The Definitive Guide to Living in the Capital , Cairo , Egypt

الحياة في كايرو

دليل أحداث نهاية الأسبوع: مهرجان راجعين الصيفى، وحفلات جلاس أونيون وبلاك تيما والست أم كلثوم ودينا الوديدي

دليل أحداث نهاية الأسبوع: مهرجان راجعين الصيفى، وحفلات جلاس أونيون وبلاك تيما والست أم كلثوم ودينا الوديدي
بواسطة
Cairo 360

مش هـ نطول عليكم كثير النهارده، الكل ملبوخ فى الشغل دلوقت وبـ يعد الساعات والدقايق والثوانى علشان يبدأ أجازته المنتظرة من أول يوم الأحد اللى فات، ما أحلى الأجازات بجد، خاصة لو كانت مرتبطة بسفر، بس القعدة فى القاهرة أحلى حاجة بـ يعوضها هو الأحداث والفعاليات الثقافية والفنية الدسمة اللى بـ تكون موجودة، هـ نستعرض معاكم بعض منها هنا فى الدليل:

النهارده الخميس أكثر يوم مليان بالأحداث الثقافية والفنية، نبدأه بمهرجان الصيف الثاني عشر: حفل عمر خيرت بمكتبة الإسكندرية بمشاركة أوركسترا مكتبة الإسكندرية في أولى حفلات مهرجان “راجعين”، الحفل بالمسرح الكبير. أسعار التذاكر: 75، 120 و200 جنيه.

أما فى كايرو جاز كلوب فيه حفل للفنان حسن رمزي، حسن بـ يلعب Acoustic Pop، وكمان حفلة ثانية لفرقة Glass Onion وليلة مع كلاسيكيات فريق البيتلز، يرجى الحجز مسبقًا، الدخول للـ Couples فقط. غير مسموح بالدخول لأقل من 25 سنة، وتغلق الأبواب باكتمال العدد.

ومحبي فرقة بلاك تيما لكم ميعاد معاهم فى ساقية الصاوي علشان تستمتعوا بحفل كبير فى قاعة النهر، سعر التذكرة 40 جنيه.

كمان في الساقية لكن فى قاعة الحكمة مسرح الساقية للعرائس هـ يقدموا لكم كعادتهم فى الخميس الأول من كل شهر حفل الست أم كلثوم فى عرض “أم كلثوم تعود من جديد”، حيث تشدو في الحفل بأغنيتي “فكروني” و”فات الميعاد”. سعر التذكرة لأعضاء الساقية 5 جنيه ولغير الأعضاء 15 جنيه.

وفى دار الأوبرا المصرية يقام حفل للفنانة دينا الوديدي وفرقتها على المسرح المكشوف. التذاكر متاحة بشباك الحجز.

ننام ونصحى ثانى يوم ويك إند الجمعة بحفلات وفعاليات جديدة، فى ساقية الصاوي هـ يقام حفل “مزيكا زيادة” بقاعة الحكمة ويضم الحفل مجموعة من الفنانين منهم: خالد مصطفى، وأحمد سالم، وساري عمر ومحمد إبراهيم. سعر التذكرة 20 جنيه.

وفى دار الأوبرا المصرية ممكن تحضر سهرة مع عازف العود غسان اليوسف على المسرح المكشوف، التذاكر متاحة بشباك الحجز.

وأخيرًا السبت وكعادة اليوم ده (إلى جانب الاثنين والأربعاء) ممكن تحضر حفلة التنورة فى وكالة الغورى اللى بـ تتميز بطابع خاص فريد في نوعه، لأنها بـ تعتمد على الحركات الدائرية اللي بـ تنبع من الحس الإسلامى الصوفي، سعر التذكرة 5 جنيه.

ونرجع ثاني مع فعاليات مهرجان الصيف الثاني عشر وحفل ثاني لفرقة “بلاك تيما” بمكتبة الإسكندرية على المسرح المكشوف، وذلك ضمن فعاليات مهرجان “راجعين” الصيفي. سعر التذكرة 40 جنيه.

فى كايرو جاز كلوب ممكن تحضر حفل لفرقة “مشوار باند” اللى بـ يلعبوا موسيقى الـ Egyptian Reggae، يرجى الحجز مسبقًا، الدخول للـ Couples فقط. غير مسموح بالدخول لأقل من 25 سنة، وتغلق الأبواب باكتمال العدد.

أهم فعالية فى يوم السبت إن ما كانش فى الويك إند ده كله هي ذكرى الشاعر الفلسطيني محمود درويش بساقية عبد المنعم الصاوي، بقاعة الحكمة، هـ يقام ندوة للاحتفال بذكرى الشاعر يشارك فيها مجموعة من الفنانين والشعراء العرب. تأتي الندوة بالتعاون مع الحملة العالمية للعودة لفلسطين. الدعوة عامة، اوعى تفوتكم.. الفعالية دي مهمة جدًا وهـ يتم تقديمها بشكل مبتكر.

ما تنسوش تبصوا على الأجندة علشان تعرفوا الأحداث الفنية الثانية من معارض وندوات، وأهم حاجة خليكم مبسوطين ودلعوا نفسكم.. نشوفكم الأسبوع الجاى.

مقترح