعة 7 مساءً.

فرقة “سلالم” هـ تحتفل بعيد ميلادها الثامن الليلة دي على مسرح الجنينة بحديقة الأزهر في حفل هـ يقدموا لنا فيه أحلى أغانيهم اللي عملوها خلال 8 سنين، بـ نتوقع أن الحفلة تبقى جامدة جدًا وتشهد حضور جماهيري كبير لأن الفرقة مُحبينها كثير. سعر التذكرة 10 جنيه بخلاف تذكرة دخول الحديقة، ما تتأخروش.

على مسرح الجمهورية تقدم فرقة الإنشاد الديني بقيادة المايسترو عمر فرحات حفل فني يضم مجموعة من الأعمال الدينية المميزة بمناسبة اقتراب عيد الأضحى وموسم الحج مع الابتهالات والأدعية، التذاكر متاحة لدى شباك الحجز.

الليلة فيه حفل جديد من حفلات فرقة أغاني البيتلز الأهم في القاهرة Glass Onion في كايرو جاز كلوب، حفل ما يتفوتش مليان بأغاني الستينيات لواحد من أعظم الفرق وهم الـ Beatles، الحجز ضروري.

بكرة الجمعة ليلة موسيقية جامدة جدًا منتظراكم مع فناني الموسيقى الإلكترونيك إسماعيل وحسين الشربيني في ساحة 100 كوبيز ميوزك في وسط البلد، الحضور مجانًأ.

ويوم السبت نفس المكان هـ يستضيف حفل لفرقة لها إنجازاتها في الموسيقى الإليكترونيك ومشهورين على مستوى العالم وهم “Berlin Clubnacht” ، يوم احتفالي بـ يتكون من ورش عمل وعروض أفلام لاكتشاف الأدوات وتاريخ المشهد الموسيقي اللي بـ يتطور بسرعة.

السنة اللي فاتت في موقف ستاد القاهرة مجموعة من السائقين وهواة السيارات المحليين قدموا أحلى مهارات دريفت وانتهيت بفوز السائق رامي سري بالمسابقة، السنة دي RedBull بـ تنظم نفس الحدث لكن المرة دي في القرية الذكية والفائز هـ يشارك في النهائيات الإقليمية. اعرف تفاصيل أكثر من صفحة الحدث على موقعنا.

ويك إند سعيد ونتمنى أنكم تلحقوا تعملوا حاجات كثير النهارده ويوم السبت لأن زي ما أنتم عارفين الوقت بقى ضيق جدًا، يوم الجمعة كله كان بـ يهرب يومها على الساحل والسخنة، لكن في الدراسة الوضع مختلف، تابعوا أجندة موقعنا واعرفوا الجديد قبل أي حد.. مع السلامة.