The Definitive Guide to Living in the Capital , Cairo , Egypt

الحياة في كايرو

دليل أحداث نهاية الأسبوع: محمد عدوية وإفتكاسات وندوات وأمسيات شعرية

دليل أحداث نهاية الأسبوع: محمد عدوية وإفتكاسات وندوات وأمسيات شعرية
بواسطة
Cairo 360

تم البدر بدري! مش
بدري قوي بصراحة لأننا فاكرين كل يوم عدى علينا في العطش والحر، بس كله بثوابه
وربنا يعيد الشهر الكريم علينا بالخير والبركة ونكون معاكم في كايرو 360 وبـ نكتب
لكم عن كل جديد في العاصمة ونبقى عند حسن ظنكم ودليلكم المفضل دائمًا للأحداث
الثقافية والأماكن الجديدة. ولأن دي الأيام الأخيرة في رمضان وبـ يبقى فيها
ترتيبات لأيام عيد الفطر، فمعظم المراكز الثقافية بـ تبقى خلصت عروضها وبرامجها
الرمضانية ومش بـ يتبقى لنا غير فعاليات ساقية الصاوي وبعض المراكز الثقافية
القليلة اللي مش لها جدول محدد للعروض. هنا هـ نستعرض بسرعة أهم الحاجات اللي
ممكن تعملها في آخر ويك إند في رمضان.

النهاردة الخميس هـ
يكون فيه حفل لفرقة إفتكاسات في مركز صوفي
في الزمالك، إفتكاسات المرة دي هـ يكون معاهم 2 عازفين من المغرب هم المهدي ناسولي
وهشام باجو على آلات الجيمبري والقراقب المغربية، الحفل المرة دي هـ يبقى مميز
وفيه أفكار جديدة ده أكيد. الدخول بـ 50 جنيه للفرد شاملة 2 مشروب طول القعدة.

فرقة أنا مصري هـ تحيي حفل في ساقية الصاوي الليلة دي في
قاعة الحكمة، والفرقة بـ تقدم موسيقى مصرية معاصرة وبلهجات وقوالب موسيقية مختلفة.
الحفل هـ يبدأ الساعة 9:30 مساءً والتذكرة بـ 20 جنيه و15 جنيه للأعضاء.

النهاردة يوم فني
حافل بمركز الجزيرة للفنون هـ يتضمن عرض مسرحى وأمسية
شعرية وحفل موسيقى
. الأول عرض مسرحية “الثورة ما قامتش” من
إنتاج ورشة الخان للكتابة والحكى والعرض من تأليف ورشة الخان للكتابة والحكى
وإخراج وليد الزرقان ومدة العرض 30 دقيقة. وبعدها أمسية شعرية تقدم قصائد لشعراء
الشباب.

وفي ختام اليوم هـ
يبقى فيه حفلة موسيقية لفرقة “ملامح” بقيادة الفنان ريمون سليمان هـ تقدم
فيه أشهر أغانيها وأغانى من التراث القديم. مدة الحفلة 30 دقيقة برضه والدعوة عامة.

صالون شبابيك الثقافي
في المقطم هـ يستضيف الليلة دي مؤسسي صفحة سلفيو كوستا
على الفيسبوك واللي أصبح لهم دور سياسي ملحوظ من بعد الثورة. الدعوة عامة والدخول
للجميع.

المحاضر الدكتور بسام الشماع أستاذ الجغرافيا والمؤرخ هـ يعقد ندوة
بعنوان “قطائف من شجرة التاريخ” في قاعة الكلمة بساقية الصاوي النهاردة الساعة 9:30
مساءً. الدخول مجانًا.

يوم الجمعة هـ تقدم
ساقية الصاوي حفل فن النميم الشعبي،
المعروف عن فن النميم أنه إبداع شعبي أصيل، شعر تلقائي يلقي ولا يكتب وبـ يكون ارتجالي
من غير ترتيب من الشاعر. الحفل في قاعة النهر وسعر التذكرة 10 جنيه للجميع.

وبالنسبة للمعارض
الفنية هـ يقام معرض جماعي لفنون الرسم والتصوير والنحت والخزف بعنوان “رمضانيات..ارسم” بقاعة الأرض بساقية
الصاوي وهـ يستمر المعرض ليوم 19 أغسطس أو أول أيام العيد.

يوم السبت أو ليلة
العيد بـ نرشح لكم حاجة واحدة بس تعملوها ومتأكدين أنها مش هـ تخيب ظنكم، وهي حضور
حفلة الفنان محمد عدوية في ساقية الصاوي في
قاعة النهر، محمد عدوية وفرقته الموسيقية بـ يقدموا موسيقى مميزة وكلمات قوية،
وما ننساش أنه صاحب أغنية تتر مسلسل «طرف ثالث» اللي حقق نجاح كبير السنة دي في
رمضان، وأكيد هـ يقدمها في الحفل اللي جاي. الحفل هـ يبدأ الساعة 10 مساءً
والتذاكر بـ 35 جنيه وبـ 30 جنيه لأعضاء الساقية.

وفي
النهاية بـ نتمنى لكم عيد كحك سعيد وأجازة مريحة وهادئة، ونرجع لكم إن شاء الله
الأسبوع اللي جاي بكل نشاط وحيوية. ولو حابين تعرفوا أخبار وأحداث أكثر ممكن
دائمًا تعرفوها من أجندة موقعنا، وكل سنة
وحضراتكم طيبين.

مقترح