The Definitive Guide to Living in the Capital , Cairo , Egypt

كعادة كل ويك إند بـ ننشر لكم أحسن الأحداث والحفلات اللي بـ نتمنى أنها تعجبكم، والأسبوع ده مختلف لأنه فيه العيد كل سنة وأنتم طيبين، وطبعًا كلنا عارفين أن العيد بتاع الأهل، علشان كده مش هـ تلاقوا أحداث كثير في أول وثاني أيام العيد.

نبدأ بيوم الخميس مع الحاجة المختلفة، كثير من جيل الشباب من الثمانينات والتسعينات اللي مرتبطة معاهم بذكريات كثيرة قوي مش في الأجيال الحالية، علشان كده شفشاون حب يفكركم بالذكريات الجميلة دي ويعمل لكم "يوم من التسعينات" وهـ يبقى فيه فعاليات كثيرة هـ تحاكي مرحلة التسعينات زي اللعب بالألعاب الإلكترونية، وغيرها من الألعاب المنتشرة ساعتها وغيرها من الأنشطة. وسعر التذكرة 10 في الساعة.

ولمحبي موسيقى الروك فيه في مطعم وكافيه أنتيك خانة حفل لفرقة الروك العربي "كيان". وسعر التذكرة 35 جنيه. كمان فيه في ساقية الصاوي بقاعة النهر حفل موسيقي لفرقة "هوس". وسعر التذكرة 25 جنيه لغير الأعضاء و20 جنيه للأعضاء.

أما لمحبي فن المسرح، في مركز الإبداع الفني عرض مسرحي بعنوان "ماك ولي"، وهو مشروع تخرج الدفعة الثالثة من ورشة ستوديو المركز، العرض مقدم تحت إشراف المخرج عصام السيد، وهو من تأليف شكسبير ومن إخراج مروة رضوان. والدعوة عامة.

وننتقل ليوم الجمعة، طبعًا علشان ده أول يوم العيد وخاص بالعائلة وكده فالأحداث فيه قليلة شوية، بس الساقية عاملة حدث لطيف اسمه "مراجيح العيد"، واللي هـ يضم أنشطة ترفيهية كثيرة للأطفال، المهرجان متاح أول أيام عيد الفطر. وسعر التذكرة 20 جنيه لغير الأعضاء و10 جنيه لأعضاء الساقية.

كمان لمحبي الخط فيه في آرت كورنر جاليري معرض جماعي لفن الخط العربي، وهو بعنوان "حكاية خط". والمعرض يضم أعمال لعدة فنانين مثل: رندا زيد، ناهد شاكر، عصام كمال ودعاء عرابي. والدعوة عامة.

ونختم بيوم السبت، الناس اللي سافرت الساحل نحب نبشركم أن موسى كوست مدلعكم خالص وعامل حفلة لأكبر نجوم الغناء منهم نيكول سابا ومحمد حماقي، استمتعوا!

كمان للي ما سافرش فيه في قاعة النهر بساقية الصاوي حفل موسيقي لفرقة "بلاك تيما". وسعر التذكرة 50 جنيه.

لو عاوزين تعرفوا أكثر عن أحداثنا اللي بـ ننشرها كل يوم على مدار الشهر تابعوا أجندتنا.

ويك إند وعيد سعيد!