دليل أحداث نهاية الأسبوع: مناظرات رئاسية وندوات وروك بالعربي ودينا الوديدي والبيتلز
Cairo 360
أهلًا بكم قراءنا الأعزاء، لاحظنا أن ناس كثير بدأت تفكر في قضاء الويك
إند في الساحل الشمالي والعجمي مع الارتفاع الملحوظ في درجات الحرارة. لكن هدفنا
دائمًا أننا نعطيك اختيارات وبدائل في القاهرة لأن زي ما حضراتكم شايفين.. إحنا
بـ ننتمى لـ “كايرو” 360.
ما تقلقوش مش هـ نقترح أي خروجات قريبة من ميدان العباسية مع وجود احتمال
بمد حظر التجوال كل يوم، وأكيد ما حدش هـ يخرج يوم خميس أو جمعة ويبقى ناوي يرجع
قبل الساعة 11 مساءً. وبـ نفكركم أنكم تتفادوا كوبري أكتوبر من ناحية مدينة نصر لو
راجعين في وقت متأخر لأنه بـ يبقى مغلق في حالة الحظر. بس كالعادة مافيش حاجة هـ
تقعدنا في البيت وهـ نقول لكم حالًا إيه ممكن يتعمل اليومين الجايين دول.
نبدأ بالسياسة وانتخابات الرئاسة اللي شاغلة الناس كلها والمناظرات اللي على
جميع القنوات التليفزيونية، الجديد هنا أنك ممكن تروح تتفرج على مناظرة النهاردة
على الهواء مباشرة –زي مباريات كرة القدم- بين عبد المنعم أبو الفتوح وعمرو موسى
في مركب نايل ماكسيم بالزمالك وبالتحديد في «ريزاس»،
وفيه حد أدنى للطلبات، والحجز مهم.
في «مكان» اللي في وسط البلد وضمن فعاليات مهرجان الربيع هـ يكون فيه عرض
بعنوان “سمر الثورة” وهو عبارة
عن قصص وحكي على المسرح عن الربيع العربي وهـ يشارك فيه شباب من دول الثورات
العربية، سعر الدخول 10 جنيه.
معرض من نوع خاص جدًا تم افتتاحه يوم الأحد 6 مايو في تاون هاوس في وسط
البلد. المعرض بعنوان “غبار”
للفنانة زينا نيكولاسكايا، فكرة استخدام الغبار للتأريخ وإبراز قيمة الأشياء
والمباني هي محور المعرض. اعرف تفاصيل أكثر عن المعرض من خلال أجندة موقعنا.
ندوات الدكتور علاء الأسواني
مستمرة في ساقية الصاوي، النهاردة الساعة 7 مساءً بقاعة النهر والدعوة عامة.
في المركز الثقافي الإيطالي هـ يتم عرض فيلم بعنوان Immature أو “غير ناضجين” وهو فيلم روائي طويل، كوميدي خفيف
والحضور مفتوح للجميع.
نروح بقى لحفلات الموسيقي المهمة الأسبوع ده، أولها
النهاردة وحفل الفنانة المتميزة جدًا دينا الوديدي
في قاعة الحكمة في ساقية الصاوي. دينا بـ تقدم موسيقى الفيوجن جاز وأغاني مصرية
غير تقليدية، بـ نرشح لكم الحفل ده وبـ نأكد لكم أنكم هـ تنبسطوا.
الليلة دي في كايرو جاز كلوب فيه حفل لفريق Glass Onion اللي بـ يقدم أغاني البيتلز، طبعًا مجانين البيتلز مش محتاجين
دعوة. فيه فقرات ثانية في برنامج الليلة، والحجز مطلوب قبل ما تروح.
زي كل يوم خميس فرقة سلالم
بـ تقدم عروضها في أفتر 8 الساعة 10 مساءً، حد أدنى للطلبات 100 جنيه. وممكن تشوفهم يوم السبت الموافق 12 مايو في ساقية الصاوي وتدفع أقل من كده بكثير.
يوم الجمعة الساعة 8 مساءً على المسرح المكشوف في دار
الأوبرا فيه حفل لفرقة أيامنا الحلوة اللي
بـ تقدم أغاني مصرية قديمة وموسيقى عربية بقيادة محمد عثمان.
في مركز درب 17 18 الثقافي بالفسطاط فيه حفل روك بالعربي، موسيقى روك وكلمات عربية بـ يقدمها
مجموعة من أفضل فرق الروك على الساحة حاليًا وهم “أزرق سماوي”
و”بركة” و”دروشة” و”موريس لوقا” والفريق الأردني
“جدل” اللي بـ يزور مصر لأول مرة. التذكرة بـ 20 جنيه والحفل هـ يبدأ
الساعة 7 مساءً. استمتعوا..
في قاعة النهر يوم الجمعة فيه حفل لفرقة أنا مصري اللي قدمت عدد من العروض الناجحة داخل
وخارج البلاد.
وفي قاعة الحكمة وفي نفس التوقيت هـ يبقى فيه حفل للفنان
أحمد شرحبيل وموسيقى الريجي، التذكرة بـ 15
جنيه.
تجربة تسوق جديدة، بين التسوق والأعمال الخيرية، روح أو
اتصل بهم علشان تفهم أكثر عن سوق جراج
اللي هـ يُنظم في مركز صوفي الثقافي يوم السبت اللي هو بعد بكرة.
يوم السبت كمان فيه حفل في دار الأوبرا على المسرح الصغير بمناسبة ذكرى
الفنان سيد مكاوي ومجموعة من أفضل ما قام
بغنائه وتلحينه.
وأخيرًا على مسرح الجنينة في حديقة الأزهر فيه حفل مهم
بعنوان “عجم” وفيه هـ تسمع وتشوف –من المرات النادرة جدًا– موسيقيين
إيرانيين بـ يحاولوا يوصلوا ثقافتهم بشكل مختلف وعن طريق الغناء والعزف. سعر
التذكرة 10 جنيه فقط.
دائمًا بـ نفكركم أن ده مش كل حاجة وفيه حاجات كثير ممكن
تعملها في أجازتك من خلالنا ومن خلال أجندة موقعنا.
ونشوفكم على خير.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
