The Definitive Guide to Living in the Capital , Cairo , Egypt

البرد خف شوية، النهارده أحسن من إمبارح، وبكره هـ يبقى أحسن من النهارده، المؤشرات بـ تقول كده، ونشرة الأرصاد الجوية كمان بـ تقول كده، يعني ممكن نبدأ ننزل على استحياء النهارده ونزود فترات بقائنا في الأماكن المفتوحة بكرة وبعده، لكن الليلة دي بـ ننصحكم بالتوجه للأماكن المغلقة وبس، إلا لو بـ تحبوا الأمطار وأجواء الإسكيمو ده بقى موضوع ثاني. هـ نرشح لكم عدد من الحفلات والخروجات اللطيفة اللي لائقة على الجو اليومين دول، وبـ ننوه برضه أن لسه احتفالات العام الجديد وأعياد الميلاد سايبة آثارها على عدد من الأماكن، وده بـ يؤثر على جداول الأحداث الفنية في عدد من المراكز الثقافية والمسارح.

الليلة دي هـ يبقى فيه حفل غنائي موسيقي لفرقة المصريين بقيادة الموسيقارهاني شنودة ومعاه الفنانة إيمان يونس ومجموعة من المطربين الشباب. التذاكر بـ 25 جنيه و20 جنيه لأعضاء الساقية والحفل يبدأ الساعة 8 مساءً.

وفي كايرو جاز كلوب جهز نفسك لسهرة كوميدية موسيقية مع فريق High On Body Fat اللي بـ يقدم أغاني ساخرة باللغتين العربية والإنجليزية، وبعدهم فريق سكرودرايفر اللي هـ يقدم أشهر أغاني الروك والبوب والفانك. احجز مكانك قبل ما تروح.

وبعد النجاح الجماهيري للعرض المسرحي “حلو الكلام” قرر قطاع صندوق التنمية الثقافية إعادة العرض في مركز الإبداع الفني وهـ يستمر لمدة 12 يوم كمان. العرض لطلبة الدفعة الثالثة من قسم التمثيل بستوديو مركز الإبداع اللي بـ يشرف عليه المخرج خالد جلال، يضم العرض مجموعة من أجمل القصائد التي تغنى بها كبار الشعراء في حب مصر، إعداد موسيقي هيثم الخميسي وتصميم الأزياء مروة عودة ورؤية إخراجية للمخرج خالد جلال.

الأجواء الباردة مناسبة جدًا للنوع ده من العروض، أوبرا الناي السحري من أداء فرقة أوبرا القاهرة وأوركسترا أوبرا القاهرة على المسرح الكبير بدار أوبرا القاهرة. الأوبرا الملحمية من تأليف موتسارت هي بـ تجسد الصراع بين الجهل والحكمة وأثارت الجدل عند عرضها لما كشفته من أسرار عن الماسونيين الأحرار. التذاكر متاحة لدى شباك الحجز.

وفي نفس التوقيت والمكان ولكن على المسرح الصغير لدار الأوبرا هـ يبقى فيه حفل لموسيقى الجاز الشرقي للفنان يحيى خليل وفرقته.

يوم الجمعة اللي هو بكرة هـ تنطلق المسابقة العاشرة للتصوير الفوتوغرافي بساقية الصاوي في قاعات الأرض والكلمة، مواعيد المعرض من 9 صباحًا لـ 8 مساءً ماعدا قاعات الحكمة والنهر اللي بـ يفتحوا أبوابهم طوال اليوم إلا في حالة العروض والحفلات. الدخول متاح للجميع.

يقيم بيت الغناء العربي بمقره في قصر الأمير بشتاك بشارع المعز بالجمالية حفل موسيقي لفرقة أساتذة الطرب للتراث تحت إشراف الفنان محسن فاروق، وده في إطار الاحتفال بشيخ الملحنين زكريا أحمد. وفيه عدد من الأمسيات والحفلات في مراكز فنية مختلفة بمناسبة ذكرى الشيخ زكريا أحمد ممكن تعرفوها من أجندة الموقع. 

يوم السبت هـ يكون فيه حفل لفرقة إفتكاسات في قاعة الحكمة في ساقية الصاوي، وسعر التذكرة 30 جنيه للأعضاء وغير الأعضاء. والحفل هـ يبدأ الساعة 8 مساءً.

ويوم السبت كمان هـ يقام اللقاء الشهري بعنوان “على باب الكلمة” في قاعة النهر بساقية الصاوي، واللي بـ يجيب لكم كل جديد في عالم الأدب وبـ تقدمه الشاعرة سماح ناجح، الدعوة عامة.

عدد من المعارض الفنية المستمرة من الأسابيع اللي فاتت وعدد آخر من المعارض تم افتتاحه الأسبوع ده، وفيه ندوات ولقاءات شهرية بساقية الصاوي ومركز الجزيرة للفنون ممكن تعرفوا تفاصيلها من خلال أجندة كايرو 360. نتمنى لكم “تكتكة” سعيدة.