The Definitive Guide to Living in the Capital , Cairo , Egypt

الحياة في كايرو

دليل أحداث نهاية الأسبوع: ناير ناجي ومريم صالح وعلي الهلباوي ورقص معاصر

دليل أحداث نهاية الأسبوع: ناير ناجي ومريم صالح وعلي الهلباوي ورقص معاصر
بواسطة
Cairo 360
مساء الخير قرائنا الأعزاء، حاسين بإيه وإحنا في سبتمبر والدراسة على الأبواب؟ سواء كنت بـ تدرس أو عندك حد بـ يدرس أو خلصت دراسة خالص فموضوع عودة المدارس ده أكيد بـ يمسَك بشكل من الأشكال، زحمة الشوارع الصبح والروقان بالليل وروائح الخريف في الجو ولما الويك إند يبقى فرصتك الوحيدة أنك تغير جو أو تشوف أصحابك اللي بـ يدرسوا وهم بـ يغيروا جو. لحسن الحظ المراكز والأماكن اللي بـ تقدم عروض وفنون بـ تحاول على قد ما تقدر تقدم أحسن ما عندها في أيام الخميس والجمعة والسبت اللي إحنا بـ نكتب عنهم دليلنا الأسبوعي. يعني أكيد هـ نستمتع بالويك إند في الدراسة أكثر من أجازات الصيف كمان.. خليكم معانا بس وأنتم تكسبوا.
النهارده عندنا موسيقى ومسرح عرائس ومعرض فوتوغرافيا ورقص معاصر وغناء. نبدأ بساقية الصاوي اللي فيها حفل للمغنية مريم صالح بقاعة النهر بساقية الصاوي، مريم فنانة مصرية مستقلة بـ تجيد الغناء والتمثيل، أسست وشاركت في عدد من الفرق الموسيقية زي سادة ومظبوط، جواز سفر، فرقة الشيخ زين ورفاقه، وغنت أغانى السمسمية، وكانت من أهم من غنوا أغانى الشيخ إمام من خلال فرقة بركة اللي انفصلت عنها مؤخرًا. سعر التذكرة 25 جنيه والدخول الساعة 8 مساءً. 
مسرح العرائس في قاعة الحكمة بساقية الصاوي، وزي زمان في أول يوم خميس من كل شهر حفل كوكب الشرق أم كلثوم بمصاحبة فرقتها. عرض العرائس المميز هـ يبدأ الساعة 8 مساءً والدخول بـ 10 جنيه و5 جنيه بس للأعضاء.
معرض الفوتوغرافيا (مصر أمي.. سوريا وطني) المقام في قصر الأمير طاز بـ يضم أكثر من 70 عمل لـ 20 فنان. ويشارك في المعرض الفنانة والإعلامية السورية نها الدباغ. المعرض مستمر لحد 13 سبتمبر والدخول من الساعة 7 مساءً.
على مسرح الفلكي في الجامعة الأمريكية في التحرير هـ يكون فيه عرض رقص معاصر لمدة 6 أيام، كل يوم عرض والدخول مجانًا. كل العارضين فنانين شباب وموهوبين ونعتقد أن التجربة جديرة بالمشاهدة.
وبالنسبة للموسيقى عندنا حفل فيوجن جاز لفرقة إفتكاسات على مسرح الجنينة في حديقة الأزهر، الفرقة غنية عن التعريف، والمرة دي هـ تقدم أغاني من الألبومين اللي صدروا لهم وهم “مولد سيدي اللاتيني” و”دندشة”. الحفل الساعة 8:30 مساءً والتذكرة بـ 10 جنيه بخلاف تذكرة دخول الحديقة.
يوم الجمعة هـ يكون فيه حفل أغاني وموسيقى عربية للفنان علي الهلباوي. الحفل في قاعة الحكمة الساعة 8 مساءً والتذاكر بـ 15 جنيه و10 جنيه للأعضاء.
الساعة 7 مساءً في مركز صوفي في الزمالك هـ يتم عرض فيلم إيراني بعنوان “الانفصال” وهو حائز على جائزة الجولدن جلوب ومرشح للأوسكار، وهو فيلم درامى مدته 123 دقيقة. مافيش تذاكر للدخول بس فيه حد أدنى للطلبات وأنت قاعد في المكان.
يوم السبت 3 حفلات موسيقية بستايلات مختلفة تمامًا، الأولى في دار الأوبرا المصرية على المسرح الكبير وهي حفل الأوركسترا بقيادة الموسيقار وعازف البيانو ناير ناجي. الدخول بالملابس الرسمية والتذاكر متوفرة على الأبواب.
وفي ساقية الصاوي هـ يكون فيه حفل موسيقى ميتال بس أخف شوية من بتاع الأسبوع اللي فات اللي كان “بلاك ميتال”..المرة دي فريق Varden هـ يقدم موسيقى الـ Power Metal في قاعة الحكمة. الحفل هـ يبدأ الساعة 8 مساءً والتذاكر بـ 15 جنيه للأعضاء و20 جنيه لغير الأعضاء.
الفنانة دينا الوديدي هـ تكون ضيفة كايرو جاز كلوب يوم السبت بالليل وهـ تقدم حفل غنائي بمصاحبة فرقتها، وبعدها مباشرة هـ تلعب فرقة ملاليم اللي بـ تقدم موسيقى الروك والفانك. الفقرات هـ تبدأ الساعة 9 مساءً والسهرة ممتدة لحد الساعة 2 صباحًا، والحجز ضروري دائمًا في كايرو جاز.
عدد من معارض اللوحات الفنية والفوتوغرافيا تم افتتاحهم مؤخرًا في مراكز ثقافية بالقاهرة والإسكندرية، وفيه كمان حفلات موسيقى عربية وتكنو وهاوس وندوات وحفلات إصدار كتب، اعرفوا كل التفاصيل من أجندة كايرو 360 وياريت ترسلوا لنا لو عندكم أي حدث مهم عاوزينا ننشره في الأجندة اليومية بتاعتنا. أجازة سعيدة عليكم.

مقترح