The Definitive Guide to Living in the Capital , Cairo , Egypt

تأجير الشقق
في كايرو عملية تفاصيلها كتير والمتغيرات فيها يصعب حصرها: قانون جديد؟ ولا قديم؟
متشطبة؟ طب تشطيب لوكس ولا سوبر لوكس؟ الأسئلة مابـ تخلصش. وعشان كده حابين نديك
فكرة عن العوامل اللي لازم تتحط في الإعتبار وانت رايح تدور على شقة تأجرها وبـ
تفرق في قيمة إيجار العقار اللي بـ تتراوح حسب مواصفات العقار. والمواصفات
الأساسية والفرعية دي بالعشرات وتفاصيلها كتيرة جداً وممكن تـ تقسم كالآتي من باب
التبسيط:

1.       نوع الإيجار:

مؤخراً طلع قانون جديد للإيجار، وفي الواقع احنا رجعنا
نـ تعامل بالقانون المدني بعد ماكان القانون المعمول به قانون إستثنائي بـ يعالج
إرتفاع أسعار العقارات في ظل زيادة سكانية رهيبة وطلب على العقارات وبالتالي كان
فيه بنود تعسفية تجاه المستأجر. ومن سنة 1996 والقوانين الإستثنائية تم إيقافها،
ورجع العمل بالقانون المدني زي إيجار أي حاجة تانية. ودلوقتي المتعاقدين من حقهم
يختاروا بنود التعاقد من غير القيود اللي كانت مفروضة بسبب الظروف الإستثنائية
اللي كانت بـ تعدي بيها البلد. وبالرغم من الحرية في وضع البنود اللي بـ يضمنها
القانون المدني للمتعاقدين إلا ان الممارسة الفعلية في سوق تأجير العقارات هي اللي
بـ تفرض بعض القيود البسيطة فمثلاً ما بـ يتكتبش عقد مدة الإيجار فيه أكتر من 9
سنين، مع إنه قانوناً يجوز. في جميع الأحوال النهارده نادراً ما بـ يأجر مالك عقار
بالبنود الإستثنائية القديمة، إلا إن ممكن يتم الإتفاق عليها، لأنه في آخر المطاف
العقد شريعة المتعاقدين. وفي الحالة دي، بـ تكون قيمة الإيجار الشهري أقل كتير لكن
بـ يتدفع مقدم أكبر. لكن ده نادراً ما بـ يحصل لأنه أقل ربحاً للمالك، ولو توفر بـ
يكون في الأحياء الشعبية. وفي حالة الإيجار الجديد بـ يتطلب المؤجر تأمين إيجار 3
أو 4 أشهر ومقدم شهرين أو شهر (لكن الموضوع مش واجب قانوناً)، وبـ يتم الإتفاق على
قيمة الإيجار الشهري.

2.       المساحة:

بديهياً المساحة بـ تحدد قيمة الإيجار، لكن المفاجئ ان
العوامل التانية بـ تفرق جداً لدرجة ان عقارين نفس المساحة ونفس الحي ممكن تلاقي
إيجار الواحد ضعف التاني.

3.       الحي:

في القاهرة بقرش هـ تعيش وبألف هـ تعيش، فيه أحياء
الإيجار فيها بالدولار، زي الزمالك، وأماكن تانية أسعار الإيجار فيها قليلة. متوسط
سعر الإيجار في كل منطقة صعب جداً عشان العوامل اللي بـ تحدد ده كتيرة جداً. لكن
هـ نحاول نذكر بعض المناطق. لشقة حوالي 100 متر في أحياء مدينة نصر، مصر الجديدة
والمعادي الأسعار بـ تبدأ فيها من 1500 وبـ توصل لـ3000 جنيه، الأحياء زي السلام،
العبور، عين شمس، النعام، الزيتون، حدائق القبة تبدأ من 500 لـ1500 جنيه شهرياً.
أما الرحاب فشقة 90 متر بعيدة نسبياً عن المول تشطيب متوسط ممكن تبقى بحوالي 1800
جنيه شهرياً ولو كبرت المساحة شوية وطلت على جنينة ممكن سعر الإيجار يزيد 1000
جنيه. (الفيلات بـ تبدأ من 1500 دولار – 2500 دولار في الرحاب.)

4.       التشطيب:

التشطيب بـ يفرق كتير في سعر الإيجار. وأنواعه كتير وهي
كالآتي للي ما يعرفهاش:
مش متشطبة: ودي بـ تبقى على الطوب الأحمر.

نص تشطيب: مزودة بأبواب وحلوق.

متشطبة: على المحارة.

متشطبة لوكس: بياض، سيراميك أو بلاط.

متشطبة سوبر لوكس: إضاءة، بياض، سيراميك أو بلاط.

مفروشة: مزودة بكل أو معظم الأثاث.

وطبعاً كل ده جودته وذوقه بـ يفرق كتير. مافيش حدود
للمبالغ اللي ممكن تـ تصرف في تجهيز شقة.

5.       مواصفات أخرى:

في نهاية الموضوع انت ممكن تستعين ببعض شركات السمسرة . كل اللي هـ يطلبه منك صاحب العقار أو المؤجر
صورة البطاقة أو جواز السفر لو انت مش مصري. وأكيد في وقت إمضاء العقد لازم تتحقق
من ان المالك عنده الحق القانوني في التصرف في الشقة.